6
Dii bↄbↄa ń Isailiↄ
1 À swã́kpa yã́ pↄ́ Dii òi!
À mɛ̀ mà fɛlɛ zɛ,
mà bↄ ń yã́o gbɛ̀sĩsĩↄ wáa,
mà to sĩ̀sĩↄ ma lↄↄ ma.
2 Gbɛ̀sĩsĩↄ, à yã́ pↄ́ Dii lɛ́ bↄo ma!
Dṹnia zĩ́na pↄ́ ìↄ ku gↄↄpiiↄ
à swã́kpa!
Asa Dii lɛ́ bↄbↄ ń a gbɛ̃́ↄɛ,
a yãvĩ ń Isailiↄ.
3 Ma gbɛ̃́ↄ, bↄ́ má kɛ̀ɛ́i?
Bↄ́ má kɛ̀ a kpasamanↄi?
À omɛɛ!
4 Ma á bↄ́lɛ Egipi,
ma á bↄ́ zↄbleu,
Ma Mↄizi zĩ̀ à dↄ̀aaɛ́
ń Aalonao ń Miliaũo.
5 Vãi pↄ́ Mↄabuↄ kí Balaki dìlɛ à kɛɛ́
ń yã́ pↄ́ Bɛↄↄ nɛ́ Balaaũ wèwào,
à to à dↄágu ma gbɛ̃́ↄ.
Ma dↄaaɛ́ sɛa za Sitiũ
e a gɛ ka Giligali,
kɛ́ à e ma maakɛaↄ dↄ̃.
6 Bↄ́ má gɛ zɛò Dii aɛi?
Bↄ́ má kúlɛò Lua Musudeɛi?
Má gɛ zɛ aà aɛ ń gáae wɛ̃donao yã̀?
Má sa pↄ́ wì a pↄ́ kátɛu à tɛ́kũ oowà yã̀?
7 A sãsa mɛ̀n ↄ̀aa sↄo si yã̀,
ge nísi ta mɛ̀n ↄ̀aasↄsↄo lɛɛ kwi?
Má a nɛgↄ̃ɛ sɛ̃́ia kpá ma tàae fĩabobↄ ũ yã̀?
Má nɛ́ pↄ́ bↄ̀ ma plɛu kpa ma duuna awakpabↄ ũ yã̀?
8 Gbɛ̃nazĩna, wà yã́ pↄ́ maa ònɛ.
Yã́ kpele Dii lɛ́ gbɛamai?
Yãkɛ a zɛ́wa, níↄ ye gbɛ̃kɛkɛai.
Ǹ nzĩa busa, ní tɛ́ Luazi.
9 À Dii lↄↄ ma dↄ,
àlɛ lɛzu mɛɛwiadeↄzi.
Vĩakɛa Diiɛ mɛ́ ↄ̃nↄ ũ.
À go pↄ́ a á gbɛ̃ gwa,
í Lua pↄ́ dìlɛ yãma.
10 Ɔvãi ku vãikɛnaↄ ua e tia
ń zaa mↄafilide pↄ́ dɛ láaipↄ ũo.
11 Gbɛ̃́ pↄ́ kiloo gbɛ̃blebↄ vĩ
a gbiayↄ̃bↄ vãiↄ kũa,
má aà bↄ maa nɛe?
12 Mɛɛwiaɛ bee ↄdeↄ pãsĩ maamaaɛ,
mɛ́ a gbɛ̃́ kĩniↄ ì ɛɛtoto,
mↄafiliyã mɛ́ kú ń lɛ́u.
13 Ayãmɛto ma na á dɛdɛawa,
málɛ á ásookɛ á duuna yã́i.
14 Á pↄble, kási á kã́o,
á nↄ̀sɛ a gↄ̃ da giiɛ.
Á pↄ́ dilɛ kũ̀sũa ũ, a gↄↄplakɛo,
asa má á kũ̀sũapi kpa zĩ̀blenaↄwaɛ.
15 Á pↄ́tↄ̃, kási á kɛkɛo.
Á nísi kɛ, kási á a mↄaokɛo.
Á vɛ̃ɛ dafu kɛ, kási á a imio.
16 Á Ɔmɛli yã'onɛ kũa
ń Ahabu bɛdeↄ yãkɛaↄ píi,
a ń ↄlɛsɛ̀.
A yã́i tò má á dúuzↄ̃,
mí tó wà á mɛɛwiadeↄ láanikɛ,
í gↄ̃ bui píiɛ gbɛ̃́ sↄ̃́sↄ̃bↄ ũ.