19
Luabɛ gawi ń Lua yã gawio
Davidi lɛ.
Musu ì Lua gawi bↄ gupuau,
bàluma pↄ́ↄ ì aà zĩ ↄlↄnɛ́.
Ìↄ yãdanɛ́ lá gu lɛ́ dↄ,
ì dↄ̃a kpámá gwã́ ń gwã́o.
Ìli yã'oo, aà yã'oa bui kuo,
wìli a kĩ́a mao.
Aà lↄↄ ì gɛ́ dṹnia guu píi,
aà yã'oa ì gɛ́ e tↄↄlɛ lɛ́wa.*
 
Lua kpɛdↄ̀ ĩatɛ̃ɛ we,
ì bↄ kpɛ́u à bilɛ lán nↄsɛnawa,
ì fɛlɛ ń táo ń pↄnao lán nɛgↄ̃nawa.
Ì fɛlɛ luabɛ lɛ́la,
ì pãa gɛ́ e a lɛ́le,
pↄe líↄ ulɛa a pusuio.
 
Dii ikoyã paɛa,
ì ń nↄ̀sɛ níninɛ́.
Dii yã́ náai vĩ,
ì lɛda ↄ̃nↄsaideↄwa.
Dii ì ↄtona dↄnɛ́ súsu,
ì ń pↄ kɛ na.
Dii yãdilɛaↄ gbãsĩ vĩo,
ì ń oa weenɛ́.
10 Misiilɛa Diiɛ zɛ́pi wɛbↄa,
waↄ tɛi gↄↄpii,
Dii yã́kpalɛkɛa sĩana vĩ,
yã́pi ìↄ maa wásawasa.
11 Aà yãmaa dɛ vuaa, baa vua maa,
a na dɛ zↄ́'ia, baa zↄ́ bùsu.
12 Ni lɛda mapi n zↄ̀blenawa,
gbɛ̃́ pↄ́ n yã́ kũa ài ìↄ zↄ̃ↄ.
 
13 Démɛ a fↄ̃ yã́ pↄ́ álɛ zãwàↄ dↄ̃i?
Sùuukɛmanↄ ń ma tàae pↄ́ ulɛaↄ.
14 Ńsu to mapi n zↄ̀blena dↄ́ɛnnↄo,
duuna su gbãableao,
míↄ kú wásawasa tàae zↄ̃ↄ sai.
 
15 To yã́ pↄ́ lɛ́ bↄ ma lɛ́u
ń làasoo pↄ́ kú ma sↄ̃uo kangu
Dii, ma gbɛsi, ma Suabana.
* 19:5 Lom 10.18