23
Kpɑro kɔ̃sobu
1-2 Gusunɔ Isirelibɑn Yinni u nɛɛ, bɔ̃rurobɑ kpɑro be bɑ nɛn tɔmbu goomɔ, mɑ bɑ bu yɑrinɑsiɑmɔ nge yɑ̃ɑ kpɑro kɔ̃sobu. Nɑ mɑɑ nɛɛ, wee bɑ nɛn tɔmbu girɑ, bɑ bu yɑrinɑsiɑ bɑ yinɑ bu bu nɔɔri. Yen sɔ̃, kon bu sɛɛyɑsiɑ ben nuku kɔ̃su ten sɑɑbu.
3 Kpɑ n nɛn tɔn be bɑ tie mwɛɛrimɑ tem kpuron di, mi nɑ rɑɑ derɑ bɑ yɑrinɛ, n kɑ bu wurɑmɑ ben temɔ, kpɑ bu mɑrurɑ bu dɑbiɑ.
4 Nɛ, Yinni Gusunɔ kon bu kpɑro kpɑobu wɛ̃ be bɑ koo bu kpɑrɑ. Bɑ ǹ mɑɑ nɑndɑmɔ bɛrum sɔ̃. Bɑɑ ben turo kun mɑɑ biɑrɑmɔ.
5 Wee sɑɑ yɑ sisi
yè sɔɔ kon gemgii goo seeyɑ Dɑfidin bweserun di
nge dɑ̃ɑ kpii pɔturɑ,
kpɑ u n bɑndu dii kɑ bɑɑdommɑɔ.
U koo tɔn be kpɑrɑwɑ kɑ bwisi gee.
Kpɑ u gem sɔ̃ɔsi tem mɛ sɔɔ.
6 Win wɑɑti ye sɔɔ,
Yudɑbɑ bɑ koo fɑɑbɑ wɑ.
Kpɑ u de Isirelibɑ bɑ n wɑ̃ɑ bɔri yɛndu sɔɔ.
Kpɑ bɑ n nùn sokumɔ bɑ n mɔ̀,
Yinni Gusunɔwɑ u sɑ̃ɑ ben fɑɑbɑ kowo.
7 Yen sɔ̃nɑ nɑ nɛɛ, wee sɑɑ yɑ mɑɑ sisi yè sɔɔ bɑ ǹ mɑɑ bɔ̃rumɔ bu nɛɛ, kɑ Yinni Gusunɔn wɑ̃ɑru wi u bu yɑrɑmɑ sɑɑ Egibitin tem di.
8 Adɑmɑ bɑ ko n dɑ gerewɑ bu nɛɛ, kɑ Yinni Gusunɔn wɑ̃ɑru wi u bu yɑrinɑsiɑ sɔ̃ɔ yɛ̃sɑn nɔm geu giɑ kɑ wusu gɑsu sɔɔ, mɑ u mɑɑ kɑ bu wurɑmɑ min di, bu kɑ sinɑ ben temɔ.
Gɑri yi Yeremi
u sɔmɔ weesugibu sɔ̃ɔwɑ
9 Ǹ n sɔmɔbun sɔ̃n nɑ,
nɛn gɔ̃ru gɑ sɑnkirɑ too,
mɑ nɑ diirimɔ sere kɑ nɛn kukunɔ.
Nɑ sɑ̃ɑ nge wi tɑm mu goomɔ
Yinni Gusunɔ kɑ win gɑri dɛɛrin sɔ̃,
yi u mɑn sɔ̃ɔwɑ u nɛɛ,
10 tɔmbɑ yibɑ tem mɛ sɔɔ,
be bɑ sɑkɑrɑru mɔ̀.
Kɔ̃sɑ bɑ nɑɑ gire.
Miyɑ ben dɑm mu wɑ̃ɑ.
Yen sɔ̃nɑ tem mɛ, mu sɑnkire,
mɑ mɛn kpɑrɑ yee ni nu wɑ̃ɑ gbɑburun berɑ giɑ nu gberɑ.
Domi u mu bɔ̃rusi.
11 Gusunɔn sɔmɔbu kɑ yɑ̃ku kowobu bɑ sɑnkire,
u wɑ mɑ bɑ nuku kɔ̃su kom mɔ̀
sere kɑ win sɑ̃ɑ yerɔ.
12 Yen sɔ̃nɑ ben swɑɑ yɑ koo wɔriɑ,
kpɑ yu bu yɑm tĩre.
U koo de bu bu bɔriɑ,
kpɑ bu wɔruku sɑɑ ye u koo bu sɛɛyɑsiɑ
u de wɑhɑlɑ yu bu deemɑ.
Wi, Yinni Gusunɔwɑ u yeni geruɑ.
Yudɑn Gusunɔn sɔmɔbun
kɔ̃sɑn kpɑ̃ɑru
13 Yinni Gusunɔ u nɛɛ,
kɔ̃sɑ ye nɑ wɑ nɛn sɔmɔbu bɑ mɔ̀ Sɑmɑriɔ,
yɑ ǹ kɑ nɔɔ gerurɔ.
Domi bũu wi bɑ mɔ̀ Bɑɑlin yĩsirɑ bɑ kɑ gɑri mɔ̀.
Mɑ bɑ nɛn tɔmbu Isirelibɑ gɛrɑsiɑ nɛn swɑɑn di.
14 Adɑmɑ kom kɔ̃sum mɛ nɑ wɑ Gusunɔn sɔmɔbun suunu sɔɔ Yerusɑlɛmuɔ,
mu beɔnɔgim kere.
Bɑ sɑ̃ɑwɑ sɑkɑrɑ kowobu,
mɑ bɑ weesu mɔ̀,
bɑ tɔn kɔ̃sobu dɑm kɛ̃mɔ bu ku kɑ ben kom kɔ̃sum deri,
mɑ nɑ be kpuro gɑrisi nge Sodomu kɑ Gomɔrɑn tɔmbu.
15 Yen sɔ̃nɑ nɛ Gusunɔ, wɔllu kɑ tem Yinni,
nɑ nɛn sɔmɔbu Yerusɑlɛmuɔ sɔ̃ɔmɔ
mɑ wee kon de bu dɑ̃ɑ kiku gɑgu ge gɑ sosu di,
kpɑ bu nim mɛ mu dɛ̃ɛ mɔ nɔ.
Domi beyɑ bɑ derɑ tem mɛn tɔmbu kpuro bɑ ǹ mɑɑ mɑn bɛɛrɛ wɛ̃ɛmɔ.
Sɔmɔ weesugibu
16 Amɛniwɑ nɛ Gusunɔ, wɔllu kɑ tem Yinni nɑ geruɑ. Nɑ nɛɛ,
i ku mɑɑ nɛn sɔmɔ ben gɑri swɑɑ dɑki.
Domi bɑ derɑ i yĩiyɔ ye i ǹ wɑsi.
Ben tiin gɔ̃run bwisikunɑ bɑ gerumɔ,
n ǹ mɔ yi yi wee nɛn nɔɔn di.
17 Bɑ rɑ mɑm be bɑ mɑn gɛmɑ sɔ̃ bu nɛɛ,
nɑ be geruɑ nɑ nɛɛ,
bɑ koo bɔri yɛndu wɑ.
Kpɑ bɑ n be bɑ ben tii tiin gɔ̃ru kĩru mɔ̀ sɔ̃ɔmɔ bɑ n mɔ̀,
bɑ ǹ kɔ̃sɑ gɑɑ wɑsi.
18 Yeremi u nɛɛ,
ben wɑrɑ u kɑ Yinni Gusunɔ wesiɑnɑ.
Nge ben wɑrɑ u win gɑri nuɑ u yi lɑɑkɑri kuɑ.
19 Wee Yinni Gusunɔn mɔru yɑ koo nɑ nge guru woo bɔkɔ
kpɑ yu tɔn kɔ̃sobu wɔri.
20 Win mɔru ye, yɑ ǹ suremɔ,
mɑ n kun mɔ u win himbɑ yibiɑ.
Amɛn biru, yɑ koo bɛɛ nɛn tɔmbu yeeri.
21 Yinni Gusunɔ u nɛɛ,
sɔmɔ be, bɑ duki dɑ, bɑɑ mɛ nɑ ǹ bu gɔre.
Bɑ mɑɑ gɑri geruɑ, bɑɑ mɛ nɑ ǹ kɑ bu gɑri kue.
22 Bɑ̀ n dɑɑ nɛn gɑri swɑɑ dɑki,
nɛn gɑriyɑ bɑ koo rɑɑ kpɑrɑ nɛn tɔmbun suunu sɔɔ.
Kpɑ bu wɑ bu gɔ̃ru gɔsiɑ bu ben kom kɔ̃sum deri.
Yinni Gusunɔ
u wɑ̃ɑ yɑm kpuro
23 Nɛ Gusunɔ, nɑ wɑ̃ɑwɑ yɑm kpuro,
turuku kɑ tontondeɔ.
24 Goo u koo kpĩ u kuke nɑ kun nùn wɑ?
Nɑ wɑ̃ɑwɑ yɑm kpuro, wɔllɔ kɑ temɔ.
Mbɑ yɑkɑsu kɑ dobi
yi mɔɔsinɛ
25 Nɑ nɔɔmɔ ye sɔmɔbu bɑ gerumɔ. Be bɑ gɑri weesugii mɔ̀ kɑ nɛn yĩsiru bɑ mɔ̀, nɑ kɑ bu gɑri kuɑ dosu sɔɔ,
26 sere sɑɑ yerɑ̀ sɔmɔ beni bɑ ko n gɑri weesugii mɔ̀, kpɑ bɑ n nɛn tɔmbu nɔni wɔ̃kumɔ kɑ ben gɔ̃run gɑri.
27 Bɑ kĩwɑ ben dosu weesugisun gɑri yi de nɛn tɔmbu bu nɛn yĩsiru duɑri nge mɛ ben bɑɑbɑbɑ bɑ rɑɑ mɑn duɑri bũu wi bɑ mɔ̀ Bɑɑlin sɔ̃.
28 Sɔmɔ wi u dosɑ u geruo mɑ u dosɑ. Wi nɑ mɑɑ kɑ gɑri kuɑ u yi tusio dee dee.
Nɛ, Yinni Gusunɔ nɑ nɛɛ,
mbɑ yɑkɑsu kɑ dobi yi mɔɔsinɛ.
29 Nɛn gɑri kun sɑ̃ɑ nge dɔ̃ɔ ro?
Yi ǹ sɑ̃ɑ nge mɑtɑlɑkɑ ye yɑ rɑ kperu kɔre ro?
30 Yen sɔ̃nɑ nɛ, Yinni Gusunɔ, kon sɔmɔ be sɛɛyɑsiɑ, be, be bɑ ben winsim gɑri suɑmɔ bɑ kɑ gɑri weesugii mɔ̀.
31 Kon bu sɛɛyɑsiɑ be bɑ ben tii tiin gɑri suɑmɔ bɑ gerumɔ kɑ nɛn yĩsiru.
32 Kon bu sɛɛyɑsiɑ be bɑ ben dosu weesugisu tɔmbu sɔ̃ɔmɔ. Mɑ bɑ derɑ nɛn tɔmbɑ kɔ̃ɔrɑmɔ ben wee si kɑ ben tɔn biɑrun sɔ̃. Nɑ ǹ bu gɔre, nɑ ǹ mɑɑ bu woodɑ wɛ̃. Mɛyɑ bɑ ǹ mɑɑ ɑrufɑɑni gɑɑ mɔ tɔn ben suunu sɔɔ.
Yinni Gusunɔn gɑri
yi sɑ̃ɑwɑ sɔmunu
33 Yinni Gusunɔ u Yeremi sɔ̃ɔwɑ u nɛɛ, tɔn ben goo, ǹ kun mɛ nɛn sɔmɔ goo, ǹ kun mɛ yɑ̃ku kowo goo ù n nun bikiɑ u nɛɛ, mbɑ nɛ, Yinni Gusunɔ nɑ geruɑ, sɔmu nirɑ̀ nɑ bu sɔbi, kɑɑ nùn wisiwɑ ɑ nɛɛ, berɑ bɑ sɑ̃ɑ nɛn sɔmunu. Adɑmɑ kon bu biru kisi.
34 Ben wi u gesi nɔɔ wukiɑ u nɛɛ, nɛ, Yinni Gusunɔ nɑ bu sɔmunu sɔbi, kon yɛ̃ro sɛɛyɑsiɑwɑ wi kɑ win yɛnugibu.
35 Ye bɑɑwure u koo kpĩ u win winsim bikiɑ, yerɑ, u nɛɛ, mbɑ Yinni Gusunɔ u geruɑ, mbɑ u wisɑ.
36 Adɑmɑ bu ku rɑɑ mɑɑ gere bu nɛɛ, nɑ bu sɔmunu sɔbi. Wi u ye geruɑ, win gɑri koo wɔri win tii sɔɔ. Domi bɑ nɛn gɑri tɛmɑmɔwɑ nɛ wi nɑ sɑ̃ɑ ben Yinni wi u rɑ n wɑ̃ɑ, u dɑm kpuro mɔ.
37 Kɑɑ mɑɑ sɔmɔ be bikiɑ ɑ nɛɛ, mbɑ nɛ, Yinni Gusunɔ nɑ bu sɔ̃ɔwɑ. Mbɑ nɑ bu wisɑ.
38 Bɑ̀ n mɑɑ nun wisɑ bɑ nɛɛ, nɛ, Yinni Gusunɔ nɑ bu sɔmunu sɔbi, bɑɑ mɛ nɑ nɛɛ, bu ku mɑɑ yen gɑri ko, ɑ bu wisio ɑ nɛɛ, ɑmɛniwɑ nɛ, Yinni Gusunɔ nɑ geruɑ. Nɑ nɛɛ,
39 kon bu biru kisi kpɑ n bu duɑri, be kɑ ben wuu ge nɑ rɑɑ be kɑ ben bɑɑbɑbɑ wɛ̃.
40 Kon mɑɑ bu seku bɑkɑru doke te tɑ ǹ duɑrirɔ sere kɑ bɑɑdommɑɔ. Kpɑ bɑ kun mɑɑ bɛɛrɛ mɔ tɔmbun nɔni sɔɔ.