Bibeli Luayãtaalá Isaia 49

Dii zↄ̀blena lɛ̀ plaade

1 À ma yãma ísiabaadeↄ!

À swã́kpa bùsuzãzãdeↄ!

E wàↄ gɛ́ ma ii Dii ma sisi,*

gↄↄ pↄ́ má kú ma da gbɛɛu, à ma tↄ́ ònɛ́.

2 À ma lɛ́ kɛ̀ lán fɛ̃nda lɛnawa,†

à ↄkùmala kɛ́ à ma dↄ̃́a,

à ma kɛ lán kà sↄ̃́nɛwa,

à ma zu a gbàlau.

3 A òmɛɛ a zↄ̀blenan ma ũ,

Isaili pↄ́ á tↄbↄ a musu.

4 Ma mɛ̀ ma zĩ pã kɛ̀ɛ,

ma a gbãa kↄ̀lɛ gugiiyaa musu.

Ń beeo ma asea ku Dii kĩ́i,

ma ài kú ń ma Luao.

5 Dii ma ikàsa ma da gbɛɛu

kɛ́ màↄ dɛ a zↄ̀blena ũ,

kɛ́ mà suɛ ń Yakↄbu buiↄ,

mà Isailiↄ kãaaɛ.

Asa má gbia Diiɛ,

ma Lua mɛ́ ma gbãa ũ.

6 A òmɛɛ à mɛ: Gↄ̃a ma zↄ̀blena ũ

kɛ́ ǹ ɛa Yakↄbu buiↄ sɛ musu,

kɛ́ ǹ su ń Isaili pↄ́ bↄ̀ↄ ń pá ziu,

kɛ́ bee kɛ̀nɛ fɛ̃́nɛũ.

Má n dilɛ gupua ũ buipãleↄnɛ,‡

kɛ́ ǹ gɛ́ ń suabayão e tↄↄlɛ lɛ́wa.§

7 Dii, Isailiↄ Bona,

an Lua pↄ́ a kua adoapi mɛ́ ò

kpalablenaↄ zↄ̀blena pↄ́ wà sakàu

wa ye aà gĩyãioɛ à mɛ̀:

Tó kíaↄ wɛsìnlɛ, aa fɛlɛ zɛ,

dↄaanaↄ i kúlɛnɛ,

asa Dii pↄ́ n sɛ náai vĩ,

Isailiↄ Lua pↄ́ a kua adoapi.

Isaili zĩ̀zↄↄ sua Siↄna

8 Ma Dii ma mɛ̀,

má n yãma a gↄↄwa,

má dↄnlɛ suabagↄↄ.*

Má n dↄ̃́a,

má n kɛ ma bàa kua ń gbɛ̃́ↄ mi ũ,

kɛ́ ǹ e su ń Isaili bùsu yàaao a pá ziu,

ní kpaalɛnɛ́.

9 Ńyↄ̃ o zĩ̀zↄ pↄ́ kú gusiauↄnɛ

aa bↄlɛ mↄ́ gupuau.

Aa pↄble zɛ́ↄ saɛ

ń sĩ̀sĩ wáiwaiↄ píi.

10 Nↄana ge imi a ń dɛ lↄo,

ĩatɛ̃ a ń lɛ́o, mɛ́ gu a wãmáo,

asa an Wɛ̃nadↄ̃nɛde mɛ́ a gɛ́ńnↄ,

i dↄaanɛ́ e nibↄnai.†

11 Má a gbɛ̀sĩsĩↄ kɛ zɛ́ ũ,

ma zɛdaↄ aaↄ ku musu.

12 Gwa! Aa bↄ̀ za zã̀zã, aalɛ mↄ́.

An gbɛ̃eↄ gwa, aa bↄ̀ gugbãntoo oi,

an gbɛ̃eↄ bↄ̀ bɛ'aɛ oi,

an gbɛ̃eↄ bↄ̀ Sini bùsuu.

13 À gulakɛ luabɛdeↄ,

à pↄnakɛ zĩ́lɛdeↄ,

à koo pũna ń lɛsiao gbɛ̀sĩsĩↄ,

asa Dii lɛ́ a gbɛ̃́ↄ nↄ̀sɛ nininɛ́,

àlɛ wɛ̃nadↄ̃ a gbɛ̃́ taasideↄnɛ.

14 Ń beeo Siↄnadeↄ mɛ̀:

Dii pãkpàwázi,

wá yã́ sã̀aàgu.

15 Nɛ́ pↄ́ nↄɛ yↄ̃́ kpàwà yã́ a fↄ̃ sãaàgue?

A a nɛ'ia wɛ̃nagwao lé?

Baa tó aà yã́ sã̀aàgu,

n yã́ a sãmaguo.

16 Gwa! Ma n tↄ́ kɛ̃̀ ma ↄlau,

n bĩ́iↄ yã́ ìↄ dↄ ma sↄ̃wa gↄↄpiiɛ.

17 N nɛ́ pↄ́ aa ɛa n fɛlɛↄ wã̀ lɛ́ su,

gbɛ̃́ pↄ́ aa tò n gↄ̃ bɛzia ũↄ lɛ́ tá.

18 Wɛzu ǹ gugwagwa,

n nɛ́ↄ kã̀aa lɛ́ suma.

Ma Dii ma mɛ̀ ń mazĩa kuao,

aa nama ḿpii lán nↄamblebↄwa,

ńyↄ̃ ń da lán zãkɛn dafu bↄawa.

19 Baa kɛ́ wà n gboo

wà n kɛ bɛzia ũ,

mɛ́ n bùsu gↄ̃̀ da pã,

ńyↄ̃ fↄ̃ ǹ n nɛ́ↄ si píi lↄo.

Gbɛ̃́ pↄ́ kpànziↄ aaↄ kunnↄ zã̀.

20 Ńyↄ̃ swã́lɛ nɛ́ pↄ́ wà ń í n ↄↄlↄgↄↄↄ yã́wa, aa okↄ̃ɛ:

Guɛ bee fɛ̃́nɛũ, a fↄ̃ wá sio,

wá gba dɛ̀ɛpookĩi wà zↄ̃lɛu.

21 Ńyↄ̃ mɛ n sↄ̃ guu:

Démɛ nɛ́ beeↄ ìmɛɛi mↄↄↄ?

Ma nɛ́ↄ gàga ma gↄ̃ nɛ́sai,

Lua gìmazi à ma nɛ́ↄ sìa,

démɛ nɛ́piↄ gwài?

À ma to mado, nɛ́piↄ bↄ̀ má ni?

22 Ma Dii Lua ma mɛ̀:

Gwa! Má ↄkɛ buipãleↄnɛ,

aa n nɛgↄ̃ɛↄ kuɛ suonɛ.

Má gudↄkↄ̃ɛkĩi dilɛ bùsu píi gbɛ̃́ↄnɛ,

aa n nɛnↄɛↄ zↄ̃ ń gã̀u aa mↄonɛ.

23 Kíaↄ mɛ́ aaↄ dɛ n nɛ́ↄ gwanaↄ ũ,

kía naↄ mɛ́ aaↄ dɛ ń yↄ̃kpamadeↄ ũ.

Aa kúlɛ bùsu sɛnɛ,

aa n gbá bùsu sãsã,

níↄ dↄ̃ kɛ́ mámɛmaa Dii.

Wí a gbɛ̃́ pↄ́ a wɛ́ dↄmazi kũo.

24 Wa fↄ̃ gↄ̃sa zĩ̀ ài siwàe?

Wa fↄ̃ zĩ̀zↄↄ bↄ gbɛ̃́ pãsĩ ↄzĩe?

25 Ma Dii ma mɛ̀,

ao, wa zĩ̀zↄↄ si gↄ̃sawa,

mɛ́ wa zĩ̀ ài bↄ gbɛ̃́ pãsĩ ↄzĩ.

Má sòlekɛ ń gbɛ̃́ pↄ́ lɛ́ sòlekɛnnↄↄ,

mí n nɛ́ↄ suaba.

26 Má tó n ĩadamadeↄ ńzĩa só,

aa ńzĩa au mi à ń dɛ lán wɛ̃wa,

gbɛ̃́pii iↄ dↄ̃ kɛ́

mámɛ má Dii á Suabana,

á Yakↄbu buiↄ Lua gbãade, á Bona ũ.

* 49:1 Isa 7.14, Zel 1.5, Mat 1.21 † 49:2 Ɛbɛ 4.12, Zia 1.16 ‡ 49:6 Isa 42.6, Luk 2.32, Zĩn 26.23 § 49:6 Zĩn 13.47 * 49:8 2Kln 6.2 † 49:10 Zia 7.16-17