23
Sɑmɑri yɑ sɑ̃ɑ nge kurɔ tɑnɔ
1 Yinni Gusunɔ u nɛɛ,
2 tɔnun bii, kurɔbu yiruwɑ bɑ wɑ̃ɑ be kpuro mɛro turo.
3 Mɑ bɑ dɑ bɑ kurɔ tɑnɑru di Egibitiɔ ben wɔndiɑru sɔɔ. Miyɑ bɑ ben bwɑ̃su sɛ̃kurɑ. Bɑ ben toronu bɔkɑsi.
4 Mɔɔn yĩsirɑ Oholɑ. Wɔnɔgirɑ mɑɑ Oholibɑ. Oholɑ u sɑ̃ɑwɑ Sɑmɑri. Oholibɑ u mɑɑ sɑ̃ɑ Yerusɑlɛmu. Nɑ bu suɑ kurɔbu mɑ bɑ mɑn bii tɔn durɔbu kɑ tɔn kurɔbu mɑruɑ.
5 Oholɑ wi, u kuɑ nɑɑnɛ sɑrirugii, u kurɔ tɑnɑru wɔri. Mɑ u Asirigibu kĩɑ too too be bɑ wɑ̃ɑ win bɔkuɔ.
6 Tɔn be, bɑ yɑ̃ɑ wunɔmginu doke domi bɑ sɑ̃ɑwɑ tem yɛ̃robu kɑ siri kowobu. Bɑ sɑ̃ɑwɑ ɑluwɑɑsi durɔ burɑbu. Mɑ bɑ mɑɑsɔru yɛ̃.
7 Beyɑ Oholɑ u tii wɛ̃. Be bɑ sɑ̃ɑ Asirin wirugibu mi, be kpurowɑ u kɑ sɑkɑrɑru kuɑ. U bu kĩɑ too sere u ben bũnu sɑ̃wɑ.
8 U ǹ win sɑkɑrɑ te deri te u rɑɑ kuɑ Egibitiɔ. Domi sɑnɑm mɛ u sɑ̃ɑ wɔndiɑ, bɑ rɑ n kɑ nùn kpunɑmɔ bɑ n win bwɑ̃su bɑbirimɔ, mɑ bɑ nùn sɑkɑrɑru kpɛ̃ɛ.
9 Yen sɔ̃nɑ nɑ nùn deri win kĩnɑsi Asirigii ben nɔmuɔ.
10 Mɑ bɑ win yɑ̃nu potirɑ bɑ nùn yɔ̃su tereru. Mɑ bɑ win bibu gurɑ bɑ kɑ doonɑ. Yen biru bɑ win tii go kɑ tɑkobi. U sɛɛyɑsiɑbu wɑ bi bu kuɑ seedɑ tɔn kurɔ be bɑ tien sɔ̃.
Yerusɑlɛmu yɑ sɑkɑrɑru kuɑ
11 Yinni Gusunɔ u mɑɑ nɛɛ, Oholɑn wɔnɔ Oholibɑ u win mɔɔn sɑkɑrɑ kookoo si wɑ. Kɑ mɛ, wigirɑ tɑ boyɑ sere tɑ ǹ kɑ nɔɔ gerurɔ.
12 Mɑ win tii u Asirin tem yɛ̃robu kĩɑ kɑ ben siri kowobu. Tɔn be, bɑ sɑ̃ɑwɑ ɑluwɑɑsi durɔ burɑbu. Bɑ yɑ̃ɑ burɑnu doke, bɑ mɑɑ mɑɑsɔru yɛ̃.
13 Nɛ, Yinni Gusunɔ nɑ wɑ mɑ Oholibɑn tii u disi mɔ. Be kpuro swɑɑ tiɑ yerɑ bɑ swĩi mi.
14 Oholibɑ wi, u mɑm kuɑ ye yɑ sɑkɑrɑru kere. Sɔ̃ɔ teeru u tɔmbun weenɑsibu wɑ bɑ yorusi gɑni sɔɔ. Bɑ bu kuɑwɑ kɑ gɑ̃ɑ swɑ̃ɑnu. Tɔn be, bɑ sɑ̃ɑwɑ Bɑbilonigibu.
15 Bɑ kpɑki sɛ̃ke pɔrɑɔ, mɑ bɑ dɑwɑni nɔni bwese bwesekɑgii bɔkuɑ wirɔ. Be kpuro bɑ sɑ̃ɑwɑ nge sinɑmbu bɑ kɑ Bɑbilonigibu weenɛ.
16 Ye u bu wɑ mɛ, yerɑ u bu kĩɑ sere u sɔmɔbu gɔrɑ Bɑbiloni mi.
17 Mɑ bɑ nɑ win mi bɑ kɑ nùn kpunɑ bɑ nùn sɑkɑrɑru kpɛ̃ɛ sere win bwɛ̃rɑ yɔ̃ɔwɑ ben min di.
18 U win sɑkɑrɑ te sɔ̃ɔsi bɑtumɑ sɔɔ. Mɑ nɛn gɔ̃ru gɑ doonɑ win min di nge mɛ gɑ rɑɑ doonɑ win mɔɔn min di.
19 Kɑ mɛ, u sɑkɑrɑ te mɔ̀ u dɔɔwɑ nge mɛ u kuɑ win wɔndiɑrun sɑɑ sɔɔ Egibitiɔ,
20 mi u tii kurɔ dɑmɑ kowobu wɛ̃ be bɑ rɑ n kurɔbu yɔɔmɔ nge kɛtɛkunu ǹ kun mɛ nge dumi.
Yerusɑlɛmun sɛɛyɑsiɑbu
21 Yinni Gusunɔ u mɑɑ nɛɛ, Oholibɑ, wee ɑ mɑɑ wure ɑ wurɑ sekuru sɑriru sɔɔ te ɑ rɑɑ kuɑ wunɛn wɔndiɑru sɔɔ sɑnɑm mɛ ɑ derɑ Egibitigibu bɑ wunɛn bwɑ̃su bɑburɑ.
22 Wee ye nɛ, Yinni Gusunɔ nɑ gerumɔ. Kon de wunɛn yellun kĩnɑsi be ɑ tusɑ mi tɛ̃ bu nun seesi kpɑ bu nɑ bɑɑmɑ kpuron di bu nun wɔri.
23 Beyɑ Bɑbilonigibu kɑ Pekodigibu kɑ Koɑgibu kɑ sere mɑɑ Asirigibu. Ben ɑluwɑɑsi durɔ burɔ be kɑ ben tem yɛ̃robu kɑ ben sinɑmbu kɑ ben tɑbu durɔbu be kpuro bɑ yɔɔwɑ dumin wɔllɔ.
24 Wee bɑ nun wɔrim wee bɑ tɑbu yɑ̃nu nɛni kɑ tɑbu kɛkɛbɑ yi dumi gɑwe. Bɑ mɛnnɑ bɑ dɑbi bɑ kɑ nun sikerenɛ yɑm kpuro. Be kpuro bɑ sii furɔsu doke mɑ bɑ tɛrɛnu nɛni. Kon bu siribu nɔmu sɔndiɑ kpɑ bu nun siri kɑ ben woodɑ.
25 Kon nun mɔru seesi kpɑ n de bu nun wɔri kɑ dɑm. Bɑ koo wunɛn wɛ̃ru kɑ wunɛn swɑsu bɔɔri kpɑ bu nun dɑkurɑ tɑbu sɔɔ, kpɑ bu wunɛn bibu gurɑ. Be bɑ tiɑrɑ kpɑ bu be dɔ̃ɔ mɛni.
26 Bɑ koo wunɛn yɑ̃nu gurɑ kpɑ bu wunɛn burɑ yɑ̃nu wunɑ.
27 Kon wunɛn sekuru sɑriru kpeesiɑ te ɑ mɔ̀ sɑɑ yee yellun di Egibitiɔ. Wunɛn nɔni kun mɑɑ wurɔ ben mi giɑ. A ǹ mɑɑ bu yɑɑyɑmɔ.
28 Nɛ, Yinni Gusunɔ nɑ nɛɛ, wee nɑ nun bɛri be ɑ tusɑn nɔmuɔ, bèn mi wunɛn bwɛ̃rɑ kun mɑɑ wɑ̃ɑ.
29 Bɑ koo nun nɔni sɔ̃ tusirun sɔ̃ kpɑ bu wunɛn dukiɑ gurɑ bu nun deri kɑ nɔm dirɑ bɑsi mɑm mɑm. Wunɛn sekuru sɑriru kɑ wunɛn sɑkɑrɑ te, tɑ koo sɔ̃ɔsirɑ.
30 Ye kpurowɑ yɑ koo nun deemɑ domi ɑ kɑ bwese tukunu sɑkɑrɑru kuɑ mɑ ɑ tii disi doke bũu sɑ̃ɑrun swɑɑ sɔɔ.
31 A wunɛn mɔɔn yirɑ swĩi. Yen sɔ̃nɑ kon de ɑ nɛn mɔrun nɔrɑ ye nɔ nge wi.
32 Nɛ, Yinni Gusunɔ nɑ mɑɑ nɛɛ,
kɑɑ kɑ nɔrɑ ye nɔ
ye wunɛn mɔɔ u kɑ nɔrɑ.
Nɔrɑ ye, yɑ yɑsu, yɑ mɑɑ dɛ̃u.
Yerɑ yɑ koo de bu nun yɛ̃ɛ
bu yɑɑkoru koosi.
Nɔrɑ ye, yɑ nɛn mɔru yibɑwɑ sere kɑ nɔɔwɔ.
33 Yɑ koo nun go nge tɑm
kpɑ yu nun nɔni sɔ̃.
Nɔrɑ ye, yɑ rɑ kɑ nuku sɑnkirɑnu kɑ kɑm kobu nɛwɑ.
Yerɑ wunɛn mɔɔ Sɑmɑri u nɔrɑ.
34 Kɑɑ ye nɔwɑ mɑm mɑm
sere ɑ ye kɔrɑ kɑ donnu
kpɑ ɑ wunɛn tororu mɛɛrɑ ko kɑ yen kɛ̃ki.
Nɛ, Yinni Gusunɔwɑ nɑ yeni geruɑ.
35 Wee ɑ mɑn duɑri mɑ ɑ mɑn deri. Tɛ̃, ɑ wunɛn sekuru sɑrirun ɑre sɔɔwo.
Gusunɔ u Yerusɑlɛmu
kɑ Sɑmɑri tɑɑrɛ wɛ̃
36 Yinni Gusunɔ u mɑɑ mɑn sɔ̃ɔwɑ u nɛɛ, tɔnun bii, ɑ Oholɑ kɑ Oholibɑ sirio. A bu sɔ̃ɔwɔ kɔ̃sɑ ye bɑ kuɑ.
37 Wee bɑ sɑ̃ɑwɑ kurɔ sɑkɑrɑ kowobu mɑ ben nɔmɑ yɛm yibɑ. Domi bɑ dɑ bɑ bũnu sɑ̃ɑmɔ mɑ bɑ kɑ ben bibu yɑ̃ku dɔ̃ɔ mwɑɑrɑruginu mɔ̀. N deemɑ nɛnɑ bɑ rɑɑ bii be wɛ̃.
38 Wee ye bɑ mɑɑ mɑn kuɑ. Bɑ nɛn sɑ̃ɑ yeru disi doke, mɑ bɑ ǹ nɛn tɔ̃ɔ wɛ̃rɑrugirun woodɑ mɛm nɔɔwɛ.
39 Domi dɔmɑ te bɑ duɑ nɛn sɑ̃ɑ yerɔ bɑ kɑ ben bibu bũu yɑ̃kunu kuɑ mɑ bɑ tu disi doke. Yenin bweserɑ bɑ kuɑ nɛn sɑ̃ɑ yerun sɔɔwɔ.
40 Yen biru, bɑ mɑɑ sɔmɔbu gɔrɑ bu bu durɔbu kɑsuɑmɑ sɑɑ tontonden di. Mɑ durɔ be, bɑ seemɑ bɑ nɑ. Sɑɑ yerɑ bɑ woburɑ mɑ bɑ kiro doke mɑ bɑ ben burɑ yɑ̃nu doke durɔ ben sɔ̃.
41 Mɑ bɑ dɑ bɑ sinɑ kitɑ burɑnu sɔɔ. Tɑbulu yɑ yii ben wuswɑɑɔ yèn wɔllɔ bɑ nɛn turɑre ye bɑ rɑ dɔ̃ɔ doke kɑ gum nubu durorugim sɔndi.
42 Mɑ tɔn dɑbirɑ bu nɑɑwɑ te tɑ ǹ gɑ̃ɑnun bwisikunu mɔ, tɑ wure. Tɔn be, bɑ sɑ̃ɑwɑ Sebɑgibu be bɑ nɑ sɑɑ gbɑburun di. Mɑ bɑ kurɔ be sumi dokeɑ nɔm wĩinɔ, mɑ bɑ mɑɑ bu sinɑ furɔ burɑsu dokeɑ winɔ.
43 Yerɑ nɑ nɛɛ, bɑɑ kɑ wi u tɔkɔ kuɑ sɑkɑrɑ te sɔɔ, u ko n tu mɔ̀wɑ u n dɔɔ? Durɔbɑ ko n mɑɑ nùn nɑɑwɑmmɛ?
44 Wee durɔbu bɑ rɑ nɛ bu kɑ nùn dendi nge kurɔ tɑnɔ. Nge mɛyɑ bɑ Oholɑ kɑ Oholibɑ kuɑ be, be bɑ sɑnkire.
45 Adɑmɑ gemgibu bɑ koo kurɔ be siri bu bu tɑɑrɛ wɛ̃ ben sɑkɑrɑrun sɔ̃ kɑ tɔn be bɑ gon sɔ̃. Domi ben nɔmɑ yɑ yɛm yibɑ.
46 Wee ye nɛ, Yinni Gusunɔ nɑ gerumɔ. Nɑ nɛɛ, kon de tɔn dɑbiru tu dɑ tu bu wɔri kpɑ tu bu nɔni swɑ̃ɑru kpɛ̃ɛ, kpɑ tu ben dukiɑ gurɑ.
47 Kpɑ tu bu kpenu kɑsuku tu go, kpɑ tu bu bɔtiri kɑ tɑkobi. Kpɑ tu ben bibu go tu ben yɛnusu dɔ̃ɔ mɛniki.
48 Nge mɛyɑ kon kɑ sɑkɑrɑru kpeesiɑ tem mɛ sɔɔ. Kon tɔn kurɔ bɑɑwure sɔ̃ u ku mɑɑ ben mɑɑbu yiru yen yirɑ swĩi.
49 Domi bɑ sɑkɑrɑru kuɑ bɑ bũnu sɑ̃wɑ. Yen sɔ̃, bɑ koo ben torɑnun ɑre sɔbe. Nge mɛyɑ bɑ koo kɑ giɑ mɑ nɛnɑ nɑ sɑ̃ɑ Yinni Gusunɔ.