4
Dii gbɛ̀sĩsĩ
(Isa 2.1-4)
Gↄↄgbɛzãzĩ
gbɛ̀sĩsĩ pↄ́ Dii kpɛ́ kuwà
a gↄ̃ gbɛ̀sĩsĩↄ mide ũ.
Wa sɛ lɛsĩ dɛ sĩ̀sĩↄla,
bui píi i siu we.
Buiↄ gɛ́ we dasi, aai mɛ:
À mↄ wà dɛdɛ Dii gbɛ̀sĩsĩwa,
wí gɛ́ Yakↄbu buiↄ Lua kpɛ́u,
i wá da a zɛ́wa, wíↄ bɛu.
Dii ikoyã a bↄ Siↄna,
aà yã́ a bↄ Yelusalɛũ.
A yã́gↄ̃gↄ̃ buiↄnɛ,
a yãkɛkɛ bùsu zã̀zã pↄ́ gbãa vĩↄnɛ,
aai ń fɛ̃ndaↄ gbɛ̃gbɛ̃ aa lilɛ soona ũ,
aai ń sↄ̃naↄ lilɛ máaso limibobↄ ũ.*
Buie a fɛ̃nda sɛ a deezio,
wa zĩkaa dada lↄo.
Baade a zↄ̃lɛ a vɛ̃ɛli
ń a kaadↄɛnlio gbáu,
gbɛ̃e a vĩadadańzi lↄo,
asa Dii Zĩgↄ̃de lɛ́ mɛ́ ò.
Bui píi ìↄ kú ń ń tã́a tↄ́o,
wápiↄ sↄ̃, Dii wá Lua tↄ́ wáↄ kuò gↄↄpii.
 
Dii mɛ̀:
Gↄↄ bee má a gbɛ̃́ tↄ̃̀ↄlɛnaↄ kãaa,
má a gbɛ̃́ pↄ́ ma ĩadàmá ma ń yápiↄ naaa.
Má a gbɛ̃́ pↄ́ lɛ́ tↄ̃ↄlɛpiↄ kɛ ma gbɛ̃́ kↄ̃naↄ ũ,
má a gbɛ̃́ pↄ́ wà tàńnↄ zã̀piↄ kɛ bui gbãa ũ.
Za gↄↄ bee máↄ kiblemá
Siↄna gbɛ̀sĩsĩ musu e gↄↄpii.
Siↄna gbɛ̀sĩsĩá ma kpàsa dã́dãkɛgbaɛ,
aà kpala káau a ɛa suwà,
wiↄ kible Yelusalɛũ.
Bↄ́yãi álɛ búbuapɛi?
Kɛ́ á kía vĩo yã́i yã̀?
Á lɛdamade kuo,
ↄ̃ wãwã á kṹ lán nɛ'iwãwãwaa?
10 Siↄnadeↄ, à fĩaafĩaa ń wãwão
lán nↄɛ pↄ́ lɛ́ nɛ'iwa,
asa á bↄlɛ á wɛ̃́lɛ guu
à kálɛ sɛ̃uɛ, í tá Babɛli.
We Dii a á misiu,
we a á bↄu á ibɛɛↄ ↄzĩ.
11 Tia kɛ́wa buiↄ kãaaaázi,
aa mɛ̀ wa Siↄna ↄ̃̀ↄkpa,
wiↄ gwa wàↄ pↄnakɛ.
12 Aa Dii làasoo dↄ̃o,
aa yã́ pↄ́ àlɛ yá gbadↄ̃o,
asa à ń kãaa lán pↄ́ bàaawa pↄ́wɛngbɛ̃zɛuɛ.
13 Siↄnadeↄ, à fɛlɛ pↄgbɛ̃!
Má tó àↄ gbãa
lán zu pↄ́ a kↄ́ba dɛ mↄ ũ
mɛ́ a swɛ dɛ mↄgotɛ̃ ũwaɛ,
í bui dasipiↄ úlↄ.
Á ń pↄ́ pↄ́ aa è gbɛ̃blea guu kpaa,
an àizɛɛↄ i gↄ̃ mapi ma dṹnia Dii pↄ́ ũ.
14 Wɛ̃́lɛ bĩ́ideↄ, à á zĩgↄ̃ↄ kãaa,
asa wà koezↄ̃̀áziɛ.
Wa Isailiↄ dↄaana lɛ́ ń goo a gɛɛwa.
* 4:3 Yoɛ 4.10 4:3 Isa 2.2-4 4:4 Zkl 3.10