3
Isaili dↄaanaↄ lelea
Ɔ̃ ma ɛa ma mɛ̀:
À swã́kpa á Yakↄbu bui kíaↄ,
á Isaili kpalablenaↄ!
I kũ àↄ yã́zɛde dↄ̃o lé?
Á za maau, á ye vãizi,
i ma gbɛ̃́ↄ báa bo,
i ń báasi wolo ń wáwa.
I ń mɛbaasi só,
i ń báa wolo ń mɛwa,
i ń wáↄ wíwi,
i ń nↄ̀ↄ fùukɛ dàau,
i tↄɛtↄɛ ka do'oou.
Tó aa wiilɛ̀a sa, má wemáo.
Gↄↄ bee má wɛsɛ mà ń kĩ́i gwao
yãvãi pↄ́ aa kɛ̀ yã́i.
Yã́ pↄ́ Dii òn kɛ, à mɛ̀:
Ãnabi pↄ́ aaì ma gbɛ̃́ↄ sã́sãↄ,
tó aa pↄ́ è aa sò,
aaì mɛ aafia aↄ ku.
Tó aai pↄ́ e aa dà lɛ́ɛo sↄ̃,
aaì mɛ aa zĩ̀ sↄukɛ.
A yã́i tò gwãasĩna a kúlɛwá,
wɛ́pungu'ea aↄ kuo.
Gusia a daálaɛ,
màsokɛa aↄ ku lↄo.
Ĩatɛ̃ a gɛ̃ ãnabipiↄnɛ kpɛ́u,
fãanɛ aↄ sianɛ́.
Wí a gu'enaↄ kṹ,
màsokɛnaↄ gɛɛ a gↄ̃ kpá ń wɛ́i.
Ampii aa ↄku ń lɛ́wa,
kɛ́ málɛ wemáo yã́i.
 
Mapi sↄ̃, gbãa mↄ̀a
Dii Nisĩna pↄ́ ũ.
Yã́zɛde dɛ̀dɛa ń ikoo
kɛ́ mà Yakↄbu buiↄ tàaeↄ onɛ́,
mà to Isailiↄ ń duuna dↄ̃.
À yã́pi ma á Yakↄbu bui kíaↄ,
á Isaili kpalablenaↄ!
Á ye yã́zɛde gĩyãio,
i yã́ pↄ́ zɛvĩ fuangbaɛ.
10 I Siↄna kã́fĩ ń gbɛ̃dɛao,
i to Yelusalɛũ zↄ̃ↄkũ ń yãdↄↄsaio.
11 A kíaↄ ì yã́gↄ̃gↄ̃ gbagusaɛ yã́i,
a sa'onaↄ ì yãdadanɛ́ ài'ea yã́i,
a ãnabiↄ ì màsokɛ ↄ̃a yã́i.
Ɔ̃ aaì Dii tↄ́ sɛ́ aa mɛ:
Dii kú wá guuo lé?
Yã́ a wá leo.
12 A yã́i wa Siↄna sa pa bugbɛ ũɛ,
Yelusalɛũ i gↄ̃ bɛzia ũ,
Lua kpɛ́ sĩ̀sĩ i gↄ̃ sĩ̀sĩ líkpɛde ũ.*
* 3:12 Zel 26.18