Bibeli Luayãtaalá Soũↄ 18

Zĩblea sáaukpaa

(2Sam 22.1-51)

1 Lɛ pↄ́ Dii zↄ̀blena Davidi sìɛ̀ gↄↄ pↄ́ à aà bↄ̀ Saulu ń aà ibɛɛ kĩniↄ ↄzĩ.

2 Má yenzi Dii,

ḿmɛ ń ma gbãa ũ.

3 Lua mɛ́ ma gbɛsi ũ,

mi naaàzi,

ma Lua mɛ́ ma zɛgikĩi ũ,

ì ma misi.

A dɛ ma sɛ̀ngbao ũ,

má aà náai vĩ,

a dɛ ma suaban gbãa ũ,

ì ma dↄ̃́a.

4 Dii kà wà aà sáaukpa.

Mi lɛzuaàzi,

ì ma bↄ ma ibɛɛↄ ↄzĩ.

5 Gó kpàlɛmanↄ,

kaalɛ swa lɛ́ ma ble.

6 Mia baↄ galakpàmɛɛ,

ga baikpàmɛɛ ma aɛ.

7 Ma yeelɛa guu màa ma Dii sìsi,

ma lɛzù ma Luazi,

ↄ̃ à ma lↄↄ mà za a bɛ,

ma wii kàwà, à gɛ̃̀ aà swã́u.

8 Tↄↄlɛ lùalua à zĩ̀azĩa,

gbɛ̀sĩsĩↄ dèedee ń zĩ́nau,

aa lùalua kɛ́ aà pↄ pà yã́i.

9 Súɛlɛ bↄ̀ aà níu,

tɛ́ pↄ́ ì kṹmá bↄ̀ aà lɛ́u,

a yↄ̃ↄ lɛ́ pipi aà aɛ.

10 À gu kɛ̃̀aa musu à pìla,

lou sìsi aà gbá zíɛ.

11 Àlɛ vua dia malaika gã̀sĩade kpɛ,

àlɛ yàakpa ń ĩ́anao.

12 À gusia kù azĩala,

à luabɛsiana kɛ̀ a kúkĩi ũ.

13 Lousisia dↄ̀aa aà gawi pílɛaɛ,

lougbɛ kwɛ̀, lou pìlɛpilɛ pãsĩpãsĩ.

14 Dii Musude pàla za musu,

aà lↄↄ dↄ louvĩa ũ.

15 À ka fã̀ ma ibɛɛↄgu à ń fãaa,

Lua sùmá à ń yá.

16 Kɛ́ n palamá Dii,

ísia tↄↄlɛ bↄ̀ gupuau,

kɛ́ n pↄbↄ̀ n níu,

dṹnia zĩ́na bↄ̀ puizi.

17 À ↄbↄ̀ za musu à ma kũ,

à ma bↄ ísiu.

18 À ma si ma ibɛɛ gbãawa

ń ma wɛ̀lɛ pↄ́ an gbãa dɛmalaↄ.

19 Aa ã̀naa ma wɛ̃nakɛgↄↄ,

ↄ̃ Dii zɛ̀manↄ.

20 À ma bↄ à ma gba dɛ̀ɛpookĩi,

à ma mìsi kɛ́ a yemazi yã́i.

21 Dii yãkɛ̀mɛɛ ma nↄ̀sɛmaa lɛ́u,

à fĩabòmɛɛ ma gbãsĩsai lɛ́u.

22 Asa má Dii yãdilɛaↄ kũa,

mi vãikɛ ma a Lua tò weo.

23 Aà ikoyãↄ ìↄ dↄaaamɛɛ,

mi bↄ yã́ pↄ́ a dìlɛↄ kpɛo.

24 Ma kua tàae vĩ Diiɛo,

má azĩa kũa duunasai.

25 Dii fĩabòmɛɛ ma nↄ̀sɛmaa lɛ́u,

asa a è má kú gbãsĩsaiɛ.

26 Ń náai vĩ náaideↄnɛ,

tàaesaiden n ũ tàaesaideↄnɛ.

27 Ń wásawasa gbɛ̃́ wásawasaↄnɛ,

ãma ni kↄ̃nikɛ gbɛ̃́ dↄ̀ↄsaiↄnɛ.

28 Ni zĩabusanaↄ suaba,

ni gbɛ̃́ pↄ́ aaì ńzĩa sɛ lɛsĩↄ busa.

29 Dii, ni ma filia tɛfɛlɛ,

ma Lua, ni ma gusia lilɛ gupua ũ.

30 Ń n gbãao má fↄ̃ kuadi kaawa,

ń ma Lua dↄnlɛo má fↄ̃ vĩ gĩa.

31 Luapi sↄ̃, aà yãkɛa bↄ̀lɛi.

Dii yã́ sãa vĩo.

A dɛ sɛ̀ngbao ũ gbɛ̃́ pↄ́ nàaziↄnɛ.

32 Dii bàasio, démɛ Lua ũi?

Wá Lua bàasio, démɛ gbɛsi ũi?

33 Lua mɛ́ ì ma gba gbãa,

ↄ̃mɛ ì zɛpoomɛɛ súsu.

34 Ì to ma wá nakũ lán tuewa,

ì to màↄ bɛ bùsu gulɛsĩↄ musu.

35 Ì zĩkaa dadamɛɛ

e ma gã̀sĩ fↄ̃ mↄgotɛ̃ sá gá.

36 Ni n zĩblesɛ̀ngbao kpaa,

ń ma kũa ń n ↄplaao,

ni naalɛ ǹ ma tↄbↄ.

37 Ni ma zɛ́ yàasa kũmɛɛ,

ↄ̃ ma gbá lí gbãlɛo.

38 Ma pɛlɛ ma wɛ̀lɛↄzi ma ń kũkũ,

mi kpɛkpao e ma gɛ ń dɛdɛò.

39 Ma ń wiwi, aai e fɛ̀lɛo,

aa kwɛ̀ gↄ̃̀ kálɛa ma gbá zíɛ.

40 N ma gba gbãa, ma zĩkàò,

ń tò ma ibɛɛↄ mikpàa.

41 Ń tò ma wɛ̀lɛↄ kpɛkpà,

ↄ̃ ma a zangudepiↄ mìdɛ.

42 Aa wiilɛ̀, gbɛ̃e i ń suabao,

aa lɛzù Diizi, i yãmamáo.

43 Ma ń kɛ́ búɛbuɛ

lán luutɛ̃ pↄ́ ĩ́ana sɛ̀wa,

ma táa'òmá lán zɛ́ guu pɛ̀lɛawa.

44 N ma bↄ gbɛ̃́ pↄ́ fɛ̀lɛmanↄↄ ↄzĩ,

n ma kɛ buiↄ mide ũ.

Gbɛ̃́ pↄ́ má ń dↄ̃oↄ lɛ́ zↄblemɛɛ.

45 Bui zĩ̀loↄ ì vlãnaumɛɛ,

tó aa ma yãmà, aaì misiilɛmɛɛ.

46 Buipãleↄ kúsu ì kwɛ́,

aaì bↄ ń zɛgikĩiↄu ń lualuao.

47 Dii ku! Báaaden ma gbɛsi ũ!

Wà Lua ma Suabana tↄbↄ.

48 Lua mɛ́ ì tↄsimɛɛ,

ì buiↄ totomɛɛ.

49 Ń tò ma pili ma ibɛɛↄwa,

n ma gba gbãa dɛ ma wɛ̀lɛↄla,

n ma bↄ gbɛ̃́ pãsĩↄ ↄzĩ.

50 A yã́i má n sáaukpa buiↄnɛ,

má n táasilɛ, Dii.*

51 Dii ì zĩ̀ zↄ̃ↄ ble kía pↄ́ á sɛ̀ɛ,

ì gbɛ̃kɛkɛ kía pↄ́ á kpàpiɛ,

ma Davidi ń ma buiↄ e gↄↄpii.