5
Yerusɑlɛmugibun torɑru
1 Yinni Gusunɔ u nɛɛ,
bɛɛ Yerusɑlɛmugibu, i bɛɛn swɛɛ kpuro swĩiyɔ.
I doo kɑ mi tɔmbɑ rɑ mɛnnɛ i kɑsu
ì n ko i goo wɑ wi u rɑ ko dee dee
mɑ u rɑ gem gere.
Ì n yɛ̃ro wɑ,
sɑɑ ye sɔɔrɑ nɛ, Yinni Gusunɔ, kon bɛɛn durum wɔkɑ.
2 Mɑ Yeremi u nɛɛ,
wee, bɑ rɑ n bɔ̃rumɔ bɑ n mɔ̀,
kɑ Yinni Gusunɔn wɑ̃ɑru,
ɑdɑmɑ weesu sɔɔrɑ bɑ bɔ̃ri yi mɔ̀.
3 Yinni, n ǹ wi u gem swĩi, wiyɑ ɑ kɑsu?
Wee, ɑ bu surɑ ɑdɑmɑ bɑ nun ɑtɑfiiru kuɑ.
A bu nɔni sɔ̃ɔwɑ, ɑdɑmɑ kɑ mɛ, bɑ ǹ gɑ̃ɑnu gie.
Ben gɔ̃ru gɑ bɔbiɑwɑ nge kperu.
Bɑ yinɑ bu wurɑmɑ wunɛn mi.
4 Mɑ nɑ nɛɛ, bɑ sɑ̃ɑwɑ nge bibu,
bɑ mɔ̀wɑ nge gɑri bɑkɑsu.
Domi bɑ ǹ wunɛn swɛɛ yɛ̃,
bɑ ǹ mɑɑ wunɛn woodɑbɑ yɛ̃.
5 Kon gɔsirɑ n dɑ be bɑ bukuren mi,
kpɑ n kɑ bu gɑri ko.
Domi be, bɑ wunɛn swɛɛ yɛ̃,
bɑ mɑɑ wunɛn woodɑbɑ yɛ̃.
Wee, ben tii bɑ nun yinɑ
nge yɑ̃ɑ te tɑ wɛ̃ɛ yinɑ
mɑ tɑ yi kɑsukɑ.
6 Yen sɔ̃nɑ bɑ̀ n duɑ dɑ̃ɑ sɔ̃ɔwɔ,
gbee sinɑnsu su rɑ bu go.
Bɑ̀ n duɑ yɑkɑsɔ,
gbeeku bɔ̃nu nu rɑ bu go.
Mɑ musuku gbeeku gɑ rɑ bu yɔɔru bwɛ̃ɛyɛ
ben wuun gbɑ̃rɑrun kɔnnɔwɔ,
be bɑ yɑrɑ min di,
gu kɑ bu sɛ̃re gu kɑsuku.
Domi ben torɑnu nu dɑbiɑ.
Ben nɑɑnɛ sɑriru tɑ kpɑ̃.
7 Yinni Gusunɔ u nɛɛ,
mbɑn sɔ̃nɑ kon nɛn tɔmbun durum wɔkɑ.
Domi wee, bɑ mɑn deri
mɑ bɑ bɔ̃rumɔ kɑ bũnun yĩsinu.
Nɑ bu debiɑ,
ɑdɑmɑ bũnɑ bɑ kɑ ɑrukɑwɑni bɔkuɑ
bɑ nu gɑsirimɔ.
8 Bɑ sɑ̃ɑwɑ nge dum dwɛɛ yi yi debɑ
yi wuri mɔ̀ yi kurɔbu gire.
Nge mɛyɑ bɑ rɑ n ben berusebun kurɔbu nɑɑ gire,
bɑ n kpeeki mɔ̀.
9 Mbɑn sɔ̃nɑ nɑ ǹ ko n bwese teni mɔru kɔsie,
kpɑ n tu sɛɛyɑsiɑ yenin sɔ̃.
10 Nɛ, Yinni Gusunɔ,
kon bu yibɛrɛbɑ suremɑ,
be, be bɑ sɑ̃ɑ nge nɛn resɛm gbɑɑru.
Bɑ koo ten kɑrɑ surɑ
kpɑ bu ten dɑ̃ɑ kɑ̃ɑsi bɔɔri yi yi ǹ sɑ̃ɑ nɛgii.
Adɑmɑ bɑ ǹ gbɑɑ te kɑm koosiɑmɔ kpuro.
11 Mɛyɑ kon ko domi Isirelibɑ kɑ Yudɑbɑ
bɑ ǹ kɑ nɛ turo yɔ̃re.
Nɛ, Yinni Gusunɔwɑ nɑ yeni geruɑ.
Ye yɑ koo Isirelibɑ deemɑ
12 Yinni Gusunɔ u nɛɛ,
Isirelibɑ bɑ mɑn siki
bɑ nɛɛ, nɑ ǹ dɑm gɑm mɔ.
Kɔ̃sɑ kun mɑɑ bu deemɑmɔ.
Bɑ ǹ tɑbu wɑsi,
bɑ ǹ mɑɑ gɔ̃ɔru wɑsi.
13 Nɛn sɔmɔbun gɑri yi mɑɑ sɑ̃ɑwɑ nge wom dirum.
Ben goo ku rɑ bu gɑri gee sɔ̃.
Bɑ mɑɑ gerumɔ bɑ mɔ̀,
sɔmɔ ben gɑri yi wɔri ben tii sɔɔ.
14 Yen sɔ̃, nɛ, Gusunɔ, wɔllu kɑ tem Yinni,
nɑ nɛɛ, ye bɑ kɑ geruɑ mɛ,
wee, nɛn gɑri yi ko n sɑ̃ɑ nge dɔ̃ɔ wunɛ Yeremin nɔɔ sɔɔ,
kpɑ nɛn tɔn be, bɑ n sɑ̃ɑ nge dɑ̃ɑ ye dɔ̃ɔ wi, u koo mwɑ.
15 Tɛ̃ bɛɛ nɛn tɔmbu, Isirelibɑ,
kon bɛɛ bweseru gɑru suremɑ tontonden di.
Bwese te, tɑ dɑm mɔ
tɑ rɑɑ mɑɑ wɑ̃ɑwɑ sɑɑ yellun di.
I ǹ mɑɑ ten bɑrum nɔɔmɔ.
16 Bɑ sɑ̃ɑwɑ tɑbu durɔbu be kpuro.
Ben sɛ̃ɛnun sɑɑbu,
gonu rɑ n yibɑwɑ sikɑɔ.
17 Bwese te, tɑ koo bɛɛn dĩɑnu kɑm koosiɑ,
kɑ bɛɛn bibu, kɑ bɛɛn yɑɑ sɑbenu, kɑ bɛɛn dɑ̃ɑ mɑrum,
kpɑ bu bɛɛn wuu si su gbɑ̃rɑnu mɔ tɑbu wɔri,
bu kɔsuku,
sì sɔɔ bɛɛn yĩiyɔbu wɑ̃ɑ.
18 Adɑmɑ yen tɔ̃ɔ te, n ǹ bɛɛ kpuro kon kɑm koosiɑ.
19 Tɛ̃ Yeremi, bɑ̀ n nɛɛ, mbɑn sɔ̃nɑ nɛ, Gusunɔ ben Yinni nɑ bu yenin bweseru kuɑmmɛ, kɑɑ bu wisiwɑ ɑ nɛɛ, bɑ mɑn deri bɑ kɑ tɔn tukobun bũnu nɑ ben temɔ bɑ sɑ̃ɑmɔ. Nge mɛyɑ ben tii bɑ koo dɑ bu tɔn tukobu sɑ̃ tem tukumɔ.
Gusunɔ u win tɔmbu kirɔ mɔ̀
20 Yinni Gusunɔ u nɛɛ,
i Yɑkɔbun bweseru sɔ̃ɔwɔ,
be, be bɑ sɑ̃ɑ Yudɑbɑ, i nɛɛ,
21 bu swɑɑ dɑkio ye nɑ bu sɔ̃ɔmɔ.
Bɑ sɑ̃ɑwɑ nge wɔ̃kobu, bɑ ǹ bwisi mɔ.
Bɑ nɔni mɔ, ɑdɑmɑ bɑ ǹ yɑm wɑɑmɔ.
Bɑ swɑsu mɔ, ɑdɑmɑ bɑ ǹ gɑri nɔɔmɔ.
22 Bɑ ǹ koo mɑn nɑsiɑ?
Bɑ ǹ koo diiri nɛn wuswɑɑɔ?
Nɛnɑ nɑ derɑ yɑni sɛɛri yi nim wɔ̃kun nim gunuɑ.
Mɑ nɑ nɛɛ, mu ǹ mɑɑ sɑrɑmɔ
mi nɑ mɛn nɔɔ burɑ yeru yi mi.
Miyɑ mu ko n wɑ̃ɑ sere kɑ bɑɑdommɑɔ.
Bɑɑ mɛ nim kurenu nu rɑ se, nu ǹ dɑm mɔ.
Bɑɑ mɛ nu rɑ wɔki, mu ku rɑ gɑm de.
23 Adɑmɑ be, nɛn tɔmbu, bɑ sɑ̃ɑwɑ mɛm nɔɔ sɑribɑ.
Bɑ rɑ kɑ mɑn mɔru ko kpɑ bu mɑn deri.
24 Bɑ ku rɑ tii sɔ̃ bu nɛɛ,
bu nɛ, Yinni Gusunɔ nɑsiɑ,
nɛ wi nɑ rɑ bu gurɑ wɛ̃
wɔ̃ɔ kɑ wɔ̃ɔ yen sɑɑ sɔɔ,
kpɑ n mɑɑ sɑɑ yi bu kɑ dĩɑnu gɛ̃.
25 Bɑ n yɛ̃ mɑ ben durum kɑ ben torɑnun sɔ̃nɑ
bɑ ku rɑ mɑɑ domɑ ten bweseru wɑ.
26 Domi ben suunu sɔɔ tɔn kɔ̃sobɑ wɑ̃ɑ.
Bɑ rɑ tɔmbu yɛ̃ri bɛriewɑ bu kɑ bu mwɛɛri
nge be bɑ rɑ gunɔsu tɑɑ yinuɛ.
27 Tɑkiwɑ yɑ rɑ n yibɑ ben yɛnusɔ,
nge mɛ gunɔ tɑɑson gunɔ diru
tɑ rɑ n gunɔsu yibɑ.
Nge mɛyɑ bɑ kuurɑ mɑ bɑ dɑm kuɑ.
28 Bɑ dĩɑ geenu di mɑ bɑ bɔriɑ.
Bɑ rɑ kɔ̃sɑ kowɑ yu bɑndɑ.
Bɑ ku rɑ kɑ gobeku yinɛ, ǹ kun mɛ sɑ̃ɑro.
Bɑ ku rɑ bu ben gem wɛ̃.
Kpɑ ben tii bɑ n kuurɑmɔ.
29 Mbɑn sɔ̃nɑ nɑ ǹ kon bwese teni mɔru kɔsie,
kpɑ n bu sɛɛyɑsiɑ yenin sɔ̃.
30 Wee, nɛn tɔmbɑ gɑ̃ɑ kɔ̃sunu mɔ̀ tem mɛ sɔɔ.
31 Ben sɔmɔbu bɑ gɑri weesugii mɔ̀.
Mɑ yɑ̃ku kowobu bɑ ben tiin ɑrufɑɑni kɑsu.
Mɑ nɛn tɔmbu bɑ bu yen dɑm kɛ̃mɔ.
Sɑnɑm mɛ kpuro yɑ koo nɔru ko, ɑmɔnɑ bɑ koo ko.