17
Yudɑbɑn durum
kɑ ben sɛɛyɑsiɑbu
1 Yudɑbɑn durum yɑ yoruɑ ben gɔ̃rusɔ.
Yɑ mɑɑ sɔ̃ɔsire ben yɑ̃ku yenun kɑ̃ɑnu sɔɔ.
Mɑ n sɑ̃ɑre bɑ ye yoruɑ mi,
kɑ yorutii sisugiɑ kɑ kpee te tɑ bɔbunu bo.
2 Yɑ sɑ̃ɑwɑ seedɑ ye yɑ bu tɑɑrɛ wɛ̃ɛmɔ.
Nge mɛyɑ ben bũu turɑnu kɑ ben bwɑ̃ɑrokunu
kɑ ben dɑ̃ɑ kubenu kɑ ben gungunu mi bɑ rɑ bũu wi bɑ mɔ̀ Asitɑɑte sɑ̃,
yɑ mɑɑ bu tɑɑrɛ wɛ̃ɛmɔ.
3 Yen sɔ̃nɑ nɛ, Yinni Gusunɔ,
kon nɛn guu tèn mi bɑ rɑ mɑn sɑ̃,
kɑ ben dukiɑ kɑ ben gbeɑ
kɑ gungunu mi bɑ rɑ bũnu sɑ̃
yibɛrɛbɑ nɔmu bɛriɑ, ben durum yen sɑɑbu
ye bɑ kuɑ ben tem mɛ kpuro sɔɔ.
4 Ben torɑnun sɔ̃nɑ bɑ koo ben tem biɑ
mɛ mu sɑ̃ɑ ben tubi.
Kon bu ko ben yibɛrɛbɑn yobu,
kpɑ bu dɑ tem mi bɑ ǹ yɛ̃.
Domi bɑ derɑ nɛn mɔru yɑ yɑburɑ nge dɔ̃ɔ.
Yɑ ko n mɑɑ yɑburewɑ sere kɑ bɑɑdommɑɔ.
A kun tɔnu nɑɑnɛ sɑ̃ɑ
5 Nɛ, Yinni Gusunɔwɑ nɑ nɛɛ,
bɔ̃rigiiwɑ wi u win gɔ̃ru sĩiyɑ nɛn min di,
mɑ u tɔnu nɑɑnɛ sɑ̃ɑ, u tɑ̃sɑ wi sɔɔ.
6 U ko n wɔnwɔndu soorewɑ
nge dɑ̃ɑ kiki si su wɑ̃ɑ mi gɑ̃ɑnu ku rɑ kpi.
U ǹ nuku dobu wɑsi.
U ko n wɑ̃ɑwɑ tem sɑɑrɑmɔ mi goo sɑri.
7 Adɑmɑ domɑrugiiwɑ wi u win nɑɑnɛ doke nɛ, Yinni Gusunɔ sɔɔ,
mɑ win toro sindu tɑ wɑ̃ɑ nɛ sɔɔ.
8 Yɛ̃ro ko n sɑ̃ɑwɑ nge dɑ̃ɑ te tɑ yɔ̃ dɑɑrun goorɔ,
tèn gbini yi ku rɑ nim bie.
Dɑ̃ɑ ten bweseru tɑ ku rɑ n yɑm susuru gɑrɑ.
Ten wurusu rɑ n bekusu sɑ̃ɑwɑ sɑɑ kpuro.
Sɔ̃ɔ sɑ̃rerun sɑɑ yɑ̀ n nɑ,
tɑ ku rɑ gbere, bɑɑ wɔ̃ɔ ge gbeburɑ yɔ̃rɑ.
Mɛyɑ tɑ ku rɑ mɑɑ mɑrubu yɔ̃re.
9 Tɔnun gɔ̃ru gɑ rɑ kɔ̃sɑ berewɑ.
Mɛyɑ gen bɑrɑrɑ ku rɑ bɛkure.
Goo u wɑ̃ɑ wi u koo kpĩ u gen bwisikunu giɑ?
10 Nɛ, Yinni Gusunɔwɑ
nɑ rɑ tɔnun gɔ̃ru kɑ win bwisikunu wɛ̃ɛri,
n kɑ nùn ye u kuɑn ɑre wɛ̃.
11 Wi u dukiɑ gurɑmɔ kɑ swɑɑ kɔ̃sɑ,
u sɑ̃ɑwɑ nge kusu ge gɑ sĩɑ tukɑ wee ye gɑ ǹ kɑ.
Dukiɑ ye, yɑ koo nùn deriwɑ
win wɑ̃ɑrun suunu suunukɑ sɔɔ,
kpɑ u n sɑ̃ɑ nge gɑri bɔkɔ win wɑ̃ɑ dɑ̃ɑkiru sɔɔ.
Yinni Gusunɔ turowɑ
u sɑ̃ɑ wɑ̃ɑrun bwiɑ
12 Bɛsɛn sɑ̃ɑ yee dɛɛrɑru
tɑ sɑ̃ɑwɑ nge sinɑ kitɑ yiikogiru
te tɑ wɔlle suɑre yellun di.
13 Yinni Gusunɔ, wunɑ bɛsɛ Isirelibɑ sɑ yĩiyɔ.
Be bɑ nun biru kisi, bɑ koo sekuru wɑ.
Be bɑ kɑ nun tondinɛ, bɑ koo bu duɑri.
Bɑ ko n sɑ̃ɑwɑ nge bèn yĩsɑ bɑ yoruɑ tuɑ sɔɔ.
Domi bɑ wunɛ Yinni Gusunɔ deri,
wunɛ wi ɑ sɑ̃ɑ nge bwiɑ yèn nim mu wɑ̃ɑru wɛ̃ɛmɔ.
Yeremi u Yinni Gusunɔ
somiru kɑnɑmɔ
14 Yinni Gusunɔ, ɑ mɑn bɛkio,
kpɑ n wɑ n bɛkurɑ mɑm mɑm.
A mɑn fɑɑbɑ koowo kpɑ n fɑɑbɑ wɑ.
Domi wunɛ turowɑ nɑ rɑ n siɑrɑmɔ.
15 Yinni Gusunɔ, wee, tɔmbɑ mɑn bikiɑmɔ bɑ mɔ̀,
mɑnɑ nɔni swɑ̃ɑrun gɑri yi ɑ bu sɔ̃ɔwɑ mi, yi woo.
I den bu wɔrimɑ.
16 Adɑmɑ nɑ ǹ yinɛ n wunɛn tɔmbu kpɑrɑ.
N ǹ nɛ, nɑ sɛnde nɔni swɑ̃ɑ ten tɔ̃ru tu kɑ nɑ.
Wunɛn tii, ɑ yɛ̃ mɛ.
A mɑɑ yɛ̃ gɑri yi nɑ yɑrɑ nɛn nɔɔn di kpuro.
17 Yen sɔ̃, ɑ ku de nɑ n mɑɑ bɛrum soore wunɛn sɔ̃,
wunɛ wi ɑ sɑ̃ɑ nɛn kuku yeru nɔni swɑ̃ɑrun sɑɑ.
18 A de be bɑ mɑn nɔni sɔ̃ɔmɔ bu sekuru wɑ.
Kpɑ nɛ, nɑ kun tu wɑ.
A de bu diiri, kpɑ nɛ, nɑ n wɑ̃ɑ kɑ toro sindu.
A de nɔni swɑ̃ɑru tu bu deemɑ,
kpɑ ɑ bu sɛɛyɑsiɑ n kpɑ̃.
Tɔ̃ɔ wɛ̃rɑrugirun bɛɛrɛ wɛ̃ɛbu
19 Yinni Gusunɔ u nɛɛ, Yeremi, ɑ seewo ɑ dɑ ɑ yɔ̃rɑ kɔnnɔwɔ ge bɑ mɔ̀ tɔmbun kɔnnɔ mi Yudɑbɑn sinɑmbu bɑ rɑ kɑ du kpɑ bu kɑ yɑri, kpɑ ɑ mɑɑ dɑ ɑ yɔ̃rɑ kɔnnɔ si su tien mi.
20 Kpɑ ɑ bu sɔ̃ ɑ nɛɛ, be, Yudɑbɑ kɑ ben sunɔ kɑ be, Yerusɑlɛmugibu, be kpuro be bɑ dumɔ kɔnnɔ sin min di, bu nɛ Yinni Gusunɔgiɑ swɑɑ dɑkio bu nɔ.
21 Nɑ nɛɛ, bɑ n tii sɛ kpɑ bu ku rɑɑ sɔmunu sɔbe tɔ̃ɔ wɛ̃rɑrugiru sɔɔ. Bu ku rɑɑ mɑɑ nu duusiɑ Yerusɑlɛmun gbɑ̃rɑ kɔnnɔsun di.
22 Bu ku rɑɑ mɑm nu yɑrɑ ben yɛnusun di. Bu ku sɔmburu gɑru ko. Adɑmɑ bu sɑnɑm mɛ yiiyo nɛ, Yinni Gusunɔn sɔ̃ nge mɛ nɑ ben bɑɑbɑbɑ yiire.
23 Geemɑ, ben bɑɑbɑ be, bɑ swɑɑ tɑɑyɑ. Bɑ ǹ mɑn swɑɑ dɑki. Bɑ nɛn sɔ̃ɔsinu yinɑ.
24 Adɑmɑ be, bɑ̀ n mɑn swɑɑ dɑki kɑ gem, mɑ bɑ ǹ sɔmunu gɑnu duusie Yerusɑlɛmun kɔnnɔsun di tɔ̃ɔ wɛ̃rɑrugiru sɔɔ, mɑ bɑ tɔ̃ɔ te yi nɛ, Yinni Gusunɔn sɔ̃, mɑ bɑ ǹ sɔmburu gɑru kue te sɔɔ,
25 sɑɑ yerɑ sinɑm be bɑ sɔ̃ Dɑfidin sinɑ gɔnɑɔ kɑ ben sinɑ ɑsɑkpɔbu bɑ koo du sɑɑ Yerusɑlɛmun kɔnnɔ sin min di, bɑ n tɑbu kɛkɛbɑ duɑ, be dumi gɑwe, kpɑ gɑbu bɑ n dumi sɔni. Mɛyɑ Yudɑbɑ kpuro kɑ Yerusɑlɛmugibu kpuro bɑ koo mɑɑ du mi, kpɑ Yerusɑlɛmu yɑ n tɔmbu yibɑ sere kɑ bɑɑdommɑɔ.
26 Tɔmbɑ koo nɑ nɛn sɑ̃ɑ yerɔ Yudɑn wusu kɑ Yerusɑlɛmun bɑru kpɑɑnu kpuron di kɑ Bɛnyɑmɛɛn tem di, kɑ sere mɑɑ guunun di kɑ wɔwin di, kɑ sɔ̃ɔ yɛ̃sɑn nɔm dwɑru giɑn di, tem mɛ kpuron di gesi, bu yɑ̃ku dɔ̃ɔ mwɑɑrɑruginu ko kɑ siɑrɑbun yɑ̃kunu, kpɑ bu kɑ kɛ̃nu nɑ, kpɑ bu turɑre dɔ̃ɔ doke mi.
27 Adɑmɑ bɑ̀ kun nɛn gɑri swɑɑ dɑki, yi nɑ nɛɛ, bu mɑn tɔ̃ɔ wɛ̃rɑrugii te yiiyɑ, mɑ bɑ dumɔ Yerusɑlɛmun kɔnnɔsun di, bɑ n sɔmunu sɔɔwɑ, tɔ̃ɔ wɛ̃rɑrugii te sɔɔ, sɑɑ yerɑ kon wuu ge dɔ̃ɔ doke wi u ǹ gbimɔ kpɑ be kpuro bu dɔ̃ɔ mwɑɑrɑ.