26
Yeremi u wɑ̃ɑ Yudɑbɑn
wirugibun wuswɑɑɔ
1 Ye Yoyɑkimu, Yosiɑsin bii Yudɑn sinɑ boko u bɑndu di, yen sɔ̃ɔ mɛɛ terɑ Yinni Gusunɔ u kɑ Yeremi gɑri yini kuɑ u nɛɛ,
2 ɑmɛniwɑ nɛ, Yinni Gusunɔ nɑ geruɑ nɑ nɛɛ, ɑ yɔ̃ro sɑ̃ɑ yerun yɑɑrɑ mini. Tɔn be bɑ koo nɑ sɑɑ Yudɑn wusu kpuron di bu kɑ mɑn sɑ̃, kpɑ ɑ bu gɑri yi kpuro sɔ̃ yi nɑ nɛɛ, ɑ bu sɔ̃. Bɑɑ yin tiɑ ɑ ku rɑ bure.
3 Bɑ̀ n wurɑ bɑ nun swɑɑ dɑki, mɑ bɑ wurɑ ben dɔɔ sɔɔ, bɑ ben kom kɔ̃sum deri, kɔ̃sɑ ye nɑ rɑɑ gɔ̃ru doke n bu kuɑ, kon ye deri.
4 A bu sɔ̃ɔwɔ ɑ nɛɛ, ɑmɛniwɑ nɛ, Yinni Gusunɔ nɑ geruɑ. Nɑ nɛɛ, bu mɑn swɑɑ dɑkio bu nɛn woodɑbɑ swĩi ye nɑ bu wɛ̃,
5 kpɑ bu ku nɛn gɔrobun gɑri ɑtɑfiiru ko. Nɑ rɑ be bu gɔrie sɑɑ yellun di, ɑdɑmɑ bɑ ǹ bu swɑɑ dɑki.
6 Yen sɔ̃, kon sɑ̃ɑ yee te kɑm koosiɑ nge mɛ nɑ Silogiru kuɑ, kpɑ n de bwesenu kpuro nu wuu gen yĩsiru siɑ nù n bɔ̃rumɔ.
7 Yɑ̃ku kowobu kɑ Gusunɔn sɔmɔbu kɑ wuun tɔmbu bɑ Yeremin gɑri yi nuɑ yi u gerumɔ Yinni Gusunɔn sɑ̃ɑ yerɔ.
8 Ye u gɑri yi geruɑ u kpɑ yi Yinni Gusunɔ u nùn yiire u tɔn be kpuro sɔ̃ mi, yerɑ yɑ̃ku kowo be, kɑ Gusunɔn sɔmɔ be, kɑ sere wuun tɔn be bɑ tie kpuro bɑ nɑ bɑ nùn sɛ̃re. Bɑ gbɑ̃sukumɔ bɑ mɔ̀, kɑɑ gbiwɑ.
9 Tɔmbu kpuro bɑ nɑ bɑ Yeremi mɛnnɛ Yinni Gusunɔn sɑ̃ɑ yeru mi, bɑ mɔ̀, mbɑn sɔ̃nɑ ɑ gerumɔ kɑ Yinni Gusunɔ yĩsiru ɑ mɔ̀, sɑ̃ɑ yee teni tɑ koo kɑm kowɑ nge Silogiru, kpɑ Yerusɑlɛmu yu ko bɑnsu.
10 Ye Yudɑn wirugibu bɑ nuɑ mɛ, yerɑ bɑ seewɑ sinɑ kpɑɑrun di bɑ dɑ Yinni Gusunɔn sɑ̃ɑ yerɔ, mɑ bɑ sinɑ sɑ̃ɑ yee ten kɔnnɔwɔ ge bɑ sokumɔ kɔnnɔ kpɔɔ.
11 Mɑ yɑ̃ku kowo be, kɑ Gusunɔn sɔmɔ be, bɑ wirugibu kɑ tɔn be bɑ tie kpuro sɔ̃ɔwɑ bɑ nɛɛ, n weenɛwɑ bu durɔ wini go. Domi gɑri kɑmwɑ u wuu geni gerusimɔ. Bɛɛn tii i mɑɑ yi nuɑ kɑ bɛɛn swɑɑ.
12 Mɑ Yeremi u wirugii be kɑ tɔn be kpuro sɔ̃ɔwɑ u nɛɛ, Yinni Gusunɔwɑ u mɑn gɔrimɑ n kɑ gɑri ko sɑ̃ɑ yee teni kɑ wuu genin sɔ̃, nge mɛ i nuɑ kpuro.
13 I gɔ̃ru gɔsio kpɑ i kom kɔ̃sum deri. I Gusunɔ bɛɛn Yinnin gɑri swɑɑ dɑkio, kpɑ u kɔ̃sɑ ye deri ye u rɑɑ kĩ u bɛɛ kuɑ.
14 Adɑmɑ nɛ wee bɛɛn nɔmɑɔ, i kɑ mɑn koowo nge mɛ n bɛɛ dɛnde.
15 I yɛ̃ mɑ nɑ ǹ tɑɑrɛ gɑɑ mɔ. Yen sɔ̃, ì n mɑn go, nɛn yɛm mu kuɑ bɛɛ kɑ bɛɛn wuu gen sɔmunu. Domi kɑ gem Yinni Gusunɔwɑ u mɑn gɔrimɑ n kɑ bɛɛ gɑri yini kpuro sɔ̃.
16 Yerɑ wirugii be, kɑ tɔn be bɑ tie bɑ yɑ̃ku kowo be, kɑ sɔmɔ be sɔ̃ɔwɑ bɑ nɛɛ, n ǹ weenɛ su durɔ wi go domi kɑ Gusunɔ bɛsɛn Yinnin yĩsirɑ u gɑri yini geruɑ.
17 Mɑ wuu gen guro gurobu gɑbu bɑ seewɑ bɑ tɔn wɔru ge sɔ̃ɔwɑ bɑ nɛɛ,
18 Misee Mɔresɛtigii u rɑɑ Gusunɔn gɑri geruɑ Yudɑn sinɑ boko Esekiɑsin wɑɑti u nɛɛ, ɑmɛniwɑ Gusunɔ, wɔllu kɑ tem Yinni u geruɑ. U nɛɛ,
bɑ koo Yerusɑlɛmu bwiiyɑ nge gberu,
kpɑ yu ko nge kpee ni bɑ subɑ,
kpɑ guu tèn wɔllɔ bɑ Yinni Gusunɔn sɑ̃ɑ yee te bɑnɑ,
tu dɑ̃nu kpi n ko dɑ̃ɑ sɔ̃ɔ bɔkɔ.
19 Yudɑbɑ kɑ ben sinɑ boko Esekiɑsi wi, bɑ Misee wi go? Esekiɑsi wi, u ǹ Yinni Gusunɔ nɑsie? Nge u ǹ Yinni Gusunɔ suuru kɑnɛ ro? Mɑ Yinni Gusunɔ u kɔ̃sɑ ye deri ye u rɑɑ kĩ u bu kuɑ. Yerɑ i ko de bɛsɛ, su tii durum bɑkɑ yeni sɔbi?
Yoyɑkimu
u Gusunɔn sɔmɔ Uri go
20-21 N deemɑ Yoyɑkimun wɑɑti ye sɔɔ, durɔ goo mɑɑ wɑ̃ɑ wi bɑ mɔ̀ Uri, Semɑyɑ Kiriɑti Yɑrimugiin bii. Durɔ wi, u rɑ gɑri gere kɑ Yinni Gusunɔn yĩsiru. Mɑ u gɑri tee yi geruɑ win tii, wuu genin sɔ̃ nge mɛ Yeremi u geruɑ mi. Mɑ Yoyɑkimu kɑ win tɑbu durɔbu kɑ mɑɑ win sinɑ ɑsɑkpɔbu bɑ gɑri yi nuɑ. Yerɑ sinɑ boko wi, u kɑsu u Uri go. Ye Uri u nuɑ mɛ, u bɛrum soorɑ, mɑ u kpikiru suɑ u dɑ Egibitiɔ.
22 Yerɑ Yoyɑkimu u Ɛlinɑtɑni Akɑborin bii gɔrɑ Egibitiɔ kɑ tɔmbu gɑbu sɑnnu bu kɑ Uri mwɑɑmɑ.
23 Mɑ bɑ Uri wi mwɑɑmɑ bɑ kɑ nùn nɑ sinɑ bokon mi. Mɑ u derɑ bɑ nùn go kɑ tɑkobi. Yerɑ bɑ win goru kɑre mi bɑ rɑ tɔn dirobu sike.
24 Adɑmɑ Akikɑmu Sɑfɑnin bii u yɔ̃rɑwɑ kɑ Yeremi mɑ u yinɑ bu tɔn be Yeremi nɔmu bɛriɑ bu go.