16
Gusunɔ u yinɑ
Yeremi u kurɔ suɑ
1 Yinni Gusunɔ u Yeremi sɔ̃ɔwɑ u nɛɛ,
2 ɑ ku kurɔ suɑ, kpɑ ɑ ku bibu mɑ tem mini.
3 Wee ye yɑ koo bii be bɑ koo mɑrurɑ tem mɛ sɔɔ deemɑ, kɑ ben mɛrobu kɑ ben tundobu.
4 Bɑrɑrɑ tɑ koo bu go. Bɑ ǹ bu gɔɔ swĩiyɑmmɛ. Bɑ ǹ mɑɑ bu sikumɔ. Bɑ koo kowɑ tɑɑki tem sɔɔ. Be bɑ tiɑ kpɑ bu bu go tɑbu sɔɔ, ǹ kun mɛ, gɔ̃ɔru tu bu go, kpɑ gbeeku yɛɛ kɑ gunɔsu ben gonu di.
5 Yinni Gusunɔ u mɑɑ nɛɛ, ɑ ku du diru mi bɑ gɔɔ wooru sɔ̃ ɑ kɑ bu duurɑ. Domi nɑ nɛn bɔri yɛndu wunɑ tɔn ben min di. Nɑ ǹ ben kĩru mɔ, mɛyɑ nɑ ǹ mɑɑ ben wɔnwɔndu mɔ̀.
6 Dɑmgibu kɑ bwɛ̃ɛbwɛ̃ɛbu bɑ koo gbiwɑ. Bɑ ǹ bu sikumɔ, bɑ ǹ mɑɑ ben gɔɔ wooru sinɑmɔ. Goo kun tii muririmɔ, goo kun mɑɑ kɔnimɔ ben gɔɔn nuku sɑnkirɑnun sɔ̃.
7 Bèn tɔmbɑ gu mi, bɑ ǹ goo wɑsi wi u koo kɑ bu dĩɑnu nɑɑwɑ u kɑ bu nukuru yɛmiɑsiɑ. Goo mɑɑ sɑri wi u koo kɑ bu tɑm nɑɑwɑ u kɑ bu dɑm kɛ̃, bɑɑ ǹ n ben mɛron nɑ u gu, ǹ kun mɛ, ben tundo.
8 Yinni Gusunɔ u mɑɑ Yeremi sɔ̃ɔwɑ u nɛɛ, yɛnu mi bɑ tɔ̃ɔ bɑkɑ dim mɔ̀, ɑ ku du mi, i di i nɔ kɑ be sɑnnu.
9 Domi nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ kon yɑm min nuku dobu kpeerɑsiɑ bɛɛn nɔni biru. Bɑ ǹ mɑɑ nuku dobun womusu kɑ be bɑ suɑnɑmɔn nɔɔgiru nɔɔmɔ mi.
10 Sɑnɑm mɛ kɑɑ tɔn be gɑri yi nɔɔsiɑ, bɑ koo nun bikiɑ bu nɛɛ, mbɑn sɔ̃nɑ nɛ, Yinni Gusunɔ nɑ bu nɔni swɑ̃ɑ tenin bweserun gɑri sɔ̃ɔmɔ. Mbɑ bɑ nɛ, Gusunɔ ben Yinni torɑri.
11 Sɑɑ ye sɔɔrɑ kɑɑ bu wisi ɑ nɛɛ, ben bɑɑbɑbɑ bɑ mɑn deri, mɑ bɑ dɑ bɑ bũnu sɑ̃wɑ bɑ yiirɑ nin nuurɔ, mɑ bɑ mɑn biru kisi, bɑ ǹ nɛn woodɑbɑ mɛm nɔɔwɛ.
12 Mɑ ben tii bɑ kɔ̃sɑ kuɑ n kere ben bɑɑbɑ be. Wee ben bɑɑwure u yɔ̃rɑri u win gɔ̃run kĩru kɑnkɑm swĩi. Bɑ ǹ nɛn gɑri swɑɑ dɑkimɔ.
13 Yen sɔ̃, kon bu yɑrɑ tem minin di, kpɑ bu dɑ tem mi ben bɑɑbɑbɑ kɑ ben tii bɑ ǹ yɛ̃. Miyɑ bɑ koo bũnu sɑ̃ sɔ̃ɔ sɔɔ kɑ wɔ̃kuru. Domi nɑ ǹ mɑɑ bu durom gɑm kuɑmmɛ.
Isirelibɑ bɑ koo wurɑmɑ
14 Yinni Gusunɔ u nɛɛ, yen sɔ̃nɑ tɔ̃nu gɑnu sisi nì sɔɔ bɑ ǹ mɑɑ bɔ̃rumɔ bu nɛɛ, kɑ Yinni Gusunɔn wɑ̃ɑru wi u Isirelibɑ yɑrɑmɑ Egibitin di.
15 Adɑmɑ bɑ koo bɔ̃rewɑ bu nɛɛ, kɑ Yinni Gusunɔn wɑ̃ɑru wi u Isirelibɑ yɑrɑmɑ sɑɑ sɔ̃ɔ yɛ̃sɑn nɔm geu giɑn di kɑ sere tem mi u rɑɑ bu yɑrinɑsiɑn di. Domi kon de bu wurɑmɑ ben temɔ mɛ nɑ rɑɑ ben bɑɑbɑbɑ wɛ̃.
Sɛɛyɑsiɑ bi bu wee
16 Yinni Gusunɔ u nɛɛ, wee, kon yibɛrɛbɑ seeyɑ bu Isirelibɑ mwɛɛri nge mɛ susure kowobu bɑ rɑ swɛ̃ɛ mwɛɛri. Yenibɑn biru, kon mɑɑ yibɛrɛ gɑbu seeyɑ bu bu wɔri bu go gungunu wɔllɔ kɑ guunɔ, kɑ sere mɑɑ kpee bɑɑbɑ sɔɔ nge mɛ tɑɑsobu bɑ rɑ yɛɛ wɔri bu go.
17 Domi nɛn nɔni yi ben sɑnu sɑnusu mɛɛrɑ, sin gɑsu kun beruɑ nɛn nɔni sɔɔ. Mɛyɑ nɑ mɑɑ ben torɑnu kpuro wɑɑmɔ.
18 Kon bu ben durum ɑre wɛ̃ mɑm mɑm. Domi bɑ nɛn tem disi doke mɛ mu sɑ̃ɑ nɛn ɑrumɑni, mɑ bɑ derɑ mu ben bũun bwɑ̃ɑrokunu yibɑ ni nu ǹ wɑ̃ɑru mɔ.
Tɔmbu kpuro
bɑ koo Gusunɔ tubu
19 Yeremi u nɛɛ,
Yinni Gusunɔ, ɑ sɑ̃ɑwɑ nɛn dɑm
kɑ nɛn kuku yee dɑmgiru, nɔni swɑ̃ɑrun sɑɑ.
Wunɛn miyɑ hɑnduniɑn goonu nnɛ kpuron tɔmbu bɑ koo nɑ,
kpɑ bu nɛɛ, weesɑ ben bɑɑbɑbɑ bɑ swĩi.
Ben bũnu nu ǹ gɑ̃ɑnu sosi, nu sɑ̃ɑwɑ kɑm dirum.
20 Tɔnu u koo kpĩ u tii kuɑ ye u koo sɑ̃.
Adɑmɑ kɑ gem, nu ǹ sɑ̃ɑ Gusunɔ.
21 Yen sɔ̃nɑ, wunɛ Yinni Gusunɔ ɑ nɛɛ,
kɑɑ bu wunɛn dɑm sɔ̃ɔsi,
kpɑ bu giɑ mɑ wunɑ ɑ sɑ̃ɑ Yinni Gusunɔ.