Bibeli Luayãtaalá Soũↄ 55

55

Wabikɛa Luawa kua ĩadama guu

1 Davidi lɛ. Wì sí ń kúuↄɛ.

2 Lua, ma wabikɛama ma,

ńsu láka ma yã́ao.

3 Swã́sɛ ma yã́i, ní wea,

ma làasoo lìaa ma gↄ̃ bíli guu,

4 ma ibɛɛↄ yã'oa ń gbɛ̃vãiↄ wɛbiiaao yã́i.

Asa aalɛ taasi daaɛ,

aa ma kũa ń kpɛ̃nɛo.

5 Sↄ̃ kɛ̃̀magu,

ga tòlobi zùmagu.

6 Vĩa ma kũ ń lualuaao,

iwãa pãsĩ kà ma pↄa.

7 Tó má gã̀sĩa vĩ lán felenawa,

má vua gɛ́ kã́maboiɛ.

8 Má bàalɛ gɛ́ zã̀zãɛ,

mí gɛ zↄ̃lɛ guwaiwaiu.

9 Má wã gɛ ulɛkĩi wɛɛlɛ,

kɛ́ zàa'ĩan gbãa su ma leo yã́i.

10 Ǹ ń fu Dii, ǹ ń yã́ yãalɛnɛ́,

asa má è zↄa ń sòleo kú wá wɛ̃́lɛuɛ.

11 Aaì kpálɛkɛ bĩ́i musu fãanɛ ń gwãasĩnao,

yãvãi ń yã́ gbãao di wɛ̃́lɛpiuɛ.

12 Gbɛ̃dɛdɛa yã́ mɛ́ wɛ̃́lɛpi pà,

gbãamↄanɛ́ ń mↄafilio lí kɛ̃́lɛ a gãaɛo.

13 Tó ibɛɛ mɛ́ lɛ́ ma wɛ yãa, a sã̀ↄ,

tó ma wɛ̀lɛ mɛ́ fɛ̀lɛmanↄ, má ulɛɛ̀ɛ.

14 É'e mpi! N gbɛ̃́ pↄ́ wá sáa,

ma gbɛ̃do pↄ́ dɛ ma gbɛ̃na ũɛa?

15 Wi faaibo ń kↄ̃o yãa nana,

wiↄ tɛkↄ̃i dasi guu Lua uaa?

16 Ga a zãmakɛ ma ibɛɛↄnɛ,

aai si bɛdau ń gbãagↄↄ,

asa vãi zↄ̃lɛkĩi è ń guuɛ.

17 Mapi sↄ̃ mi lɛzu Luazi,

ↄ̃ Dii ì ma suaba.

18 Kↄↄ, fãanɛ ń oosio

miↄ a yã'ↄ̃maↄ bↄlɛɛ̀ ń aauo,

ↄ̃ ì ma yãma.

19 Baa kɛ́ ma ibɛɛↄ dasi, aali ma leo,

Lua ì ma bↄ sòleu aafia.

20 Luapi ìↄ zↄ̃lɛa báawa gↄↄpiiɛ,

a ma yãma, i widamá.

Aali nↄ̀sɛlilɛo, aaliↄ aà vĩa vĩo.

21 Gbɛ̃́pi ↄ wãa ń a gbɛ̃́ↄ,

à bↄ̀ lɛdoũ pↄ́ aa kɛ̀ ń kↄ̃o kpɛ.

22 Ì na o ń wáa lán zↄ́wa,

ãma sòle làasoo mɛ́ kú aà sↄ̃u.

Ì lɛnakasanɛ́ páipai,

ãma yaalↄma ba da bↄ̀ↄuɛ.

23 Ɔzↄ̃ Diiɛ n yã'ↄ̃maↄi, iↄ n kũa,*

ìli tó gbɛ̃maa fù bauo.

24 Gbɛ̃dɛna náaisaidepiↄ ń gↄↄ guo leo.

Lua, ńyↄ̃ to aa si bɛda gbã́ou.

Mapi sↄ̃ máↄ n náai vĩ.

* 55:23 1Piɛ 5.7