Bibeli Luayãtaalá Nɛɛmii 13

Nɛɛmii yã́gↄ̃gↄ̃a Isailiↄnɛ gbɛzã

1 Zĩbeezĩ wà Mↄizi lá kyokɛ̀ gbɛ̃́ↄnɛ, ↄ̃ wa è we kɛ́ Amↄni ge Mↄabu buie suli gɛ̃ Lua gbɛ̃́ↄ guuo, 2 asa aai da Isailiↄlɛ ń pↄbleao ń íoo. Aa fĩabò Balaaũɛ aà láaikɛmáɛ, ↄ̃ wá Lua aà yã́ lìlɛ samaa'oa ũ.* 3 Kɛ́ aa ikoyãpi mà, aa buipãleↄ bↄ̀lɛ ń guu.

4 E yã́pi àↄ gɛ́ kɛi wà sa'ona Ɛliasibu dìlɛ wá Lua ua làasi gbɛ̃zↄ̃ↄ ũ. Amↄni bui Tobia daɛɛ, 5 à kpɛ́nɛ zↄ̃ↄ kpà Tobiapiwa. Wì pↄ́wɛnti kálɛu we yãa ń tulaletio ń Lua ua pↄ́ↄ ń pↄ́wɛna kwideo ń vɛ̃ɛo ń nísi pↄ́ dɛ Levii buiↄ ń lɛ̀sinaↄ ń bĩ́ibↄlɛdↄ̃anaↄ pↄ́ ũo ń laba pↄ́ wa kɛ̀ sa'onaↄnɛo. 6 Gↄↄ bee má kú Yelusalɛũo, asa Babɛli kí Aatasasa kpalablea wɛ̃̀ baakwi ń plaode guu ma ɛa gɛ aà kĩ́i. Gↄↄpla gbɛa ma wabikɛ̀wà, 7 ↄ̃ ma su Yelusalɛũ. Ma yãvãi pↄ́ Ɛliasibu kɛ̀ bao mà, lá à Lua ua kpɛ́nɛ kpà Tobiawa. 8 Yã́pi kɛ̀mɛɛ ĩ́i maamaaɛ, ↄ̃ ma aà pↄ́ↄ sɛ̀lɛ kↄ̀lɛɛ̀ bàasi. 9 Ma mɛ̀ wà gbãbↄ kpɛ́nɛpiɛ, ↄ̃ ma ɛa Lua ua pↄ́ↄ kàlɛ we ń pↄ́wɛntio ń tulaletio.

10 Má mà lↄ wìli Levii buiↄ ń lɛ̀sinaↄ asea kpámáo, ↄ̃ aa ↄbↄ̀lɛ Lua ua zĩu, an baade tà bua. 11 Ma zↄadↄ̀ gbãadeↄwa ma mɛ̀: Àkɛa a pãkpà Lua uaii? Ɔ̃ ma Levii buiↄ kã̀aa, ma ń baade dà a zĩu. 12 Ɔ̃ Yudaↄ mↄ̀ ń pↄ́wɛn kwide bↄ̀ ń vɛ̃ɛo ń nísio ḿpii, aa kàka làasiu.† 13 Ma sa'ona Selemia ń lakɛ̃na Zadokio ń Levii bui Pedaiao dìlɛ làasipiↄ gbɛ̃zↄ̃ↄↄ ũ, ↄ̃ ma Zakuu nɛ́ Anana, Matania tↄũna dìlɛ ń dↄnlɛde ũ, asa wa ń dↄ̃ gbɛ̃́ náaideↄ ũɛ. Làasi pↄ́ↄ biilɛa ń gbɛ̃́ↄnɛ dɛ ń yã́ ũɛ. 14 Ma Lua, ma yã́pi àↄ dↄngu. Ńsu yãmaa pↄ́ má kɛ̀ n kpɛ́ zĩ yã́ musu suumpao.

15 Gↄↄbeezĩ ma Yudaeↄ è, aalɛ ↄ̃zↄ̃ vɛ̃ɛwa a ífɛ̃kĩi kã́mabogↄↄzĩ. Ma gbɛ̃eↄ è lↄ, aalɛ su Yelusalɛũ ń pↄ́wɛnao kã́mabogↄↄzĩ. Aa yè zàa'ĩnaↄnɛ ń vɛ̃ɛbɛ'io ń vɛ̃ɛbɛo ń kaadↄɛmbɛo ń aso pãleↄ, ↄ̃ ma ń gba laai blɛyiaa gↄↄpi zĩ́ yã́ musu.‡ 16 Tiideↄ ku Yelusalɛũ, aaì su ń kpↄo ń laa bui píio, ↄ̃ aaì yía Yudaↄwa kã́mabogↄↄzĩ. 17 Ma zↄadↄ̀ Yuda gbãadeↄwa ma mɛ̀: Yãvãi pↄ́ álɛ kɛɛ bee sↄ̃ bɛ! Álɛ kã́mabogↄↄ gbãlɛɛ. 18 Màa á deziↄ lɛ́ kɛ, ↄ̃ wá Lua yãyìa wɛ̃́lɛɛ beewao lò? Ɔ̃ álɛ kã́mabogↄↄ gbãlɛ, álɛ aà pↄ fɛlɛ sↄ̃a? 19 Má dìlɛ tó gu sì ãsↄ̃adazĩ oosi, wàli Yelusalɛũ bↄlɛ gbaↄ tata, wasuli wɛ̃o e kã́mabogↄↄ gɛ̃. Ma azĩa gbɛ̃́ↄ kàlɛ bↄlɛpiↄu, kɛ́ gbɛ̃e su gɛ̃ ń asoo kã́mabogↄↄo yã́i. 20 Laatanaↄ ń gbɛ̃́ pↄ́ lɛ́ pↄ́ yiaↄ ì bĩ́i kpɛ gɛ̃n do ge gɛ̃n pla. 21 Ɔ̃ ma lɛzàmá ma mɛ̀: Tó a i we sa, má á kṹkũɛ. Za gↄↄ bee ↄ̃ aai mↄ kã́mabogↄↄzĩ lↄo. 22 Ɔ̃ má ò Levii buiↄnɛ aa gbãbↄ ńzĩaɛ, aai gɛ́ bↄlɛdↄ̃ai, kɛ́ wà kã́mabogↄↄ dↄ̃ Lua pↄ́ ũ yã́i. Ma Lua, to ma yã́pi àↄ dↄngu, ní ma wɛgwa n gbɛ̃kɛ zↄ̃ↄ lɛ́u.

23 Gↄↄbeezĩ lↄ ma Yudaeↄ è, aa nↄↄ sɛ̀ Asedodadeↄ ń Amↄniↄ ń Mↄabuↄ guu. 24 Ɔ̃ an nɛ́eↄ ì Asedoda yã́ ge buipãle yã́ ma, aali Ɛbɛlu yãmao. 25 Ɔ̃ ma zↄadↄ̀má ma ń ká, ma ń gↄ̃ɛeↄ gbɛ̃̀, ma ń gbɛ̃eↄ mikã gà má wò. Ɔ̃ má tò aa mɛ̀ wa sì ń Luao, wa ń nɛnↄɛↄ kpã́sã ń nɛgↄ̃ɛnaↄwao. Wa ń nɛnↄɛↄ sɛ́ ń nɛgↄ̃ɛↄnɛ ge ńzĩa pↄ́ ũo. 26 Màa Isailiↄ kí Salomↄↄ duunakɛ̀o lò? Buie kía i kaaàwao. Aà Lua yeaàzi,§ ↄ̃ à aà kpà Isailiↄ píi kía ũ, kási baa aàpi, buipãle nↄɛↄ mɛ́ aa aà dà duunau.* 27 Ɔ̃ wá mà ápiↄ sↄ̃ a yãvãi zↄ̃ↄpi kɛ̀, a zĩbↄnkpɛkɛ̀ wá Luaɛ, a buipãleↄ sɛ̀ nↄ ũ. 28 Yoiada nɛ́ↄ do pↄ́ dɛ sa'onkia Ɛliasibu tↄũna ũ mɛ́ Oloni gbɛ̃́ Sambala nɛ́ sɛ̀ yãa, ↄ̃ ma aà yà. 29 Ma Lua, to an yã́ àↄ dↄngu, asa aa sa'onkɛ gbãlɛ̀ɛ, aa n bàa kua ń sa'onaↄ ń Levii buiↄ yãdilɛa gbòo. 30 Ma buipãleↄ yã́ↄ píi bↄ̀ sa'onaↄ ń Levii buiↄnɛ, ↄ̃ ma ń baade dàzĩu. 31 Ma ɛa yàa labakɛa gↄↄ dìlɛ gbɛ̃́ↄnɛ ń buapↄ́ káauↄ kpaao. Ma Lua, to ma yã́ àↄ dↄngu a maa ũ.

* 13:2 Nao 22.1-6 † 13:12 Mal 3.10 ‡ 13:15 Bↄa 20.8-10 § 13:26 2Sam 12.24-25 * 13:26 1Kia 11.1-8