6
Yibɛrɛbɑ bɑ Yerusɑlɛmu tɑrusi
1 Bɛɛ Bɛnyɑmɛɛbɑ,
i duki yɑkuro Yerusɑlɛmun di.
I kɔbɑ soowo Tekoɑɔ.
I yĩreru koowo Bɛti Hɑkerɛmuɔ.
Domi nɔni swɑ̃ɑ bɑkɑru kɑ kɑm kobu sisi,
sɑɑ sɔ̃ɔ yɛ̃sɑn nɔm geu giɑn di.
2 Bɑ koo Yerusɑlɛmu, wuu burɔ ge kɔsuku.
3 Wee, tɔmbɑ ye wɔrim wee
nge kpɑrobu kɑ ben yɑɑ sɑbenu.
Bɑ ben sɑnsɑni girɑ bɑ kɑ ye sikerenɑ.
Ben bɑɑwure u win bweu mwɑ, wi kɑ win tɑbu kowobu.
4 Bɑ kuuki mɔ̀ bɑ mɔ̀,
i de su se sɔ̃ɔ sɔɔ gbɑ̃ɑrɑ su wuu ge wɔri.
Adɑmɑ tɛ̃ sɔ̃ɔ kpɑ, yɑm mɑɑ tĩrɑmɔ.
5 Ǹ n mɛn nɑ, i de su se wɔ̃kuru
su dɑ su gen dii geenu kɔsuku.
6 Mɑ Yinni Gusunɔ u bu sɔ̃ɔwɑ u nɛɛ,
bu dɑ̃ɑ bɔɔrio kpɑ bu kɑ ye sɑsɑnu girɑ
bu kɑ Yerusɑlɛmu sikerenɑ, bu ye sɛɛyɑsiɑ
yèn sɔ̃ yen tɔmbɑ dɑm dɔrenɑmɔ.
7 Nge mɛ dɔkɔ yɑ rɑ nim swĩ mu n kokumɔ,
nge mɛyɑ Yerusɑlɛmugibun nuku kɔ̃suru
tɑ rɑ n sɔ̃ɔsirɑmɔ.
Dɑɑ bɔɔbɔyɑ kɑ kɑm kobun kookoosun gɑriyɑ
yi rɑ n nɔɔrɑmɔ mi.
Nɑ rɑ n wɑɑmɔ bɑɑdommɑ
bɑ tɔmbu nɔni sɔ̃ɔmɔ bɑ bu mɛɛrɑ mɔ̀.
8 Ǹ n mɛn nɑ, bɛɛ Yerusɑlɛmugibu,
i nɛn sɔ̃ɔsiru lɑɑkɑri koowo,
kpɑ n ku rɑ nɛn tii gɑwɑ sɑɑ bɛɛn min di
n bɛɛn tem kɑm koosiɑ.
Isirelibɑ
bɑ kuɑ mɛm nɔɔbu sɑribɑ
9 Gusunɔ, wɔllu kɑ tem Yinni, u Yeremi sɔ̃ɔwɑ u nɛɛ,
bɑ koo Isireli be bɑ tie gurɑ mɑm mɑm
nge mɛ bɑ rɑ dɑ̃ɑ binu sɔri
bɑ kun gɑ̃ɑnu deri.
10 Mɑ Yeremi u wisɑ u nɛɛ,
wɑrɑ kon gɑri sɔ̃, kpɑ n nùn kirɔ ko.
Wɑrɑ koo mɑn swɑɑ dɑki.
Wee, bɑ swɑɑ tɑu. Bɑ ǹ kpɛ̃ bu lɑɑkɑri ko.
Ben mi, wunɛ Yinni Gusunɔn gɑri
yi rɑ bu sekuru kowɑ.
Bɑ ku rɑ kɑ̃ bu yi nɔ.
11 Yinni Gusunɔ,
wee, nɑ kɑ tɔn be mɔru mɔ̀ wunɛn sɔ̃.
Nɑ kpɑnɑ n tii nɛnɛ.
Mɑ Yinni Gusunɔ u nɛɛ,
ɑ de mɔru ye ɑ mɑn kuɑmmɛ mi,
yu wɔri bibu sɔɔ be bɑ dweemɔ dɑ̃ɑ sɑɑnɔ,
kɑ sere mɑɑ ɑluwɑɑsibɑn wuunu sɔɔ.
Domi kurɔbu kɑ durɔbu kɑ tɔkɔnu,
kpurowɑ bɑ koo gurɑ bu kɑ doonɑ.
12 Kpɑ ben yɛnusu su ko gɑbugisu
kɑ ben gbeɑ kɑ ben kurɔbu.
Domi kon tem mɛ kpuron tɔmbu nɛn dɑm sɔ̃ɔsi.
Nɛ, Yinni Gusunɔwɑ nɑ yeni geruɑ.
13 Domi sɑɑ bwɛ̃ɛbwɛ̃ɛbun di sere kɑ dɑmgibɔ,
ben tii tiin ɑrufɑɑniwɑ bɑ rɑ n nɑɑ gire.
Nɛn sɔmɔbu kɑ yɑ̃ku kowobun tii,
bɑ rɑ n weesu mɔ̀wɑ.
14 Bɑ rɑ n nɛn tɔmbun wɑhɑlɑ ɑtɑfiiru sɑ̃ɑwɑ,
bɑ n mɔ̀, ɑlɑfiɑ wɑ̃ɑ,
ɑdɑmɑ ɑlɑfiɑ gɑɑ sɑri.
15 N weenɛwɑ sekuru tɑ n bu mɔ̀,
kɔ̃sɑ ye bɑ mɔ̀n sɔ̃,
ɑdɑmɑ bɑ ǹ sekuru mɔ.
Bɑ ǹ mɑm wure mɑ bɑ tore.
Yen sɔ̃nɑ bɑ koo wɔrumɑ bu gbi.
Bɑ koo fukurɑ bu wɔruku
dɔmɑ te kon bu sɛɛyɑsiɑ.
Nɛ, Yinni Gusunɔwɑ nɑ yeni kpuro geruɑ.
16 Yinni Gusunɔ u win tɔmbu sɔ̃ɔwɑ u nɛɛ,
i seewo i swɛɛ mɛɛri
i bɛɛn yellun swɑɑ burɑ ye kɑsu i swĩi,
kpɑ i wɑ i n wɑ̃ɑ bɔri yɛndu sɔɔ.
Adɑmɑ bɑ wisɑ bɑ nɛɛ,
sɑ ǹ ye swĩimɔ.
17 Gusunɔ u nɛɛ,
nɑ bɛɛ kɔ̃sobu wɛ̃
i kɑ ben kɔbɑn swĩi swɑɑ dɑki.
Adɑmɑ bɑ wisɑ bɑ nɛɛ,
sɑ ǹ swɑɑ dɑkimɔ.
18 Yen sɔ̃, u nɛɛ, bɛɛ bwese ni nu tie,
i swɑɑ dɑkio i nɔ ye yɑ koo nɛn tɔmbu deemɑ.
19 Bɛɛ temgibu, i wɑɑwo.
Wee kon nɛn tɔmbu kɔ̃sɑ sure.
Yerɑ yɑ ko n sɑ̃ɑ ben bwisikunun ɑre.
Domi bɑ ǹ nɛn gɑri swɑɑ dɑki,
mɑ bɑ nɛn woodɑbɑ gɛmɑ.
20 Nɑ ǹ ben turɑre ye yɑ wee Sebɑn di
ǹ kun mɛ dɑ̃ɑ kiku nubu duroruguu
ge bɑ kɑ nɑ sɑɑ tontonden din bukɑtɑ mɔ sɑ̃ɑrun sɔ̃.
Nɑ ǹ ben yɑ̃ku dɔ̃ɔ mwɑɑrɑruginu kĩ.
Mɛyɑ ben yɑ̃ku ni nu tie, nu ǹ mɑɑ mɑn wɛ̃remɔ.
21 Yen sɔ̃nɑ kon bu sokurɑtiɑ dokeɑ,
kpɑ bɑɑbɑbɑ kɑ ben bibu,
tɔnu mɑɑ kɑ win bɔrɔ
bu sokurɑ mi bu gbi.
Bɑ koo Isirelibɑ wɔrimɑ
22 Yinni Gusunɔ u nɛɛ,
wee bweseru gɑrɑ sisi
sɑɑ sɔ̃ɔ yɛ̃sɑn nɔm geu giɑn di
mi n tomɑ.
Bwese ten tɔmbu bɑ dɑm mɔ.
23 Bɑ tɛnnu kɑ yɑɑsi nɛni.
Bɑ nuki sosu, bɑ ǹ wɔnwɔndu mɔ.
Mɑ bɑ kukirimɔ nge nim wɔ̃kun nim.
Bɑ yɔɔwɑ dumi wɔllɔ,
mɑ bɑ yɔ̃ swɛɛ swɛɛ, bɑ tɑbun sɔɔru sɑ̃ɑ
bu kɑ wunɛ Yerusɑlɛmu wɔri, wunɛ wi ɑ sɑ̃ɑ Siɔni.
24 Yerusɑlɛmugibɑ nɛɛ,
ye sɑ ben lɑbɑɑri nuɑ,
yerɑ bɛsɛn gɔmɑ dwiiyɑ.
Sɑ wururɑ nge tɔn kurɔ
wi u yiire u kĩ u mɑ.
25 Goo u ku rɑɑ yɑri u dɑ swɛɛɔ.
Goo ku rɑɑ mɑɑ yɑri u dɑ yɑkɑsɔ.
Domi yibɛrɛbɑ bɑ wɑ̃ɑ mi,
bɑ ben tɑkobibɑ nɛni.
Tɔmbɑ bɛrum soore bɑɑmɑ.
26 Yinni Gusunɔ u nɛɛ,
bɛɛ nɛn tɔmbu, i sɑɑki pɔrɑ sɛ̃keo
kpɑ i tii torom wisi nuku sɑnkirɑnun sɔ̃.
Bɛɛn bɑɑwure u gɔɔ swĩiyɔ
nge wi u win bii teereru biɑ.
I wuri koowo kɑ nɔni yĩresu.
Domi wi u koo bɛɛ kpeerɑsiɑ
u koo bɛɛ wɔriwɑ subɑru sɔɔ.
Isirelibɑ bɑ swɑɑ tɑu
27 Yinni Gusunɔ u nɛɛ,
wunɛ Yeremi, nɑ nun yi ɑ kɑ nɛn tɔmbu sɔwɑ
nge mɛ seko u rɑ sii geesu sɔwe,
kpɑ ɑ kɑ ben dɑɑ giɑ.
28 Mɑ Yeremi u nɛɛ,
tɔn be, bɑ sɑ̃ɑwɑ wee kowobu kɑ mɛm nɔɔ sɑribɑ.
Bɑ bɔɔbuwɑ nge sisu. Be kpuro bɑ sɑnkirewɑ.
29 Bɑ̀ n sisu kɑ pɛɛrum dɔ̃ɔ doke bɑ wure,
ye kpuro yɑ rɑ yɑndewɑ,
kpɑ pɛɛrum mɛ, mu sii si sɔwɑ.
Adɑmɑ kɑm sɔɔrɑ bɑ Isirelibɑ sɔwɑ.
Ben tɔn kɔ̃sobu bɑ ǹ wunɑrɑmɔ,
30 mɑ bɑ bu sokumɔ sii si su ǹ geɑ sɑ̃ɑ.
Domi Yinni Gusunɔ u bu biru kisi.
Yeremi u wɑɑsu mɔ̀
Yinni Gusunɔn sɑ̃ɑ yerɔ
(I mɑɑ mɛɛrio 26:1-19)