44
Gɑri yi Yinni Gusunɔ u Yudɑ
be bɑ kpikiru dɑ Egibitiɔ
sɔ̃ɔwɑ
1 Yinni Gusunɔ u Yudɑ be bɑ wɑ̃ɑ Migidoliɔ kɑ Tɑpɑnɛsiɔ kɑ Mɛnfisiɔ kɑ Pɑturɔsiɔ Egibitin temɔ sɔ̃ɔwɑ sɑɑ Yeremin min di u nɛɛ,
2 wee, ye nɛ Gusunɔ, wɔllu kɑ tem Yinni nɑ geruɑ. Nɑ nɛɛ, i kɔ̃sɑ ye kpuro wɑ ye nɑ Yerusɑlɛmu kuɑ kɑ Yudɑn wuu si su tie. Wee, su kuɑ bɑnsu. Goo mɑɑ sɑri mi.
3 Domi bɑ kɔ̃sɑ kuɑ bɑ nɛn mɔru seeyɑ ye bɑ kɑ dɑ bɑ bũnu yɑ̃kunu kuɑmmɛ ni bɛɛ kɑ bɛɛn bɑɑbɑbɑ i ǹ dɑɑ yɛ̃.
4 Nɑ bɛɛ nɛn sɔmɔbu gɔriɑ sɑɑ yellun di bu kɑ bɛɛ sɔ̃, i ku sɑ̃ɑ kɔ̃su nini ko, ni nɛn tii nɑ tusɑ.
5 Adɑmɑ i ǹ mɑn swɑɑ dɑki. I ǹ bɛɛn kom kɔ̃sum deri. I ǹ mɑɑ bũu yɑ̃ku kobu deri.
6 Mɑ nɑ kɑ bɛɛ mɔru kuɑ gem gem. Nɑ Yudɑn wusu kɑ Yerusɑlɛmun swɛɛ kpeerɑsiɑ mɑ ye kpuro yɑ kuɑ bɑnsu, nge mɛ i wɑɑmɔ gisɔ.
7 Yen sɔ̃ tɛ̃, ɑmɛniwɑ nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ geruɑ. Nɑ nɛɛ, mbɑn sɔ̃nɑ i tii durum bɑkɑ yeni sɔbimɔ ye i kɑ derɑ bɑ kurɔbu kɑ durɔbu kɑ bibu kɑ bii wɛ̃ɛnu go sere goo kun mɑɑ tie.
8 I kĩwɑ i nɛn mɔru seeyɑ kɑ bɛɛn bũu yɑ̃ku kookoo si i mɔ̀ Egibitiɔ mi i wɑ̃ɑ? I kĩwɑ i tii kɑm ko, kpɑ i ko bɔ̃rigibu kɑ sekurugibu hɑnduniɑ ye sɔɔ?
9 I duɑriwɑ kɔ̃sɑ ye bɛɛn bɑɑbɑbɑ kɑ bɛɛn sinɑmbu kɑ ben kurɔbu kɑ bɛɛn tii kɑ bɛɛn kurɔbu i kuɑ Yudɑɔ kɑ Yerusɑlɛmuɔ?
10 Wee, sere kɑ tɛ̃ i ǹ tii kɑwe i gɔ̃ru gɔsie. I ǹ mɑn nɑsie, i ǹ mɑɑ nɛn woodɑbɑ swĩi ye nɑ bɛɛ kɑ bɛɛn bɑɑbɑbɑ wɛ̃.
11 Yen sɔ̃nɑ nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ nɑ bɛɛ biru kisi mɑ nɑ bɛɛ kɔ̃sɑ kuɑ n kɑ bɛɛ Yudɑbɑ kpuro kɑm koosiɑ.
12 Kon Yudɑ be bɑ kpikiru dɑ Egibitiɔ kɑm koosiɑ. Egibiti miyɑ bɑ koo gbi kpuro. Bɑ ǹ goo buremɔ. Bɑ koo gbiwɑ tɑbu sɔɔ, kɑ gɔ̃ɔru sɔɔ kpɑ bu bu gɛm bu sekuru wɑ, kpɑ bɑ n dɑ ben yĩsiru sie bu kɑ goo bɔ̃rusi, ǹ kun mɛ bu nùn gɑ̃ɑ kɔ̃sunu gerusi.
13 Kon bu sɛɛyɑsiɑwɑ nge mɛ nɑ Yerusɑlɛmugibu sɛɛyɑsiɑ kɑ tɑbu, kɑ gɔ̃ɔru, kɑ mɑɑ bɑrɑnu.
14 Kon de ben fiiko bu kpikiru su. Be bɑɑsi, goo kun kisirɑmɔ. Goo kun mɑɑ wee Yudɑn temɔ bɑɑ mɛ bɑ ko n kĩ bu wurɑmɑ ɑmɛn biru.
Bɑ Asitɑɑte yɑ̃kuru kuɑmmɛ
15 Yerɑ be kpuro be bɑ yɛ̃ mɑ ben kurɔbu bɑ rɑ bũnu turɑre dɔ̃ɔ dokeye kɑ tɔn kurɔ dɑbinu kpuro be bɑ wɑ̃ɑ mi, kɑ tɔn dɑbi te tɑ tie Pɑturɔsiɔ, Egibitin tem mi, bɑ Yeremi sɔ̃ɔwɑ bɑ nɛɛ,
16 sɑ ǹ gɑri yi mɛm nɔɔwɑmmɛ yi ɑ geruɑ ɑ nɛɛ, yi weewɑ Yinni Gusunɔn min di.
17 Sɑ ko kowɑ nge mɛ sɑ geruɑ, su bũu wi bɑ mɔ̀ Asitɑɑte turɑre dɔ̃ɔ dokeɑ, kpɑ su mɑɑ nùn tɑm tɑ̃rɑ nge mɛ sɑ rɑ rɑɑ ko, bɛsɛ kɑ bɛsɛn bɑɑbɑbɑ, kɑ bɛsɛn sinɑmbu kɑ bɛsɛn wirugibu Yudɑn wusu sɔɔ kɑ Yerusɑlɛmun swɛɛ sɔɔ. Domi sɑɑ ye sɔɔrɑ sɑ rɑ wɑ su di su debu, sɑ n nuku dobu mɔ kpɑ sɑ kun wɑhɑlɑ gɑɑ wɑ.
18 Adɑmɑ sɑɑ dɔmɑ tèn di sɑ ǹ mɑɑ bũu wi turɑre dɔ̃ɔ dokeɑre, sɑ ǹ mɑɑ nùn tɑm tɑ̃rɑre, sɑɑ min diyɑ sɑ kpuro biɑ. Tɑbu sun di, mɑ gɔ̃ɔrɑ sun go.
19 Mɑ tɔn kurɔ be, bɑ geruɑ bɑ nɛɛ, sɑnɑm mɛ sɑ bũu wi yɑ̃kunu kuɑmmɛ, kɑ bɛsɛn durɔbun yɛ̃rɑ. Bɑ yɛ̃ mɑ sɑ rɑ bũu wi kirɑru kue su kɑ nùn bɛɛrɛ wɛ̃, kpɑ su nùn tɑm tɑ̃rɑ temɔ.
20 Mɑ Yeremi u tɔn be kpuro wisɑ, kurɔbu kɑ durɔbu, u nɛɛ,
21 bɛɛ kɑ bɛɛn bɑɑbɑbɑ kɑ bɛɛn sinɑmbu kɑ bɛɛn wirugibu, i rɑ bũu yɑ̃kunu kue Yudɑn wusu sɔɔ kɑ Yerusɑlɛmun swɛɛ sɔɔ. Nge weesɑ? I tɑmɑɑ Yinni Gusunɔ kun ye yɛ̃? Nge i tɑmɑɑ u ye duɑriwɑ.
22 Aɑwo, u ǹ ye duɑri. U kɑ bɛɛ wɑsirɑwɑ bɛɛn kom kɔ̃sum sɔ̃ kɑ dɑɑ kɔ̃sɑ ye i kuɑn sɔ̃. Yen sɔ̃nɑ bɛɛn tem mu kuɑ bɑnsu. Goo mɑɑ sɑri mɛ sɔɔ. Mɑ mu kuɑ tem bɔ̃rurɑm nge mɛ sɑ wɑɑmɔ gisɔ.
23 Wɑhɑlɑ ye, yɑ bɛɛ deemɑmɔwɑ gisɔ yèn sɔ̃ i bũnu yɑ̃kuru kuɑ mɑ i Yinni Gusunɔ torɑri i ǹ win gere wure, i ǹ mɑɑ win sɔ̃ɔsinu kɑ win woodɑbɑ kɑ win kirɔbɑ swĩi.
24 Yeremi u mɑɑ tɔn be kpuro, kurɔbu kɑ durɔbu, sɔ̃ɔwɑ u nɛɛ, bɛɛ Yudɑbɑ, bɛɛ be i wɑ̃ɑ Egibitiɔ, i swɑɑ dɑkio i nɔ ye Yinni Gusunɔ u geruɑ.
25 Wee ye Gusunɔ Isirelibɑn Yinni wi u wɔllu kɑ tem mɔ u geruɑ. U nɛɛ, bɛɛ kɑ bɛɛn kurɔbu, i nɛɛ, i ko i bɛɛn nɔɔ mwɛɛnu yibiɑ ni i bũu tɔn kurɔ wi bɑ mɔ̀ Asitɑɑte kuɑ. Wiyɑ i ko i turɑre dɔ̃ɔ dokeɑ, kpɑ i mɑɑ nùn tɑm tɑ̃rɑ temɔ. Wee, i mɑɑ ye kuɑ.
26 Yen sɔ̃ tɛ̃, i swɑɑ dɑkio i nɔ ye wi, Yinni Gusunɔ u bɛɛ sɔ̃ɔmɔ. U bɔ̃rumɔ kɑ win yĩsi bɑkɑru mɑ Egibitin tem kpuro sɔɔ, Yudɑ goo kun mɑɑ bɔ̃rumɔ kɑ win yĩsiru u nɛɛ, sere kɑ Yinni Gusunɔn wɑ̃ɑru.
27 U koo dewɑ kɔ̃sɑ yu bɛɛ deemɑ, n ǹ mɔ geɑ. Yudɑ be bɑ wɑ̃ɑ Egibitiɔ kpuro, bɑ koo gbiwɑ tɑbu sɔɔ kɑ gɔ̃ɔru sɔɔ.
28 Kɑ mɛ, bɛɛn fiiko bɑ koo kisirɑ tɑbun di, kpɑ bu wurɑmɑ Yudɑɔ. Sɑɑ yerɑ, bɛɛ be i dɑ mi kpuro i ko i giɑ ǹ n nɛn gɑrin nɑ yi koorɑ, ǹ n mɑɑ bɛɛgiin nɑ yi koorɑ.
29 U koo bɛɛ deemɑ Egibiti mi, kpɑ u bɛɛ yĩreru wɛ̃ te tɑ koo bɛɛ sɔ̃ɔsi mɑ kɔ̃sɑ ye u rɑɑ geruɑ yɑ koo nɑwɑ kɑ gem. Yĩre terɑ,
30 u koo Egibitin sunɔ Hofɑrɑ win yibɛrɛbɑ nɔmu bɛriɑ be bɑ kɑsu bu nùn go, nge mɛ u Yudɑbɑn sinɑ boko Sedesiɑsi Nɛbukɑnɛsɑɑ nɔmu bɛriɑ, wi, wi u kɑsu u nùn go. Yinni Gusunɔwɑ u yeni geruɑ.