48
Dii mɛ́ zia yã́ dↄ̃
1 Yakↄbu buiↄ, à yã́ɛ bee ma.
Isaili tↄ́ kúwá, a bↄ Yuda au guu.
I lɛgbɛ̃ ń Dii tↄ́o,
i Isailiↄ Lua sísi,
ↄ̃ ili kɛ a zɛ́wa ń náaioo.
2 I mɛ Lua wɛ̃́lɛdeↄn á ũ,
á sↄ̃ kpálɛa Isailiↄ Luazi,
aà tↄ́n Dii Zĩgↄ̃de.
3 Ma dↄaa yãzi káauↄ ò,
ma a kpàwakɛ̀ ń ma lɛ́o,
ma bↄ ń yã́o kã́ndo, ↄ̃ yã́piↄ kɛ̀.
4 Asa má dↄ̃ kɛ́ á swã́ gbãa,
á waa gbãa lán sↄ̃́wa,
mɛ́ á kùa gbãa lán mↄgotɛ̃wa.
5 Ayãmɛto ma dↄaa má òɛ́ za káau,
ma a kpàwakɛ̀ɛ́ e àↄ gɛ́ mↄ́i,
kɛ́ ásu mɛ á tã́aↄ mɛ́ kɛ̀o,
ge á pↄ́ ãaↄ ń á pↄ́ kásaaↄ mɛ́ dìlɛo.
6 A yã́piↄ mà. Gwa! À kɛ̀ píi.
Á ye dↄ̃ noa?
Za gbã má yã́ dafu kpàwakɛɛ́,
yã́ pↄ́ ulɛaɛ́, á dↄ̃o.
7 Ma bↄò gbãɛ, yãzi no.
Gbã bàasio, i ma yãao,
kɛ́ ásu o á dↄ̃ yãaɛo.
8 I mao, á dↄ̃o, á swã́ dↄi za zio.
Asa má á dↄ̃ náaisaideↄ ũɛ,
za á igↄↄ wì mɛɛ́ Wúuuɛ!
9 Ma tↄ́ yã́i ↄ̃ ma a pↄkũma tò kpaa ĩ́i,
ma táasilɛa yã́i ma azĩa zùukɛ̀i,
kɛ́ másu á míↄnzↄ̃o.
10 Gwa! Ma á baasa,
i kɛ ń tɛ́o lán ã́nusuwa no.
Ma á maa wɛ̀ɛlɛ ń taasikɛao,
i kɛ mua tɛ́ guu no.
11 Ma bee kɛ̀ mazĩa yã́i.
Má tó wà ma tↄ́ ↄ̃̀ↄkpaa?
Má we wà ma bɛɛɛ dↄ̃ dii pãleɛo.
12 Yakↄbu buiↄ, à ma yãma,
á Isaili pↄ́ ma á sisiↄ.
Mámɛmaa ũ.
Mámɛ má Dↄaana ũ,
mámɛ má Gↄ̃zãna ũ lↄ.
13 Ma ↄ mɛ́ dṹnia kàlɛ,
ma ↄplaa mɛ́ musu kpàlɛ.
Tó ma ń sisi, aaì fɛlɛ sãnusãnu.
14 À mↄ ápii, à yãma!
Tã́aↄ kpele mɛ́ yã́piↄ ò yãai?
Ma gbɛ̃na mɛ́ a yã́ pↄ́ málɛ yá kɛ Babɛliɛ,
a ↄtↄ̃ Babiloniↄwa ń gbãao.
15 Mámɛ ma yã'ò ma aà sìsi,
má mↄaànↄ mɛ́ aà tá a kɛ na.
16 À sↄ̃mazi à yã́ɛ bee ma:
Za a daalɛgↄↄ mi yãe o asii guuo,
gↄↄ pↄ́ à kɛ̀, má kú we.
Dii Lua ń ma Nisĩnao aa ma zĩ à mɛ̀:
17 Ma Dii á Isailiↄ Lua á Bona
ma mɛ̀ mámɛmaa Dii á Lua,
mi yã́ kã́fĩade daɛ́,
mi á da zɛ́ pↄ́ dɛ à sɛwa.
18 Tó a laaidↄ̀ ma yãdanɛↄwa yãa,
dↄ̃ á kua aↄ na lán swawa,
á maakɛa aↄ kpálɛa vĩo lán ísia idãazĩwa,
19 á nɛ́ↄ dasikũ lán ũfãawa,
bui pↄ́ a bↄ á plɛuↄ aaↄ dasi lán gbɛ̀kↄsↄwa.
An tↄ́ a ga bauo, a láa ma kĩ́io.
20 À bↄlɛ Babɛli,
à bàalɛ Babiloniↄnɛ!
À yã́pi kpàwakɛ ń gulakɛao,
à yã́pi baokpa e dṹnia lɛ́wa,
í o Dii a zↄ̀blena Yakↄbu buiↄ bò.
21 À gɛ̃̀ńnↄ guyaaau, imi i ń dɛo,
a tò í bↄ̀nɛ́ gbɛsiu.
À gbɛpi pàa, ↄ̃ í bↄ̀ lɛ́ bàalɛ.
22 Ma Dii ma mɛ̀:
Vãikɛnaↄ aaↄ aafiao.