46
1 Gɑri yiniwɑ Yinni Gusunɔ u Yeremi sɔ̃ɔwɑ bwese tukunun sɔ̃.
Bɑ Egibitigibu kɑmiɑ
Kɑɑkemisiɔ
2 Bɑbilonin sinɑ boko u Egibitin sunɔ Nɛko kɑ win tɑbu kowobu kɑmiɑ Kɑɑkemisiɔ, Efɑrɑtin dɑɑrun bɔkuɔ. N deemɑ sɑɑ ye sɔɔ, Yoyɑkimu, Yosiɑsin bii, Yudɑbɑn sinɑ bokon bɑndun wɔ̃ɔ nnɛse sɔɔrɑ mi. Sɑɑ ye sɔɔrɑ Yinni Gusunɔ u gɑri yini geruɑ Egibitin sinɑ boko kɑ win tɑbu kowobun sɔ̃ u nɛɛ,
3 wee Egibitin tɑbu sinɑmbu bɑ kuuki mɔ̀ bɑ mɔ̀,
i tɛrɛnu sɔɔru koowo,
bɑkɑnu kɑ piiminu,
kpɑ i se i tɑbu dɑ.
4 I bɛɛn tɑbu kɛkɛ be dumi gɑwe sɔɔru koowo.
Bɛɛ mɑɑsɔbu, i bɛɛn dumi yɔɔwo,
kpɑ i bɛɛn tɑbu furɔsu doke.
I bɛɛn yɑɑsi sunkuo yi bɑlli,
kpɑ i bɛɛn tɑrɑkpenu sebe.
5 Adɑmɑ mbɑ Yinni Gusunɔ u sere wɑɑmɔ yɑ koorɑmɔ ben suunu sɔɔ.
U nɛɛ, be wee bɑ mwiɑ kpɑnɑ bɑ biruku yirɑ wurɑmɔ.
Bɑ ben tɑbu durɔbu kɑmiɑ.
Mɑ bɑ duki mɔ̀, bɑ ǹ mɑm biru mɛɛrimɔ.
Tem mɛ kpuro mu bɛrum duurɑ.
6 Kɑm sɔɔrɑ be bɑ sɑ̃u bɑ duki mɔ̀.
Bɑɑ tɑbu durɔ dɑmgibu bɑ̀ n duki suɑ kɑmɑ.
Domi sɔ̃ɔ yɛ̃sɑn nɔm geu giɑ, Efɑrɑtin dɑɑrun bɔkuɔ,
dɑbiru tɑ sokurɑmɔ tɑ wɔrukumɔ.
7 Wɑrɑ u kɑ dɑɑ te bɑ mɔ̀ Nilu weenɛ tɑ̀ n yibɑ.
Wɑrɑ u kɑ tu weenɛ sɑnɑm mɛ ten torɑ bɔ.
8 Egibitigibɑ bɑ kɑ tu weenɛ.
Domi bɑ nɛɛ, nge mɛ Nilun nim mu rɑ tɛrie kɑ dɑm tem sɔɔ,
nge mɛyɑ ben tɑbu kowobu bɑ koo mɑɑ tɛriɑ tem sɔɔ,
kpɑ bu wusu kɑ sin tɔmbu kɑm koosiɑ.
9 Wee bɑ mɔ̀, ben mɑɑsɔbu bu seewo fuuku.
Be bɑ tɑbu kɛkɛ be dumi gɑwe duɑ,
bu duki doo.
Ben tɑbu durɔbu bu seewo.
Puti kɑ Kusin tɑbu durɔbu be bɑ tɛrɛ piiminu nɛni,
kɑ sere Ludibɑ be bɑ sɑ̃ɑ tɛn towobu,
bu seewo.
10 Adɑmɑ tɔ̃ɔ teni, tɑ ko n sɑ̃ɑwɑ Gusunɔ, wɔllu kɑ tem Yinnigiru.
Tɑ ko n sɑ̃ɑwɑ tè sɔɔ u win yibɛrɛbɑ mɔru kɔsiemɔ.
Tɑkobi yɑ koo tɔmbu di,
kpɑ yu yɛm debu.
Tɔn dɑbi te yɑ koo go,
Gusunɔ wɔllu kɑ tem Yinnin sɔ̃,
tɑ ko n kpĩ nge yɑ̃ku yɑɑ
Efɑrɑtin dɑɑrun goorɔ,
sɔ̃ɔ yɛ̃sɑn nɔm geu giɑ.
11 Bɛɛ Egibitigibun tɑbu kowobu,
bɑɑ ì n seewɑ i dɑ Gɑlɑdiɔ i tim kɑsu, kɑmɑ.
Bɛɛn mɛɛrɑ yɑ ǹ kpeemɔ.
12 Bwesenu kpuro nu koo nɔ
nge mɛ bɑ bɛɛ sekuru doke.
Domi bɑ koo bɛɛn dɛsirun kuuki nɔ bɑɑmɑ.
Bɛɛn tɑbu durɔbu bɑ ko n bɑ̃ɑrimɔwɑ.
Bɑ̀ n yinnɑ, bɑ koo wɔrukuwɑ sɑnnu.
Nɛbukɑnɛsɑɑ u Egibiti wɔri
13 Gɑri yiniwɑ Yinni Gusunɔ u Yeremi sɔ̃ɔwɑ sɑnɑm mɛ Bɑbilonin sinɑ boko, Nɛbukɑnɛsɑɑ u nɑ u Egibiti wɔri. U nɛɛ,
14 ɑ Egibitigibu nɔɔsio
kɑ be bɑ wɑ̃ɑ yen wuu si bɑ mɔ̀ Migidoli, kɑ Mɛnfisi, kɑ Tɑpɑnɛsi sɔɔ,
ɑ nɛɛ, ben bɑɑwure u seewo u sɔɔru ko.
Domi bɑ bu tɑbu wɔrimɑ bɑɑmɑn di.
15 Ben tɑbu durɔ dɑmgibu bɑ wɔrukɑ.
Bɑ ǹ kpĩɑ bɑ kɑ tii yinɛ.
Nɛ, Yinni Gusunɔwɑ nɑ bu fukɑ.
16 Nɑ derɑ ben tɑbu kowo dɑbiru tɑ sokurɑ tɑ wɔrukɑ.
Mɑ bɑ mɔ̀, bu seewo bu wurɑ ben temɔ
mi bɑ bu mɑrɑ, mi tɑbu sɑri.
17 Nɛ, Yinni Gusunɔ nɑ nɛɛ,
bu Egibitin sunɔ yĩsi kpɑɑru kɛ̃ɛyɔ
bu nɛɛ, woo kɑnɔ.
U derɑ sɑɑ geɑ nùn doonɑri.
18 Nɛ Gusunɔ, wɔllu kɑ tem Yinni,
nɛ wi nɑ sɑ̃ɑ sinɑ boko,
sere kɑ nɛn wɑ̃ɑru,
nge mɛ bɑ yɛ̃ mɑ guu te bɑ mɔ̀ Tɑbori
tɑ guu ni nu tie gunum kere,
kɑ nge mɛ bɑ yɛ̃ mɑ guu te bɑ mɔ̀ Kɑɑmɛli
tɑ wɑ̃ɑ nim wɔ̃kun bɔkuɔ,
nge mɛyɑ bɑ n yɛ̃ kɑm kɑm
mɑ yibɛrɛbɑ bɑ koo nɑ bu bu wɔri.
19 Bɛɛ Egibitigibu, i sɔɔru koowo i bɛɛn yɑ̃nu gurɑ,
bɑ koo bɛɛ yoru mwɛɛri.
Domi wee, Mɛnfisi yɑ koo ko bɑnsu.
Goo kun mɑɑ sinɑmɔ ye sɔɔ.
20 Bɛɛ Egibitigibu, i sɑ̃ɑwɑ nge nɑɑ gbiibɑ ye yɑ wɑ̃.
Adɑmɑ wee, dɑru swɑ̃ɑ gɑɑ yɑ wee
sɑɑ sɔ̃ɔ yɛ̃sɑn nɔm geu giɑn di,
yu ye wɔri.
21 Bɛɛn tɑbu kowo be bɑ rɑ bɛɛ somi gobin sɔ̃,
bɑ bɔɔru nge nɑɑ gumgiɑ.
Kɑ mɛ, ben tii bɑ koo biruku yirɑ wurɑ
bu duki yɑkikirɑ.
Domi nɔni swɑ̃ɑrɑ koo bu wɔri.
Ben sɛɛyɑsiɑbun sɑɑ yɑ turɑ.
22 Egibitigibɑ duki mɔ̀
nge wɛɛ yi yi doonɔ wɔkinu sɑri.
Domi yibɛrɛbɑ bɑ bu wɔrimɔ bɑ suririmɔ,
nge dɑ̃ɑ buro wi u dɑ̃ɑ suririmɔ kɑ gbɑ̃ɑ, dɑ̃ɑ sɔ̃ɔwɔ.
23 Bɑɑ mɛ ben dɑ̃ɑ sɔ̃ɔ gɑ kpɑ̃
sere goo kun kpɛ̃ u du mi,
kɑ mɛ, bɑ koo gu bɔɔriwɑ.
Domi yibɛrɛ be, bɑ twee dɑbiru kere.
Goo kun kpɛ̃ u ben geeru giɑ.
Nɛ, Yinni Gusunɔwɑ nɑ yeni geruɑ.
24 Egibitigibɑ wɑ̃ɑ sekuru sɔɔ.
Domi wee, bɑ bu sɔ̃ɔ yɛ̃sɑn nɔm geugibu nɔmu sɔndiɑ.
25 Nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ mɑɑ nɛɛ, kon bũu wi bɑ mɔ̀ Amɔɔ sɛɛyɑsiɑ wi u wɑ̃ɑ Tebɛsiɔ, kɑ Egibitin sunɔ, kɑ Egibitigibu kpuro kɑ ben bũnu kɑ ben sinɑmbu, kɑ sere mɑɑ be bɑ Egibitin sunɔ wi nɑɑnɛ sɑ̃ɑ.
26 Kon bu Nɛbukɑnɛsɑɑ, Bɑbilonin sinɑ boko kɑ win sɔm kowobu nɔmu bɛriɑ, be bɑ kɑsu bu bu go.
Adɑmɑ yenibɑn biru, Egibiti yɑ koo wurɑmɑ nge yellu. Yeniwɑ nɛ, Yinni Gusunɔ nɑ geruɑ.
Yinni Gusunɔ
u koo Isirelibɑ yɑkiɑ
(I mɑɑ mɛɛrio 30:10-11)
27 Yinni Gusunɔ u nɛɛ,
bɛɛ Isirelibɑ, Yɑkɔbun bweseru,
bɛɛ, nɛn sɔm kowobu,
i ku bɛrum ko, i ku mɑɑ nɑndɑ.
Domi kon bɛɛ wɔrɑmɑ sɑɑ tontonden di.
Kon bɛɛn bweseru yɑkiɑmɑ sɑɑ yorun di.
I ko i wurɑmɑ i wɛ̃rɑ,
i n wɑ̃ɑ bɔri yɛndu sɔɔ.
Goo kun mɑɑ bɛɛ nɔni sɔ̃ɔmɔ.
28 I ku bɛrum ko.
Domi nɑ wɑ̃ɑ kɑ bɛɛ.
Kon bwese ni kpuro kpeerɑsiɑ,
nìn suunu sɔɔ nɑ rɑɑ bɛɛ yɑrinɑsiɑ mi.
Adɑmɑ bɛɛ, nɑ ǹ bɛɛ kpeerɑsiɑmɔ.
Kon bɛɛ sɛɛyɑsiɑwɑ nge mɛ n weenɛ,
domi nɑ ǹ kpɛ̃ nɑ kun bɛɛ sɛɛyɑsie.