33
Yakubu wɛ́sina Isaulɛ
1 Kũ Yakubu wɛ́ sɛ̀, à è Isau tɛn su kũ gbɛ̃nↄn wàa planↄ. À a nɛ́nↄ kpàatɛtɛ Leanɛ kũ Rahilao kũ nↄgbɛ̃ zĩkɛri mɛ̀n planↄ.
2 Akũ à nↄgbɛ̃ zĩkɛrii pìnↄ gbàrɛ ò do arɛ kũ ń nɛ́nↄ. Abire gbɛra Lea kũ a nɛ́nↄ, akũ Rahila kũ Yusufuo tɛ́ ń kpɛ.
3 À dòńnɛ arɛ à kùtɛ zĩtɛ gɛ̃̀n suppla ari à gɛ̀ɛ à kào a vĩ̀ni pì kĩnaa.
4 Akũ Isau bàa lɛ̀ à sù à dàalɛ à mlɛ̃̀a à ↄ dà a gã̀n à lɛ́ pɛ̀a, akũ ò ↄ́ↄ dↄ̀.
5 Isau wɛ́ sɛ̀ à nↄgbɛ̃nↄ è kũ nɛ́nↄ, akũ à pì: Dínↄ mɛ́ ò kú kũnwo laa? Yakubu wèa à pì: Nɛ́ kũ Luda ma gbanↄmɛ.
6 Akũ nↄgbɛ̃ zĩkɛrii pìnↄ nàńyĩ kũ ń nɛ́nↄ ò kùtɛ.
7 Akũ Lea kũ a nɛ́nↄ nàńyĩ dↄ ò kùtɛ. Abire gbɛra Yusufu kũ Rahilao nàńyĩ ò kùtɛ.
8 Isau pì: Pↄ́ kũ ma dańlɛ dínↄ de deramɛɛ? Yakubu wèa à pì: De mà n pↄnna le yãimɛ.
9 Isau pì: Ma gbɛ̃, ma pↄ́nↄ mↄ̀ma, ǹgↄ̃ n pↄ́nↄ kũna.
10 Akũ Yakubu pì: Oi! N yã nna! Tó ma n pↄnna lè, ǹ ma gba sí, zaakũ ó wɛ́sikↄ̃lɛnaa kɛ̀mɛnɛ lán wɛ́sikↄ̃lɛna kũ Ludaoo bàmɛ, akũ n gbãnakɛ kpàmai.
11 Ǹ gba kũ ma suonnɛ sí, zaakũ Luda arubarikaa dàmagu, pↄ́ke dí kĩamaro. Lɛmɛ à nàkaraa lɛ, akũ à sì.
12 Akũ Isau pì: Ò da zɛ́n ò tá. Mani gɛ́ kũnwo.
13 Akũ à wèa à pì: Ma dikiri, ń dↄ̃ kũ nɛ́nↄn gbãna vĩro, akũ má sã kũ zùnɛ bↄ̀rↄnↄ vĩ. Tó o tá gbãna ò gↄrↄ do, pↄ́kãdenↄ ni gaga pínkimɛ.
14 Ǹ domɛnɛ arɛ ma dikiri, makũ n zↄ̀bleri manigↄ̃ tɛ́ pↄ́nↄ kpɛ kũ nɛ́nↄ busɛbusɛ ari mà su mà n le Sei.
15 Isau pì: Mani ma gbɛ̃kenↄ tó kũnwo. Yakubu pì: À kɛ̀ dera ĩni kɛ lɛ dↄↄ? Ǹ tó mà n pↄnna le dikiri.
16 Zĩ kũ̀an Isau dà Sei zɛ́n.
17 Akũ Yakubu gɛ̀ɛ Suko. À bɛ bò gwe, akũ à lá kutanↄ dↄ̀ pↄ́nↄnɛ. A yã mɛ́ à tò, ò tↄ́ kpà gu pìinɛ Suko.
18 Kũ Yakubu sù kũ Mɛsↄpↄtamiao, à kà wɛ̃tɛ kũ òdi pinɛ Sɛkɛmu, Kanaanↄ bùsun aafia, akũ à bùraa kàtɛ wɛ̃tɛ pìi sarɛ.
19 À a bùrakũki lù Sɛkɛmu de Amↄ nɛ́nↄa andurufu basↄↄro.
20 Gwen à sa'oki bòn, à tↄ́ kpànɛ Luda Isarailanↄ Luda.