Bibeli Luayãtaalá Isaia 14

Isailiↄ sua ń pá ziu

1 Dii a Yakↄbu buiↄ wɛ̃nagwa,

a ɛa Isailiↄ si lↄ.

A ɛa ń kálɛ ń bùsuu,

buipãleↄ namá, aai kãaańnↄ.

2 Buipãleↄ gɛ́ zɛinɛ́ ń gbɛu,

Isailiↄ i gↄ̃ ń vĩ ń bùsuu.

Aaↄ dɛ ń zĩkɛnaↄ ũ gↄ̃ɛↄ ń nↄɛↄ.

Gbɛ̃́ pↄ́ ń vĩ zↄ ũ yãaↄ gↄ̃ ń zↄ ũɛ,

gbɛ̃́ pↄ́ ń gã lìnɛ́ ń kpɛↄ ↄ̃ aa gbãamↄnɛ́.

3 Zĩbeezĩ ↄ̃ Dii a á gba ĩ́ampakĩi,

á taasikɛ lↄo, á liaazↄ̃ lↄo,

á zↄzĩ gbãa kɛ lↄo.

Babɛli kía yã́

4 À yãada ń Babɛli kíao à mɛ:

Gbɛ̃gãfĩna ku lↄo,

aà kãaa mìdɛ.

5 Dii vãikɛnaↄ go ɛ̀,

à kpalablenapiↄ lípana zↄ̃̀ɛ.

6 Kíapi buiↄ gbɛ̃̀ò ń pↄfɛ̃o yãa ↄzɛsaiɛ,

à gbãa dɛnla kɛ̀nɛ́ ń pↄkũmao,

i kã́mabo ń ĩadaamáoo.

7 Bùsu píi gↄ̃̀ niɛniɛ yãkelesai,

an gula dↄ sa.

8 Pɛ̃liↄ ń Libã bùsu sɛdɛ líↄ pↄ kɛ̀na n yã́ musu, aalɛ mɛ:

Za gↄↄ pↄ́ n lɛlɛ,

gbɛ̃e lí mↄ́ wá zↄ̃i lↄo.

9 Bɛda looa n yã́i za zĩ́lɛzĩlɛ,

wàlɛ mↄ́ dainlɛ.

Bui píi kíaↄ lɛ́ fɛlɛ ń kìlau,

dṹnia gbɛ̃zↄ̃ↄ gyaadeↄ lɛ́ gbãakpanzi ḿpii.

10 Aa yã́sɛ ḿpii aa mɛ:

Mpi sↄ̃ n kɛwanↄ mùaa yã̀?

N gↄ̃ gbãasai láwáwa yã̀?

11 N ĩ́andãa ń n táasi mↄↄna ↄ́o sì bɛdau la,

kↄ̀ↄbiiↄ mɛ́ gↄ̃̀ n pɛ ũ,

séseↄ mɛ́ n zwãa ũ.

12 Saan nↄ̀ↄ'imina, gudↄlɛia nɛ́!

N bãɛ luabɛ n su zĩ́lɛ fá!

N gbɛ̃́ pↄ́ n buiↄ kàaũ

ↄ̃ wà n nɛ tↄↄlɛ.*

13 Ń ò n sↄ̃ guu n mɛ̀

ńyↄ̃ gbã zↄ̃ luawaɛ,†

ńyↄ̃ n kpala kã́fĩ e a vĩ saanaↄla,

ní zↄ̃lɛ diiↄ kↄ̃kãaakɛgbɛ pↄ́ kú gugbãntoo oi musu,

14 ní dɛdɛ ǹ vĩ luabɛpuanaa,

níↄ dɛ lán Musudewaɛ.

15 Ɔ̃ n si bɛdau e a nↄnau.

16 Gbɛ̃́ pↄ́ n e aↄ n gwa soee,

i làasookɛ à mɛ:

Ɔ̃mɛ dṹnia lùa yãao lò?

Aàpi mɛ́ kpalaↄ gbã̀ɛo lò?

17 Ɔ̃mɛ tò dṹnia gↄ̃̀ guwaiwai ũ,

à a mɛɛwiaↄ dɛ̃ↄnzↄ̃,

ìli a zĩ̀zↄↄ gbaɛ aa tá ń bɛo.

18 Bui píi kíaↄ wúlɛa ń gawio

baade a kpɛ́ dↄngubↄ guu,

19 ↄ̃ wà n vũaa miagbɛsai

lán nɛ́ pↄ́ wa ì gɛ ũwa.

Gbɛ̃́ pↄ́ wà ń zↄ̃zↄ̃ ń fɛ̃ndao

wà ń dɛdɛↄ kákaanla.

Wà n zu ɛu ń gbɛ̃́piↄɛ,

wà ↄ̃zↄ̃̀ n gɛwa.

20 Wa n mia kpakↄ̃i ń kíaↄo,

asa n n bùsu ↄ̃̀ↄkpàɛ,

n n gbɛ̃́ↄ dɛ̀dɛ.

Wa vãikɛnapi bui tↄ́ ma bauo.

21 À aà nɛ́ↄ dɛdɛkĩi kɛkɛ

duuna pↄ́ an maeↄ kɛ̀ yã́i,

kɛ́ aasu gbãakũ aa gↄ̃ bùsu vĩ,

an wɛ̃́lɛↄ dṹnia pao yã́i.

22 Ma Dii Zĩgↄ̃de ma mɛ̀ má fɛlɛmá,

mí Babɛli tↄ́ dɛ ń a gbɛ̃́ kĩnina pↄ́ gↄ̃̀ↄ,

an nɛ́ↄ ń ń buiↄ píi.

Ma Dii mámɛ má ò.

23 Má wɛ̃́lɛpi kɛ dã̀na ũɛ,

kpↄbↄ'ilɛnaↄ kákĩi ũ,

mí waa ń mɛ́sɛo mà kaalɛ.

Ma Dii Zĩgↄ̃de mámɛ má ò.

Yã́ pↄ́ a Asiliↄ le

24 Ma Dii Zĩgↄ̃de ma lɛgbɛ̃̀ ma mɛ̀:

Lá ma zɛò a kɛ,

yã́ pↄ́ má dà a zɛkɛ.

25 Má Asiliↄ wíwi ma bùsuu,

má ↄ̃zↄ̃má ma gbɛ̀sĩsĩↄ musu.

Má ń zuu bↄlɛɛ́,

má ń asoↄ goɛ́ á gã̀u.

26 Lá ma zɛò mà kɛ dṹniau píin we,

a yã́i ma ↄ looa bui píila.

27 Ma Dii Zĩgↄ̃de lá ma zɛòn we,

démɛ a fↄ̃ kpamɛɛi?

Ma ↄ dↄa musu,

démɛ a fↄ̃ siilɛi?

Yã́ pↄ́ a Filitɛ̃ↄ le

28 Wɛ̃ pↄ́ kí Aaza gà,‡ ↄ̃ Lua yã́ɛ bee ò:

29 Filitɛ̃ↄ, ásu pↄnakɛ go pↄ́ á gbɛ̃́ ɛa yã́ musuo.

Mlɛ̃pi bui guu ↄ̃ mlɛ̃̀ pãsĩna a bↄu,

aà lɛ́ aↄ vãi mɛ́ aↄ wãa.

30 Taaside búubuuↄ dã́dãkɛkĩi maa e,

wɛ̃nadeↄ wúlɛ ń laai musu.

Ãma má tó á zĩ́na ga ń nↄanaoɛ,

mí á gbɛ̃́ kĩnina pↄ́ gↄ̃̀ↄ dɛdɛ.

31 Wɛ̃́lɛdeↄ, à wiilɛ!

Uadeↄ, à búbuapɛ!

Filitɛ̃ↄ ápii, à kɛ dↄ̃nↄnↄ,

asa súɛlɛ dↄ gugbãntoo oi,

zĩgↄ̃ↄ kpaaĩa,

an gbɛ̃e kɛ̃a a deewao.

32 Kpelewa wa o buiↄ zĩnaↄnɛi?

Wa onɛ́ Dii Siↄna kàlɛ,

aà gbɛ̃́ wɛ̃nadeↄ ulɛkĩi vĩ a guu.

* 14:12 Zia 9.1 † 14:13 Mat 11.23 ‡ 14:28 2Kia 16.20