22
1 Yinni Gusunɔ u mɑɑ Yeremi sɔ̃ɔwɑ u nɛɛ, ɑ doo Yudɑn sinɑ bokon yɛnuɔ kpɑ ɑ bu gɑri yini sɔ̃.
2 A nɛɛ, wi, Yudɑbɑn sinɑ boko, wi, wi u sɔ̃ Dɑfidin sinɑ gɔnɑɔ, kɑ win bwɑ̃ɑbu kɑ win tɔmbu kɑ be bɑ gesi wɑ̃ɑ sinɑ kpɑɑru mi,
3 bu nɛ, Yinni Gusunɔn gɑri yini swɑɑ dɑkio bu nɔ. Bu gem swĩiyɔ. Bu be bɑ dɑm dɔremɔ wɔro be bɑ bu dɑm dɔremɔn nɔmɑn di. Bu ku sɔbu kɑ gɔminibu kɑ gobekubɑn gɑ̃ɑnu mwɑ kɑ dɑm. Bu ku mɑɑ tɑɑrɛ sɑrirugibu go yɑm mini.
4 Bɑ̀ n woodɑ yeni mɛm nɔɔwɑ, gɑbu ben bweseru sɔɔ, bɑ ko n bɑndu diiwɑ bɑ n sɔ̃ Dɑfidin sinɑ gɔnɑ yeni sɔɔ. Bɑ koo du sɑɑ kɔnnɔ minin di bɑ n duɑ tɑbu kɛkɛ sɔɔ ye dumi gɑwe, ǹ kun mɛ, bɑ n dumi sɔni, be kɑ ben bwɑ̃ɑbu kɑ ben tɔmbu.
5 Adɑmɑ bɑ̀ n yinɑ bu ye mɛn nɔɔwɑ, sere kɑ nɛ, Yinni Gusunɔn wɑ̃ɑru, sinɑ kpɑɑ te, tɑ koo kowɑ bɑnsu.
6 Wee ye nɑ mɑɑ geruɑ Yudɑbɑn sinɑ kpɑɑrun sɔ̃. Nɑ nɛɛ,
bɑɑ mɛ nɑ sinɑ kpɑɑ te wɑ tɑ wɑ̃
nge dɑ̃ɑ sɔ̃ɔ ge gɑ wɑ̃ɑ Gɑlɑdiɔ,
ǹ kun mɛ, nge Libɑnin guurun wii kpiiru,
kɑ gem kon tu bɑnsu koosiɑ.
Goo kun mɑɑ sinɑmɔ mi.
7 Kon tɑbu kowobu tɑbu yɑ̃nu sebusiɑ bu tu wɔri.
Kpɑ bu ten gbere yi bɑ kuɑ kɑ dɑ̃ɑ ye bɑ mɔ̀ sɛduru wukiri bu dɔ̃ɔ doke.
8 Tɔn tuko dɑbinu bɑ koo sɑrɑ wuu gen mi, kpɑ bu sɔ̃ɔnɑ bu nɛɛ, mbɑn sɔ̃nɑ Yinni Gusunɔ u wuu bɔkɔ geni kuɑ mɛsum.
9 Kpɑ bu bu wisi bu nɛɛ, gen tɔmbu bɑ wi, ben Yinnin ɑrukɑwɑni kusiɑwɑ, mɑ bɑ dɑ bɑ bũnu sɑ̃ɑmɔ.
Ye Yinni Gusunɔ u geruɑ
Sɑlumun sɔ̃
10 Bɛɛ Yudɑbɑ,
i ku wuri ko Yosiɑsi wi u gun sɔ̃.
I ku mɑɑ win ɑrio ko.
Adɑmɑ i wuri koowo Sɑlumun sɔ̃,
wi bɑ yoru mwɑ bɑ kɑ dɑ tem tukumɔ.
Domi u ǹ mɑɑ wee.
Mɛyɑ u ǹ mɑɑ tem mɛ wɑsi
mi bɑ nùn mɑrɑ mini.
11 Wee ye Yinni Gusunɔ u geruɑ Sɑlumu, Yosiɑsi Yudɑbɑn sinɑ bokon biin sɔ̃, wi u bɑndu dii win bɑɑn ɑyerɔ. U nɛɛ, u doonɑ, u ǹ mɑɑ wee.
12 U koo gbiwɑ dɛsiru sɔɔ mi bɑ kɑ nùn dɑ mi, u ǹ mɑɑ tem mɛ wɑsi.
Yinni Gusunɔ
u Yoyɑkimu gerusi
13 Yeremi u Yoyɑkimu sɔ̃ɔwɑ u nɛɛ, wee ye Yinni Gusunɔ u geruɑ. U nɛɛ,
wunɛ Yoyɑkimu, bɔ̃rurowɑ ɑ sɑ̃ɑ.
Wee ɑ wunɛn sinɑ kpɑɑru bɑnɑ,
ɑdɑmɑ ɑ ǹ gem swĩi.
A tu gidɑmbisɑbɑ sosiɑ
ɑdɑmɑ ye n weenɛ ɑ tɔmbu kuɑ,
ɑ ǹ bu kuɑmmɛ.
A rɑ gɑbu sɔmburu koosie kɑm.
A ku rɑ bu ben kɔsiɑru wɛ̃.
14 Mɑ ɑ nɛɛ, kɑɑ tii sinɑ kpɑɑ bɑkɑru bɑniɑwɑ
kpɑ tɑ n gidɑmbisɑ bɑkɑ mɔ.
Mɑ ɑ fɛnɛntibɑ doke,
ɑ ten gɑni dɑ̃ɑ geɑ ye bɑ mɔ̀ sɛduru wukiri.
Mɑ ɑ tu swɛ̃rɑsiɑ kom kom ɑ kɑ sɔ̃ɔsi mɑ sinɑ kpɑɑrɑ.
15-16 Yèn sɔ̃ ɑ kɑ sinɑ kpɑɑ te sɛdurubɑ bɑnɑ,
yeyɑ n derɑ ɑ sɑ̃ɑ sinɑ boko?
Wunɛn bɑɑbɑn tii u ǹ sɑ̃ɑ sinɑ boko ro?
U rɑ diwɑ kpɑ u nɔ nge bɑɑwure,
ɑdɑmɑ u rɑ bɑɑwure kuewɑ ye n weenɛ u ko.
U rɑ sɑ̃ɑrobu kɑ wɔnwɔndobu siriewɑ dee dee.
Yen sɔ̃nɑ ye kpuro yɑ nùn koorɑ dee dee win wɑ̃ɑru sɔɔ.
Wi u mɑɑ mɔ̀ nge mɛ,
wiyɑ u wi, Yinni Gusunɔ yɛ̃ kɑ gem.
17 Adɑmɑ wunɛ, wunɛn tiin ɑrufɑɑniwɑ ɑ kɑsu.
A kɑsuwɑ ɑ tɑɑrɛ sɑrirugibu dɑm dɔre
kpɑ ɑ bu go.
18 Yen biru, Yeremi u mɑɑ nɛɛ, wee ye Yinni Gusunɔ u gerumɔ Yoyɑkimu, Yosiɑsin bii, Yudɑbɑn sinɑ bokon sɔ̃. U nɛɛ,
ù n gu, bɑ ǹ nùn gɔɔ swĩiyɑmmɛ bu nɛɛ,
wɑiyo nɛn mɔɔ!
Wɑiyo nɛn sesu!
Wɑiyo nɛn yinni!
19 Adɑmɑ bɑ koo win goru gɑwɑwɑ bu yɑrɑ Yerusɑlɛmun di
bu sike nge yɑɑ sɑberu.
Yerusɑlɛmu yɑ koo sekuru wɑ
20 Yeremi u nɛɛ,
wee ye Yinni Gusunɔ u geruɑ.
U nɛɛ, bɛɛ Yerusɑlɛmugibu,
i doo i yɔ guu te bɑ mɔ̀ Libɑniɔ,
kɑ Bɑsɑnin guurɔ,
kɑ Abɑrimun gungunu wɔllɔ,
kpɑ i kuuki ko i nɔɔgiru suɑ.
Domi be i kɑ ɑrukɑwɑni bɔkuɑ bɑ munkirɑ.
21 U bɛɛ kirɔ kuɑ sɑnɑm mɛ i wɑ̃ɑ bɔri yɛndu sɔɔ,
ɑdɑmɑ i nɛɛ, i ǹ nùn swɑɑ dɑkimɔ.
Nge mɛyɑ bɛɛn dɑɑ yɑ sɑ̃ɑ sɑɑ bɛɛn piiburun di,
i ku rɑ nùn swɑɑ dɑki.
22 Tɛ̃, bɛɛn kpɑrobu bɑ koo kɑ woo doonɑ
kpɑ be i kɑ ɑrukɑwɑni bɔkuɑ
bu bu yoru mwɛɛri bu kɑ dɑ tem tukumɔ.
Sɑɑ ye sɔɔrɑ i ko i sekuru wɑ,
bɛɛn kom kɔ̃sum sɔ̃.
23 Bɛɛ Yerusɑlɛmugibu,
bɛɛ be i sɔ̃ sɛ̃ɛ bɛɛn dii burɑnu sɔɔ
ni i kuɑ kɑ Libɑnin dɑ̃ɑ geɑ,
ɑmɔnɑ bɛɛn weeweenu ko n nɛ,
sɑnɑm mɛ wuriribu koo bɛɛ deemɑ
nge tɔn kurɔ wi u yiire u kĩ u mɑ.
Yinni Gusunɔ
u Yoyɑkini sirimɔ
24 Yinni Gusunɔ u Yeremi sɔ̃ɔwɑ u nɛɛ, kɑɑ Yoyɑkini, wi bɑ mɑɑ mɔ̀ Yekoniɑ, Yoyɑkimun bii, Yudɑbɑn sinɑ boko sɔ̃ ɑ nɛɛ, sere kɑ nɛn wɑ̃ɑru, bɑɑ ù n sɑ̃ɑn nɑ nge tɑɑbu nɛn nɔm geuɔ, kon nùn wunɑ min di.
25 Kon nùn win yibɛrɛbɑ nɔmu sɔndiɑ, be, be bɑ kɑsu bu nùn go. Kon nùn bu nɔmu sɔndiɑ be, bèn bɛrum u mɔ mi. Beyɑ Nɛbukɑnɛsɑɑ, Bɑbilonin sinɑ boko kɑ win tɑbu kowobu.
26 Kon bu kɔ̃, wi kɑ win mɛro wi u nùn mɑrɑ. Kpɑ bu kɑ bu dɑ tem tukumɔ mi bɑ ǹ bu mɑrɑ. Miyɑ bɑ koo gbi.
27 Sɑɑ gɑɑ sɔɔ, bɑ ko bɑ n kĩ bu gɔsirɑmɑ ben temɔ ɑdɑmɑ yɑ ǹ koorɔ.
28 Gɑbɑ koo bikiɑ bu nɛɛ, Yoyɑkini wi, u sɑ̃ɑwɑ nge weke te tɑ kɔsire, ǹ kun mɛ, nge gɑ̃ɑ ni goo kun mɑɑ kĩ? Aɑwo. Ǹ n mɛn nɑ, mbɑn sɔ̃nɑ bɑ wi kɑ win bweseru tem yɑrɑ mɑ bɑ kɑ bu dɑ sere mi bɑ ǹ yɛ̃.
29 Mɑ Yeremi u nɛɛ, nɛn temgibu, i nɔɔwɔ ye Yinni Gusunɔ u geruɑ.
30 U nɛɛ, i durɔ wi gɑrisio wi u ǹ koorɑmɔ win wɑ̃ɑru sɔɔ. U ko n sɑ̃ɑwɑ nge wi u bibu biɑ, domi win bweseru sɔɔ, goo kun mɑɑ sinɑmɔ sinɑ gɔnɑ sɔɔ u Yudɑbɑ kpɑrɑ.