Bibeli Luayãtaalá Isaia 15

15

Yã́ pↄ́ a Mↄabuↄ le

1 Yã́ pↄ́ Lua ò Mↄabuↄ musun kɛ:

Mↄabuↄ bùsu wɛ̃́lɛ Ala gbòo,

wà a suumpa gwãasĩn doɛ.

Mↄabuↄ bùsu wɛ̃́lɛ Kii gbòo,

wà a suumpa gwãasĩn doɛ.

2 Dibↄ̃deↄ lɛ́ gɛ́ ↄ́ↄlↄi ń tã́akpɛu ń ń sa'okĩiↄwa.

Mↄabuↄ búbua dↄ Nɛbo ń Mɛdebao yã́ musu.

Migbaalɛa ḿpii, lɛkãna waa.

3 Gbɛ̃́ↄ ku zɛaↄu, zwã̀nkasaↄ kákaańla,

aa ku ua ń gãaɛo,

aalɛ ↄ́ↄlↄ, aalɛ pelembo.

4 Ɛsɛbↄ̃deↄ ń Ɛlealedeↄ búbua dↄ,

wàlɛ ń lↄↄ ma za Yaaza.

A yã́i tò Mↄabu zĩgↄ̃ↄ lɛ́ wiipɛ

e an nisĩna nàliwa.

5 Málɛ wɛ̃nakɛ Mↄabuↄnɛ ma sↄ̃ guu,

an lala'onaↄ lɛ́ tá Zoaa

e à gɛ̀ pɛ̀ Egala Selisiawa.

Aalɛ Luiti sĩ̀sĩ kṹ ń ↄↄlↄo,

aa bɛ Olonaiũ zɛ́u,

aalɛ ń wíwia búbuapɛ.

6 Asa Niũliũ í bà, a sɛ̃ gàgaɛ,

sɛ̃̀ ísi làa, lá ísi kú lↄo.

7 Ɔ̃ aa àizɛɛ pↄ́ aa è aa kàlɛↄ sɛ̀lɛ,

aalɛ taò swa gbalade baa.

8 Búbua lìgua Mↄabu bùsu zↄ̃lɛu,

wà ń ↄↄlↄ mà e à gɛ̀ pɛ̀ Egelaiũwa,

wà ń tã̀aapɛapi mà Bɛɛ'ɛliũ.

9 Dibↄ̃ íↄ gà ń auo,

asi má ɛa kpa Dibↄ̃zi lↄɛ.

Má nↄ̀ↄmusu gbaɛ Mↄabu lala'onaↄwa

ń ń bùsu gbɛ̃́ kĩninaↄ.