83
Ibɛrɛnↄ kpana Ludaa
Asafa lɛ̀ɛ.
Luda, ǹsungↄ̃ yĩtɛnaro,
n lɛ́ súngↄ̃ nakↄ̃anaro,
ǹsungↄ̃ kun kítikitiro, Luda.
Ǹ n ibɛrɛnↄ gwa lákũ ò fùtɛ ò zɛ̀ nà,
n zãngurinↄ tɛni ń mì zuzu.
Òtɛn ↄ̃ndↄ̃ kɛ n gbɛ̃nↄnɛ,
òtɛn lɛ́ kpákũsũ n gbɛ̃ yenyĩdenↄi.
Òtɛn pi: À mↄ́ ò ń buri bo,
de ń tↄ́ Isaraila súngↄ̃ dↄ gbɛ̃ken doro.
 
Ò lɛ́ kpàkũsũ, ń yã kↄ̃ sɛ̀,
ò lɛ́dokↄ̃nↄ kɛ̀ kũ kↄ̃o ò futɛnyĩ.
Ɛdↄmunↄ kũ Sumaila burinↄ
kũ Mↄabunↄ kũ Hazara burinↄ
kũ Gebalidenↄ kũ Amↄninↄ
kũ Amalɛkinↄ kũ Filisitininↄ kũ Tayadenↄo.
Bee se Asirianↄ nàḿma dↄ,
de ò ↄ da Lutu burinↄa.
 
Ǹ kɛńnɛ lákũ n kɛ̀ Midiãnↄnɛ nà,
lákũ n kɛ̀ Sisera kũ Yabĩonɛ nà Kisↄ̃i.
10 N ń kɛ́ búgubugu Ɛndↄ,
akũ ò gↄ̃̀ katɛna zĩtɛ lán bisaa bà.
11 Ǹ kɛ ń wɛ̃nɛnↄnɛ
lákũ ò kɛ̀ Orɛbu kũ Zebuonɛ nà.
Ǹ kɛ ń kínanɛnↄnɛ
lákũ ò kɛ̀ Zɛba kũ Zalamunaonɛ nà.
12 Mↄ́kↄ̃nↄ mɛ́ ò pì yã,
ò Luda sãdãki sɛ́ ń pↄ́ ũ.
 
13 Ma Luda, ǹ tó ò gↄ̃ lán sɛ̃̀'ĩampuruu bà,
lán ése ũkã kũ ĩa tɛn sɛ́ bà.
14 Lákũ dàkoo dì tɛ́ kũ nà,
kesↄ̃ lákũ tɛ́ dì kpinↄ ble nà,
15 ǹ pɛ́tɛńyĩ kũ n zàga'ĩao,
ǹ tó n ĩa pãsĩ swɛ̃̀ kɛ̃ńgu.
16 Ǹ tó ń gasu gↄ̃ kpá ń wɛ́i,
de ò n gbãna dↄ̃ Dikiri.
 
17 Wé'i nigↄ̃ ń kũ gↄrↄ sĩnda pínki kũ bídio,
ò boru kpɛ ò mì dɛ.
18 Ǹ tó ògↄ̃ dↄ̃ kũ n tↄ́n Dikiri,
mↄkↄ̃mmɛ Luda Musude ũ andunia gũn pínki.