22
Yerusɑlɛmugibun dɑɑ kɔ̃sɑ
1 Yinni Gusunɔ u geruɑ u nɛɛ,
2 wunɛ tɔnun bii, ɑ sɔɔru koowo ɑ kɑ Yerusɑlɛmugibu siri be bɑ sɑ̃ɑ tɔn gowobu mi. A ku sikɑ ko. A de bu bwisiku ben dɑɑ kɔ̃sɑ ye bɑ kuɑn sɔ̃.
3 A bu sɔ̃ɔwɔ ɑ nɛɛ, nɛ, Yinni Gusunɔwɑ nɑ yeni geruɑ. Wee bɑ tɔmbu goomɔ. Yerɑ yɑ koo de ben wuu Yerusɑlɛmun tii yu kɑm ko. Wee bɑ bwɑ̃ɑrokunu sekumɔ mɑ bɑ ben tem disi doke.
4 Tɔn be bɑ go mi, ben tɑɑrɛwɑ. Bɑ tii disi doke ye bɑ kɑ tii bwɑ̃ɑrokunu kuɑ. Nge mɛyɑ bɑ kɑ ben wɑ̃ɑrun tɔ̃nu kɑwɑ. Yen sɔ̃nɑ kon de bwese tukunu nu bu yɛ̃ɛ.
5 Be bɑ tomɑ kɑ be bɑ wɑ̃ɑ turuku bɑ koo bu yɛ̃ɛ yèn sɔ̃ ben wuu Yerusɑlɛmun yĩsirɑ bɛɛrɛ biɑ, mɑ yɑ burisire.
6 Wee be, Isirelibɑn sinɑmbu bɑ tɔmbu dɑm dɔremɔ bɑ goomɔ Yerusɑlɛmu ye sɔɔ.
7 Mɑ yen tɔmbu bɑ ben mɛrobu kɑ ben tundobu gɛmɑ. Gɑbɑ sɔbu dɑm dɔremɔ. Gɑbɑ mɑɑ gobekubɑ kɑ gɔminibu tɑki dimɔ.
8 Tɔmbu bɑ ǹ nɛn sɑ̃ɑ yeru dɑɑbu kĩ. Bɑ ǹ mɑɑ kĩ bu nɛn tɔ̃ɔ wɛ̃rɑrugiru mɛm nɔɔwɑ.
9 Gɑbɑ wɑ̃ɑ bɑ ben winsim kɔ̃sɑ gerumɔ bu kɑ nùn go. Mɛyɑ mɑɑ tɔmbu bɑ rɑ bũnun dĩɑnu di gungunun wɔllɔ kpɑ bɑ n sekuru sɑri kookoosu mɔ̀.
10 Gɑbu bɑ wɑ̃ɑ bɑ rɑ kɑ ben tundon kurɔbu kpunɛ. Gɑbu bɑ rɑ mɑm tɔn kurɔbu gɑbe sɑnɑm mɛ bɑ yɑsɑ mɔ̀.
11 Gɑbɑ mɑɑ wɑ̃ɑ bɑ sɑkɑrɑru mɔ̀ kɑ ben bensim kurɔbu, ǹ kun mɛ kɑ ben biin kurɔ ǹ kun mɛ kɑ ben sesu tundo turosibu.
12 Gɑbɑ mɑɑ wɑ̃ɑ be bɑ rɑ wure bu gobi mwɑ bu kɑ tɔmbu go. Gɑbɑ wɑ̃ɑ bɑ rɑ ɑre bɛkɛ kɑsu bɑ̀ n ben winsim gobi bɔkurɑ. Gɑbɑ wɑ̃ɑ be bɑ ben winsim tɑki dimɔ bu kɑ gobi ko. Mɑ bɑ nɛ, Yinni Gusunɔ duɑri mɑm mɑm. Nɛ, Yinni Gusunɔwɑ nɑ yeni geruɑ.
13 Wee kon bu so be, Yerusɑlɛmugibu ben gbɛnɑ kɑ tɔn be bɑ gon sɔ̃.
14 Nɑ̀ n bu wɔri yen tɔ̃ɔ te, bɑ ǹ ko n mɑɑ dɑm kɑ mwiɑ mɔ. Nɛ, Yinni Gusunɔwɑ nɑ yeni geruɑ. Yɑ koo mɑɑ koorɑ.
15 Kon de bu yɑrinɑ bɑ n wɑ̃ɑ bwese tukunu sɔɔ. Kpɑ bu dɑ bɑɑmɑ. Nge mɛyɑ kon kɑ ben disi yi wunɑ Yerusɑlɛmu ye sɔɔn di.
16 Bwese ni nu tie, nu koo bu gɛm. Sɑɑ ye sɔɔ, bɑ koo giɑ mɑ nɛnɑ nɑ sɑ̃ɑ Yinni Gusunɔ.
17 Yen biru, Yinni Gusunɔ u mɑɑ nɛɛ,
18 tɔnun bii, wee nɛn nɔni sɔɔ Isirelibɑ bɑ sɑ̃ɑ nge sii bisu ǹ kun mɛ nge sii gɑndu ǹ kun mɛ nge sii kpikisu ǹ kun mɛ nge pɛɛrum ǹ kun mɛ nge sii wɔ̃kusu si bɑ doke sɔwɑtiɑ sɔɔ bu kɑ su sɔwɑ. Bɑ sɑ̃ɑwɑ nge sii geesun bisu.
19 Yen sɔ̃nɑ nɛ, Yinni Gusunɔ nɑ nɛɛ, kon bu mɛnnɑ Yerusɑlɛmu sɔɔ.
20 Nge mɛ bɑ rɑ sii geesu kɑ sii gɑndu kɑ sii wɔ̃kusu kɑ sii kpikisu kɑ sii pɛɛrum mɛnnɛ bu doke sɔwɑtiɑ sɔɔ, kpɑ bu dɔ̃ɔ doke su kɑ yɑndɑ, nge mɛyɑ kon bu mɛnnɑ nɛn mɔru sɔɔ, kpɑ n bu deri bu yɑndɑ.
21 Kon bu mɛnnɑ sube teeru sɔɔ, kpɑ n bu kpɛ̃ɛ nɛn mɔrun sundu sɔɔ kpɑ bu yɑndɑ nge sisu.
22 Nge mɛ sii geesu su rɑ yɑnde dɔ̃ɔ sɔɔ, nge mɛyɑ ben tii bɑ koo yɑndɑ Yerusɑlɛmun suunu sɔɔ. Sɑɑ yerɑ bɑ koo giɑ mɑ nɑ kɑ bu mɔru seewɑ.
23 Yinni Gusunɔ u mɑɑ geruɑ u nɛɛ,
24 tɔnun bii, ɑ Yerusɑlɛmugibu sɔ̃ɔwɔ ɑ nɛɛ, ben tem mu sɑ̃ɑwɑ nge mi gurɑ ku rɑ nɛ. Yen sɔ̃, kon de mu kɑm ko nɛn mɔrun sɑɑ sɔɔ.
25 Ben sɔmɔbu bɑ sɑ̃ɑwɑ nge gbee sinɑn si su kukirimɔ sɑnɑm mɛ su yɑɑ wɑ su sɛ̃re. Domi bɑ tɔmbu goomɔ. Mɑ bɑ gɑbun gobi kɑ dukiɑ wɔrɑmɔ. Mɑ bɑ derimɔ kurɔ gɔminibu bɑ dɑbiɑmɔ.
26 Ben yɑ̃ku kowobu bɑ ku rɑ nɛn woodɑbɑ mɛm nɔɔwɛ. Bɑ ku rɑ mɑɑ nɛn sɑ̃ɑ yeru bɛɛrɛ wɛ̃. Bɑ ku rɑ wunɑnɛ ye yɑ sɑ̃ɑ nɛgiɑ kɑ ye yɑ ǹ sɑ̃ɑ nɛgiɑ. Bɑ ku rɑ mɑɑ tɔmbu sɔ̃ɔsi ye yɑ dɛɛre kɑ ye yɑ ǹ dɛɛre. Bɑ ku rɑ mɑm nɛn tɔ̃ɔ wɛ̃rɑrugii te mɛm nɔɔwɛ. Ye kpuro sɔɔrɑ bɑ ku rɑ mɑn bɛɛrɛ wɛ̃.
27 Ben sinɑmbu bɑ sɑ̃ɑwɑ nge gbeeku yɛɛ. Domi bɑ tɔmbu goomɔ bu wɑ bu kɑ ben binɛ suresiɑ.
28 Ben sɔmɔbu bɑ ye kpuro wukirimɔ nge gɑ̃ɑ ni bɑ soo tɛɛni. Wee bɑ bu kɑ̃si weesuginu kɑ gɑri weesugii sɔ̃ɔmɔ. Bɑ gerumɔ bɑ mɔ̀, gɑri yi bɑ tɔmbu sɔ̃ɔmɔ yi weewɑ nɛn min di. N deemɑ nɛ, Yinni Gusunɔ nɑ ǹ bu gɑ̃ɑnu sɔ̃ɔwɑ.
29 Tem mɛn tɔmbu bɑ dɑm dɔrenɑmɔ bɑ gbɛnimɔ bɑ sɑ̃ɑrobu kɑ be bɑ ǹ dɑm mɔ tɑɑremɔ. Mɑ bɑ sɔbu tɑki dimɔ bɑ gem birɑmɔ.
30 Wee nɑ goo kɑsu ben suunu sɔɔ u gbɑ̃rɑru bɑni u kɑ sikerenɑ, ǹ kun mɛ u yɔ̃rɑ kururu mi, u kɑ tem mɛ yinɑ n ku kɑ mu kɑm koosiɑ. Adɑmɑ nɑ ǹ goo wɑ.
31 Kon bu mɔru seesiwɑ. Nɑ ǹ yɔ̃rɑmɔ sere nɛn mɔru yu kɑ kpe. Kon de bu bu ben dɑɑn ɑre kɔsie. Nɛ, Yinni Gusunɔwɑ nɑ yeni geruɑ.