4
Gbɛ̃zↄ̃ↄ lɛdama
Ma nɛ́ↄ, à gbɛ̃zↄ̃ↄ lɛdama ma,
à á laai kpálɛ kɛ́ à e àↄ dↄ̃a vĩ.
Dↄ̃a súsu málɛ daɛ́,
ásu pãkpa ma yãdanɛio.
Kɛ́ má kú nɛ́ ũ ma mae ↄzĩ,
má busɛ ma da nɛ́ mɛ̀ndona ũ.
Ma mae yãdàmɛɛ à mɛ̀:
Ǹyↄ̃ ma yã́ kũa n sↄ̃u,
ma yãdilɛnɛↄ da, n kua iↄ na.
Ɔ̃nↄkũ, ǹyↄ̃ dↄ̃a vĩ,
asu sãngu ǹ pãalɛ ma yã́ɛo.
Ńsu pãkpa ↄ̃nↄio, a n dↄ̃́a,
ǹyↄ̃ yeaàzi, a ↄkunla.
Ɔ̃nↄkũ, ↄ̃mɛ yã́pii mi ũ,
dↄ̃a wɛɛlɛ ń àizɛɛ pↄ́ ń vĩ píio.*
Ǹ aà kṹ gbã́ugbãu, a n kã́fĩ,
didiwà ↄplapla, a n kpɛla.
Aↄ dɛ fùa maa ũ n miwa,
àↄ dɛnɛ kíafua gawide ũ.
 
10 Ma nɛ́, swã́kpa ma yã́i,
yã́pi da, n wɛ̃ni aↄ gbã̀a.
11 Ma ↄ̃nↄ zɛ́ ↄ̀lↄnɛ,
ma n da yãmaa zɛ́wa.
12 Tó ńlɛ táa'ou, pↄe a kpanɛo,
tó ńlɛ bàalɛu, ńyↄ̃ gɛ̃nalɛo.
13 Ǹyↄ̃ ma lɛdama kũa, ńsu gbaɛo,
didiwà gbãa, asa ↄ̃mɛ n wɛ̃ni ũ.
14 Ńsu vãikɛnaↄ zɛ́ sɛo,
ńsu tɛ gbɛ̃vãiↄ zɛ́io.
15 Ɛ̃nɛ́, ńsu namáo,
kɛ̃́má, ǹ n gɛa kɛ.
16 Tó aai vãi e kɛ̀o, aali i'oo,
tó aai gbɛ̃́ e kàaũo, i lí gɛ̃ ń wɛ́uo.
17 Asa vãikɛa mɛ́ ń pↄblea ũ,
gbɛ̃́ↄ wɛtãa mɛ́ ń imia ũ.
18 Gbɛ̃maaↄ zɛ́ dɛ lán gudↄlɛiawa,
a gupua ìↄ dɛdɛ lán ĩatɛ̃ dɛdɛawa.
19 Vãikɛnaↄ zɛ́ dɛ lán gusia níiniiwa,
aali pↄ́ pↄ́ tò wàlɛ gɛ̃nalɛ dↄ̃o.
 
20 Ma nɛ́, laaidↄ yã́piↄwa,
swã́sɛ ma yã'onɛi.
21 Ńsu kpá swã́ao,
ǹyↄ̃ kũa n sↄ̃u.
22 Asa a dɛ wɛ̃ni ũ gbɛ̃́ pↄ́ le kũ̀ↄnɛ,
a dɛ mɛ̀ bṹu aafia ũ.
23 Azaiasa laaidↄ n sↄ̃ yã́wa,
asa wɛ̃ni zĩ́na bↄ̀ sↄ̃ kĩ́iɛ.
24 Bↄ yãbɛ̃ɛ'oau,
mikɛ̃ yãkpaanla'oawa.
25 Wɛdↄ n aɛ,
gugwa n kuu súsu.
26 Zɛ́ sɛ́ súsu,
n yãkɛaↄ píi a bↄ maa.
27 Ńsu yɛɛlɛ ↄplaai ge zɛɛio,
ńsu gbápɛlɛ vãi zɛ́uo.
* 4:7 Mat 13.44-46 4:19 1Zãa 2.11 4:26 Ɛbɛ 12.13