Bibeli Luayãtaalá Soũↄ 56

56

Zĩakpaa Luawa

1 Lɛ pↄ́ Davidi dà gↄↄ pↄ́ Filitɛ̃ↄ aà kũ̀ Gata.*

2 Ma wɛ̃nagwa Lua, wàlɛ pɛa,

wìↄ zĩkamanↄ wàↄ ĩadaa gↄↄpiiɛ.

3 Ma kpàkpanapiↄ ìↄ pɛa gↄↄpiiɛ,

an wala yã́i aalɛ zĩkaimanↄ.

4 Tó vĩa lɛ́ ma kṹ, má n náai vĩ.

5 Má Lua táasilɛ yã́ pↄ́ a ò yã́i,

má Lua náai vĩ, má vĩakɛo.

Bↄ́ gbɛ̃nazĩna a fↄ̃ kɛmɛɛi?

6 Aaìↄ ma yã́ kpaanlabo gↄↄpiiɛ,

aaì vãi lɛkpaaĩmazi.

7 Aaì sòle da, aaì ulɛmɛɛ,

aaì ma kpákpa, aaìↄ ye ma dɛ.

8 Lua, ńsu to an gbɛ̃e bↄo,

gbɛ̃́piↄ nɛ ń pↄkũmao.

9 Ma bàalɛ̀ liaaliaaaↄ yãda,

ma wɛ́'ika n tùuna guu.

A ku n taala guuo lé?

10 Tó ma lɛzù Luazi,

ma ibɛɛↄ kpɛkpa,

míↄ dↄ̃ kɛ́ à yãsìmanↄ.

11 Má Lua táasilɛ yã́ pↄ́ a ò yã́i,

ao, má Dii táasilɛ yã́pi oa yã́i.

12 Má Lua náai vĩ, má vĩakɛo.

Bↄ́ gbɛ̃nazĩna a fↄ̃ kɛmɛɛi?

13 Lua, má lɛ́ pↄ́ má kɛ̀maↄ fĩabo,

má sáaukpa sa'oma.

14 Asa n ma si gawa,

n ma gbá vĩ̀ lí miↄn pãsĩa,

kɛ́ màↄ bɛnnↄ gupua pↄ́ ì wɛ̃ni kpámáu.

* 56:1 1Sam 21.13-15