5
Laaikaa káaluai
Ma nɛ́, laaidↄ ma ↄ̃nↄwa,
swã́kpa ǹ ma wɛzɛ̃ yãma,
kɛ́ ǹ e ǹyↄ̃ ku n dↄ̀ↄwa,
dↄ̃a iↄ ku n lɛ́u.
Káalua lɛgbɛ'i ìↄ na lán zↄ́wa,
ì ń gálɛ ń lɛ́ nao,
ãma gbɛzã ì kɛnɛ́ ĩ́i lán gↄ̃iwa,
ì ń zↄ̃ lán fɛ̃nda lɛna kpɛplawa.
Aà zɛ́ ì mipɛńnↄ gawa,
ì si ń gbɛ̃́ pↄ́ tɛaziↄ bɛdau.
Ìli làasookɛ wɛ̃ni zɛ́wao,
a dↄ̃ a zã zɛ́piwao.
 
Ma nɛ́, swã́sɛ ma yã́i sa,
ńsu gi ma lɛdamaio.
Pãalɛ nↄɛ bee taaɛ zã̀,
ńsu ǹ aà bɛ gãaɛ baa vĩo.
Ńsu ǹ n gbãakpa gbɛ̃pãlewao,
ńsu ǹ n wɛ̃ni kpa gbɛ̃́ pãsĩwao,
10 kɛ́ n àizɛɛↄ su gↄ̃ dãↄnɛo,
mɛ́ n zĩ ài su gↄ̃ ua pãledeↄnɛo.
11 Ńyↄ̃ aaukɛ n gↄↄ vlã́wa,
ńyↄ̃ ibaba, n yɛ̃̀ɛɛ a láa,
12 ní mɛ: Ma gi lɛdamai fá!
Ma sakaa totoau mɛ́ tò.
13 Mi lɛdamadeↄ yã'onɛ mao,
mi swã́sɛ ma yãdanɛdeↄzio.
14 Ma gↄ̃a wɛ̃na pↄ́ ũ míↄmiↄ
kɛ́ dṹnia ma e zã̀o.
 
15 Ǹ nzĩa ola imi,
zɛ ń nzĩa lↄ̀ↄ'io.
16 N nibↄna ibↄlɛa bàasi maae?
N í gufↄ̃ bↄa gãaɛ zɛvĩo.
17 To àↄ dɛ n na pↄ́ ũ ado,
asu àↄ dɛ gbɛ̃e pↄ́ ũo.
18 To Lua báaada n biapiu,
pↄnakɛ ń n ɛ̀waasogↄↄ nↄo.
19 N tue báasɛ̃de! N zↄ̃́tɛ̃n kɛfɛna!
To bↄ̃̀nↄbleaaànↄ lí kangu gↄↄpii,
ní aà báasɛ̃ nidɛ lá gu lɛ́ dↄ.
20 Ma nɛ́, bↄ́yãi ńyↄ̃ nↄ pãle nidɛi?
Bↄ́yãi ńyↄ̃ bↄ̃̀nↄble ń nↄ pↄsɛoi?
21 Gbɛ̃nazĩnaↄ yãkɛae ulɛa Diiɛo,
ìↄ zɛ́ pↄ́ aa sɛ̀ dↄ̃ píi.
22 Vãikɛna tàae ì aà kṹ,
aà duuna ì ba zuɛ̀.
23 Aà lɛdamamasai a aà kpa gai,
aà sↄũkɛ zↄ̃ↄ a aà sã́sã.