4
Yerusɑlɛmugibun wɑhɑlɑ tɑbun sɔ̃
1 Yinni Gusunɔn sɑ̃ɑ yerun wurɑ geɑ ye, yɑ tĩrɑ.
Ten kpenu nu yɑri swɛɛ kpuro sɔɔ.
2 Yerusɑlɛmun tɔn be bɑ rɑɑ gɑrisi nge wurɑ geɑ,
bɑ gisɔ bu gɑrisiwɑ nge tem mɔnnu.
3 Bɑɑ kɑ gbeeku bɔ̃nɔ, nu rɑ nin binu bom kɛ̃.
Adɑmɑ nɛn tɔmbu bɑ ǹ ben bibun wɔnwɔndu mɔ.
Bɑ sɑ̃ɑwɑ nge tɑɑtɑɑ niru te tɑ wɑ̃ɑ gbɑburɔ.
4 Bɑ derɑ ben bii wɛ̃ɛnun yɑri mɑni nin dɑrosu sɔɔ nim nɔrun sɔ̃.
Bibu bɑ dĩɑnu kɑsu, ɑdɑmɑ goo sɑri wi u koo bu wɛ̃.
5 Be bɑ rɑ rɑɑ dĩɑ geenu di,
bɑ gbisukumɔ swɛɛ sɔɔ.
Be bɑ seeyɑ doo nɔɔru sɔɔ,
bɑ kubɑnu bũurimɔ.
6 Nɛn tɔmbun sɛɛyɑsiɑbu bu kpɑ̃, bu Sodomugibu kere,
wuu ge Yinni Gusunɔ u kpeerɑsiɑ nɔni kpɑki teeru
goon nɔmɑ sɑri mi sɔɔ.
7 Ben sinɑ bibu bɑ rɑɑ wɛ̃su bururɑm kere.
Bɑ mɑm bom bekum bururɑm kere.
Ben wɑsin gɔnɑ rɑ n sɔ̃riwɑ
kpɑ ben wuswɑɑ yɑ n bɑllimɔ nge kpee gobiginu.
8 Adɑmɑ tɛ̃ bɑ dɔ̃ɔ durom tĩrɑm kere.
Bɑ ku rɑ mɑɑ bu tubu swɛɛ sɔɔ.
Bɑ woorewɑ sere ben gɔnɑ yɑ kukunu mɑni.
Mɑ ben wɑsi gbere nge dɑ̃ɑ gbebɑ.
9 Be bɑ gbimɔ tɑbu sɔɔ, ben gɔɔ burɑm bo
n kere be bɑ rɑ nɔni sɔ̃ɔre
bu woorɑ gɔ̃ɔrun sɔ̃ bu sere gbi.
10 Bɑɑ mɛ bii mɛrobu bɑ ben bibu kĩ too,
kɑ mɛ, bɑ bu yikumɔ bɑ dimɔ
wɑhɑlɑ ye yɑ be, nɛn tɔmbu deemɑn sɔ̃.
11 Yinni Gusunɔ u win mɔru kpuro sɔ̃ɔsi,
u Yerusɑlɛmu dɔ̃ɔ sɔ̃re
mɑ yɑ dɔ̃ɔ mwɑɑrɑ sere kɑ yen kpɛɛkpɛɛkuɔ.
12 Sinɑ boko goo ǹ kun mɛ tɔn diro goo sɑri hɑnduniɑ sɔɔ
wi u rɑɑ tɑmɑɑ yibɛrɛ u koo kpĩ u du Yerusɑlɛmun gbɑ̃rɑrun kɔnnɔn di.
13 Wɑhɑlɑ bɑkɑ yeni yɑ nɑwɑ
Gusunɔn sɔmɔbu kɑ yɑ̃ku kowobun torɑnun sɔ̃.
Domi berɑ bɑ be bɑ ǹ torɑnu gɑnu kuen yɛm yɑri Yerusɑlɛmun swɛɛ sɔɔ.
14 Bɑ rɑ n sirenɛwɑ swɛɛ sɔɔ bɑ n bɑbi nge wɔ̃kobu
bɑ n disi sɔɔwɑ tɔmbun yɛm sɔ̃.
Goo kun kɑ̃kɔ u mɑm ben yɑ̃nu bɑbɑ.
15 Bɑ̀ n dɑ tɔmbun bɔkuɔ, bɑ rɑ bu girewɑ bu nɛɛ,
i doonɔ minin di, bɛɛ disigibu.
I ku susimɑ i sun bɑbɑ.
Yerɑ bɑ rɑ doonɛ min di bɑ kun yɛ̃ mi bɑ dɔɔ.
Bɑ̀ n mɑɑ wɑ̃ɑ bwese tukunun suunu sɔɔ,
nu rɑ bu sɔ̃wɑ nu nɛɛ,
i ku sinɑ bɛsɛn suunu sɔɔ mini n kɑ tɛ.
16 Yinni Gusunɔn tii u bu yɑrinɑsiɑ kɑ mɔru.
U ǹ kĩ u bu wɑ.
U ǹ ben yɑ̃ku kowo goo doke gɑ̃ɑnu.
U ǹ mɑɑ ben durɔ tɔkɔnun wɔnwɔndu kue.
17 Sɑ swɑɑ mɛɛrɑ sɑ wɑsirɑ
su kɑ wɑ mìn di somirɑ koo sun nɑɑwɑ.
Sɑ rɑɑ bweseru gɑru mɛɛrɑ
te sɑ yĩiyɔ tɑ koo sun fɑɑbɑ ko.
Wee, tɑ ǹ sun fɑɑbɑ kue.
18 Yibɛrɛbɑ bɑ bɛsɛn sɑnu sɑnusu mɛɛrɑ,
bu kɑ sun yinɑri su dɑ wuun bɑtumɑ sɔɔ.
Bɛsɛn gɔɔ turuku kuɑ.
Bɛsɛn wɑ̃ɑrun tɔ̃rɑ kpɑwɑ mi.
19 Bɛsɛn yibɛrɛ be, bɑ gunɔ bɑkeru sɑ̃ɑbu kere.
Bɑ sun yɔɔru bwɛ̃ɛyɛ gbɑburɔ.
Bɑ sun nɑɑ gire sere guunu wɔllɔ.
20 Bɛsɛn sinɑ boko wi u derɑ sɑ wɑ̃ɑ,
wi, wi Yinni Gusunɔ u gɔsɑ,
wee, bɑ nùn yinɑ mwɑ.
N deemɑ sɑ rɑɑ nɛɛ,
win sɑɑbuwɑ sɑ kɑ tii mɔ bwesenun suunu sɔɔ.
21 Bɛɛ mɑɑ Edɔmubɑ, bɛɛ be i wɑ̃ɑ Usiɔ,
i ko kpĩ i nuku dobu ko tɛ̃,
ɑdɑmɑ i n yɛ̃ mɑ siribu bɛɛ mɑrɑ.
I ko i ko nge be tɑm mu goomɔ kpɑ i tereru yɔ̃rɑ.
22 Bɛɛ Yerusɑlɛmugibu, bɛɛn sɛɛyɑsiɑbu kpɑ.
Bɑ ǹ mɑɑ bɛɛ yoru mwɑɑmɔ bu kɑ doonɑ.
Adɑmɑ bɛɛ Edɔmubɑ, Yinni Gusunɔ u koo bɛɛ mɔru kɔsiɑ,
kpɑ u bɛɛn torɑnu terɑsiɑ.