25
Yudɑbɑn mɛm nɔɔ sɑrirun ɑre
1 Yoyɑkimu, Yosiɑsin bii, Yudɑbɑn sinɑ bokon bɑndun wɔ̃ɔ nnɛse sɔɔrɑ Yinni Gusunɔ u kɑ Yeremi gɑri kuɑ Yudɑbɑn sɔ̃. Yɑ sɑ̃ɑwɑ Nɛbukɑnɛsɑɑ, Bɑbilonin sinɑ bokon bɑndun wɔ̃ɔ gbiikuu.
2 Mɑ Yeremi u Yudɑbɑ kɑ Yerusɑlɛmugibu kpuro sɔ̃ɔwɑ u nɛɛ,
3 sɑɑ Yosiɑsi, Amɔɔn biin bɑndun wɔ̃ɔ wɔkurɑ itɑsen di, n kɑ gisɔ girɑri, yen wɔ̃ɔ yɛndɑ itɑwɑ mi. Sɑɑ min diyɑ nɑ rɑ n bɛɛ Gusunɔn gɑri sɔ̃ɔmɔ ɑdɑmɑ i ku rɑ mɑn swɑɑ dɑki.
4 Yinni Gusunɔ u rɑ n bɛɛ win sɔm kowobu gɔriɑmmɛ, berɑ win sɔmɔbu. U derɑ bɑ nɑ nɑ sɑɑ yee yellun di. Adɑmɑ i ǹ bu swɑɑ dɑki, i ǹ ben gɑri wure.
5 Sɔmɔ be, bɑ rɑ n gerumɔ bɑ n mɔ̀, i gɔ̃ru gɔsio kpɑ i bɛɛn dɑɑ kɔ̃sɑ deri, kpɑ i wɑ i n wɑ̃ɑ bɛɛn tem sɔɔ, mɛ Yinni Gusunɔ u bɛɛ kɑ bɛɛn bɑɑbɑbɑ wɛ̃ sere kɑ bɑɑdommɑɔ.
6 I ku mɑɑ bũu goo yiirɑ i nùn sɑ̃. I ku Gusunɔn mɔru seeyɑ kɑ bɛɛn bwɑ̃ɑroku ni i kuɑ kɑ bɛɛn tii, kpɑ u ku mɑɑ bɛɛ kɔ̃sɑ gɑɑ kuɑ.
7 Adɑmɑ Yinni Gusunɔn tii u nɛɛ, i ǹ nùn swɑɑ dɑki. I win mɔru seeyɑwɑ bɛɛn bwɑ̃ɑroku ni i kuɑn sɔ̃. Mɑ yɑ kɑ bɛɛ kɔ̃sɑ nɑɑwɑ.
8 Yen sɔ̃nɑ wi, Gusunɔ wɔllu kɑ tem Yinni u nɛɛ, yèn sɔ̃ i ǹ nùn swɑɑ dɑki,
9 yen sɔ̃nɑ u koo mɑɑ sɔ̃ɔ yɛ̃sɑn nɔm geun tɔmbu kpuro gurɑmɑ kɑ win sɔm kowo Nɛbukɑnɛsɑɑ, Bɑbilonin sinɑ boko. Kpɑ bu bɛɛn tem mɛn tɔmbu wɔri bu kɑm koosiɑ, kɑ be bɑ bɛɛ sikerenɛ kpuro. Tem mɛ, mu koo kowɑ bɑnsu sere kɑ bɑɑdommɑɔ. Wi u sɑrɔ mi, kpɑ biti yu nùn mwɑ, sere u wiɑ ko.
10 Bɑ ǹ mɑɑ tɔ̃ɔ bɑkɑnun womusu nɔɔmɔ mi, kɑ sere kurɔ kpɑɑnun womusu. Mɛyɑ bɑ ǹ mɑɑ nɑmbun wɔkinu nɔɔmɔ. Bɑ ǹ mɑɑ fitilɑnu wɑsi mi.
11 Tem mɛ kpuro mu koo kowɑ bɑnsu, kpɑ bɛɛ, win tɔmbu, i Bɑbilonin sinɑ boko yoru diiyɑ wɔ̃ɔ wɑtɑ kɑ wɔkuru.
12 Adɑmɑ wɔ̃ɔ wɑtɑ kɑ wɔku ten biru, Yinni Gusunɔ u koo Bɑbilonin sinɑ boko kɑ win tɔmbu seesimɑ ben torɑ ni bɑ kuɑn sɔ̃, kpɑ u ben tem kɑm koosiɑ mu ko bɑnsu sere kɑ bɑɑdommɑɔ.
13 Bɔ̃ri yi u geruɑ tem mɛn sɔ̃, kɑ sere yèn gɑri nɛ, Yeremi nɑ geruɑ nɑ yoruɑ tire te sɔɔ, bwesenu kpuron sɔ̃, yi koo koorɑwɑ.
14 Domi bwese dɑmginu kɑ sinɑm dɑmgibɑ koo bu yoru mwɛɛri. Nge mɛyɑ Gusunɔ u koo kɑ bu ben kɔ̃sɑ kɔsie ye bɑ rɑɑ kuɑ.
Gusunɔ
u koo bwesenu kpuro sɛɛyɑsiɑ
15 Yinni Gusunɔ u win mɔru weesinɑ kɑ tɑm mɛ u doke nɔrɑ sɔɔ u nɛ, Yeremi tĩi u nɛɛ, n ye mɔɔ kpɑ n de bwese nìn mi u mɑn gɔriɔ nu ye nɔ.
16 Bɑ̀ n wɑ mɑ u derɑ yibɛrɛbɑ bɑ bu wɔri bɑ goomɔ, bɑ ko n bɑ̃ɑrimɔwɑ kpɑ bɑ n burisinɛ nge wiirobu.
17 Yerɑ nɑ nɔrɑ ye mwɑ Yinni Gusunɔn nɔmɑn di. Mɑ nɑ derɑ bwese nìn mi u mɑn gɔrɑ nu win mɔru ye nɔrɑ.
18 Nɑ toruɑ nɑ ye Yerusɑlɛmugibu nɔrusiɑ, kɑ Yudɑn wusu kpuron tɔmbu kɑ ben sinɑmbu kɑ ben sinɑ ɑsɑkpɔbu, kpɑ Gusunɔ u wɑ u ben tem kɑm koosiɑ kpɑ wi u sɑrɔ mi, u biti soorɑ sere u wiɑ ko. Kpɑ bɑ n dɑ kɑ ye tɔmbu bɔ̃rusi nge mɛ yɑ koorɑ tɛ̃.
19 Yen biru, nɑ bwese ni nu tiegibu ye nɔrusiɑ. Beyɑ Egibitin sunɔ kɑ win sinɑ ɑsɑkpɔbu, kɑ win tɔmbu kpuro,
20 kɑ bwese tuku ni nu wɑ̃ɑ Egibitiɔ, kɑ Usɑn sinɑmbu, kɑ Filisitibɑn sinɑmbu, beyɑ Asikɑlonigii, kɑ Gɑsɑgii, kɑ Ekoronigii, kɑ sere be bɑ mɑɑ tie Asidɔduɔ, ben sunɔ,
21 kɑ Edɔmubɑ, kɑ Mɔɑbubɑ, kɑ Amɔnigibu,
22 kɑ Tirin sinɑmbu kɑ Sidonin sinɑmbu, kɑ sere sinɑm be bɑ wɑ̃ɑ nim wɔ̃kun berɑ giɔ,
23 kɑ sere mɑɑ Dedɑnigibu, kɑ Temɑgibu, kɑ Busigibu, kɑ be bɑ rɑ wii bɑɑnun seri kɔni,
24 kɑ mɑɑ Dɑɑrububɑn sinɑmbu, kɑ bwesenu kpuron sinɑmbu be bɑ wɑ̃ɑ gbɑburɔ mi yɑni sɛɛri wɑ̃ɑ,
25 kɑ Simirin sinɑmbu kɑ Elɑmun sinɑmbu kɑ sere Mɛdibɑn sinɑmbu,
26 kɑ sinɑm be bɑ wɑ̃ɑ sɔ̃ɔ yɛ̃sɑn nɔm geu giɑ kpuro, be bɑ wɑ̃ɑ turuku kɑ be bɑ tomɑ.
Bwese ni nu gesi wɑ̃ɑ hɑnduniɑ sɔɔ, ni kɑ nin sinɑmbu bɑ mɔru ye nɔrɑ mɑ Bɑbiloni ye bɑ mɑɑ mɔ̀ Sesɑki, yen sinɑ boko u ye dɑkurɑ.
27 Yinni Gusunɔ u mɑɑ mɑn sɔ̃ɔwɑ n Isirelibɑ sɔ̃ɔwɔ n nɛɛ, ɑmɛniwɑ wi, ben Yinni, wi u mɑɑ sɑ̃ɑ wɔllu kɑ tem Yinni u geruɑ. U nɛɛ, bu nɔruo sere yu bu go, bu siruku kpɑ bu wɔruku sere bu kpɑnɑ bu se yèn sɔ̃ u derɑ yibɛrɛbɑ bɑ bu wɔri bɑ goomɔ.
28 U mɑɑ nɛɛ, bwese nin gɑru tɑ̀ n yinɑ tu nɔ ye nɑ tu tĩi, n tu sɔ̃ɔwɔ n nɛɛ, tu nɔruo bɑɑ ǹ n mɛren nɑ. Wi, Gusunɔ wɔllu kɑ tem Yinnin woodɑwɑ.
29 Domi u ǹ win wuu Yerusɑlɛmu deri. Ǹ n mɛn nɑ, u koo bweseru gɑru deri? Aɑwo, u ǹ derimɔ. Bwesenu kpuro sɔɔrɑ u koo win mɔru sure. Wi, Gusunɔ wɔllu kɑ tem Yinniwɑ u yeni geruɑ.
30 U mɑɑ mɑn sɔ̃ɔwɑ u nɛɛ, n bu sɔ̃ɔwɔ n nɛɛ,
wi, Yinni Gusunɔ u koo kukiri wɔllun di.
Win nɔɔ gɑ koo nɔɔrɑ sɑɑ win wɑ̃ɑ yee dɛɛrɑrun di.
U koo win tem kukirisi.
U koo hɑnduniɑgibu kpuro kukirisi
nge tɔn dɑbi te tɑ dĩɑnu gɛ̃ɛmɔ gberɔ.
31 Win kukiribu koo nɔɔrɑ hɑnduniɑ kpuro sɔɔ.
Domi u tɔmbu kpuro sokumɔ win siri gbɑburɔ.
Wi siribu di, u koo yɛ̃ro gowɑ kɑ tɑkobi.
32 Wi Gusunɔ, wɔllu kɑ tem Yinni, u mɑɑ nɛɛ,
win siribu bu ko n sɑ̃ɑwɑ nge woo bɔkɔ
ge gɑ bwesenu kpuro gɑsirimɔ,
gɑ hɑnduniɑn goonu nnɛ kpuro bukiɑnɛ.
33 Be Yinni Gusunɔ u koo de bu gbi siri bi sɔɔ, bɑ ko n tɛriewɑ bɑɑmɑ hɑnduniɑɔ. Goo sɑri wi u koo ben gonu mɛnnɑ u sike, kpɑ bu ben gɔɔ swĩ. Nu koo kowɑ tɑɑki tem sɔɔ.
34 Bɛɛ, win tɔmbun kpɑrobu,
i wuri koowo, i bindio temɔ.
Domi tɔ̃rɑ tunumɑ tè sɔɔ bɑ koo bɛɛ sɑkiri.
I ko i wɔrumɑ i kɔsikirɑ
nge tem mɔn weke burɑru.
35 I ǹ kisirɑmɔ
domi i ǹ kuku yeru wɑsi.
36 Wee, kpɑro ben wuri yi koo nɔɔrɑ
domi Yinni Gusunɔ u koo ben tem kɑm koosiɑ
37 kɑ win mɔru bɑkɑ.
Tem mɛ, mu wɑ̃ɑ bɔri yɛndu sɔɔ,
ɑdɑmɑ mu koo ko bɑnsu.
38 Nge mɛ gbee sunɔ gɑ rɑ yɑri gen wɑ̃ɑ yerun di
gu kɑ dĩɑnu kɑsu,
nge mɛyɑ Yinni Gusunɔ u koo yɑri win wɑ̃ɑ yerun di,
u de bwesenu nu goonɑ
kpɑ tem mu tɔmbu biɑ win mɔru bɑkɑn sɔ̃.