7
Isailiↄ fɛlɛa
Waiyoo mapi!
Má dɛ lán gbɛ̃́ pↄ́ lɛ́ libɛ
ge vɛ̃ɛbɛ kↄ̃nwɛwaɛ.
Vɛ̃ɛ kↄ́ ge kaadↄɛn sɛ̃́ia pↄ́ mi a nidɛ ku lↄo.
Luayãmanaↄ làa dṹniau,
gbɛ̃maaↄ ku gbɛ̃nazĩnaↄ guu lↄo.
Ampii aaì gbɛ̃́ dã́dã aa dɛ,
baade lɛ́ a gbɛ̃́dee wɛ ń táaluo.
Aa vãikɛa gↄ̃i vĩ ↄplaa ń zɛɛo.
Kía ì pↄ́ gbɛa,
yã́kpalɛkɛna ì gbagusaɛsi,
gbãade ì azĩa pↄeã dilɛnɛ́,
ampii aaì gbɛ̃́ wɛtãò.
An gbɛ̃maaↄ dɛ lán lɛaawa,
an dendaeↄ pãsĩ dɛ lɛsikaoa.
An ĩadamagↄↄ pↄ́ ń gudↄ̃anaↄ a yã'ò kà,
an bã̀abãabogↄↄ pìla se.
Ńsu ǹ n gbɛ̃́dee náaikɛo,
ńsu ǹyↄ̃ daa n kwàasi gã̀uwao.
Laaika yã́ pↄ́ ńyↄ̃ o nↄɛ pↄ́ kpá ń kùɛɛzi.
Nɛgↄ̃ɛ a a mae kpɛbↄ,
nɛnↄɛ a fɛlɛ ń a dao,
nↄzãe a bↄ a zãda kpɛ,
gbɛ̃́ bɛdeↄ gↄ̃ aà ibɛɛↄ ũ.*
Mapi sↄ̃ ma wɛ́ aↄ dↄ Diizi,
má Lua ma Suabanapi dã́.
Ma Lua a ma yãma.
 
Wá ibɛɛↄ su pↄnakɛ wá yã́ musuo.
Baa kɛ́ wa lɛlɛ, wá fɛlɛɛ.
Baa tó wá kálɛa gusiau,
Dii a gupuwɛ̃ɛ.
Lá wa duunakɛ̀ Diiɛ,
àlɛ a pↄkũma bↄbↄwá
e àↄ gɛ́ yã́siiwanↄ,
i to yã́ bↄwanↄ na.
A wá da gupuau,
a wá suaba, wí wɛ́siɛ.
10 Tó wá ibɛɛↄ è, wí a ń kṹ.
Wá ibɛɛpiↄ òwɛ̃ɛ yãa
aa mɛ̀ Dii wá Lua ku máɛ?
Wa ↄ̃zↄ̃má lán pɛ̀lɛawa gãaɛ,
wí wɛ́siɛ.
11 Siↄna bĩ́ibogↄↄ a ká,
gↄↄ bee a kálɛa a yàasa kṹ.
12 Gↄↄ bee gbɛ̃́ↄ bↄ Asili ń Egipi wɛ̃́lɛↄ guu,
aa bↄ za Egipi ń Uflatao,
za ísia baale ń baalao,
za gbɛ̀sĩsĩ kpɛle ń kpɛlao,
aai mↄ we.
13 Dṹnia a gↄ̃ yàaa
gbɛ̃́ pↄ́ kú a guuↄ yãkɛaↄ gbɛ ũ.
14 Dii, ǹ ń gbɛ̃́ↄ dã́dãkɛ ń n gopanao,
n kpàsa sãpiↄ aaiↄ kú ńtɛ̃ɛ Kaamɛli líkpɛu,
aai pↄble Basana ń Galadao dã́dãkɛkĩi maau lán yãawa.
15 Ńyↄ̃ yãbↄnsaɛↄ kɛnɛ́,
lá ń kɛ̀ gↄↄ pↄ́ n bↄńnↄ Egipiwa.
16 Buipãleↄ e,
wí i ń kṹ ń nɛgↄ̃nkɛyã musu.
Aa ↄku ń lɛ́wa,
an swã́ iↄ kɛ weũu.
17 Aa bùsu ble lán mlɛ̃wa,
lán pↄ́taa'onkuawaↄwa.
Aa bↄ ń ulɛkĩiↄ guu,
aa mↄ Dii wá Luawa ń lualuao.
N vĩa a ń kṹ, sↄ̃ i kɛ̃́ńgu.
18 Lua, démɛ muaannↄi?
Ni n gbɛ̃́ kↄ̃naↄ duuna kɛ̃́má,
ni sùuukɛńnↄ ń ń tàaeↄ.
N pↄ líↄ paa gↄↄpiio,
gbɛ̃kɛkɛanɛ́ mɛ́ ì kangu.
19 Ńyↄ̃ ɛa wá wɛ̃nagwa lↄ,
ní ↄ̃zↄ̃ wá yãvãiↄwa,
ní wá duuna zu ísia í títiu píi.
20 Ńyↄ̃ náaiyã kɛ Yakↄbu buiↄnɛ,
ńyↄ̃ gbɛ̃kɛkɛ Ablahaũ buiↄnɛ,
lá ń a lɛgbɛ̃̀ wá dezipiↄnɛ za káauwa.
* 7:6 Mat 10.35-36, Luk 12.53