84
Luda ↄn bɛgɛkɛnaa
Kora burinↄ lɛ̀ɛ.
N kúki mana fá, Dikiri Zĩ̀karide!
Matɛn Dikiri ↄn bɛgɛ kɛ ari gu tɛn lima,
ma nini kũ ma mɛ̀ɛo tɛn luka Luda Wɛ̃̀ndidei.
 
Dikiri Zĩ̀karide ma Kína ma Luda,
bee bãntoro sàa dà n gbagbaki sarɛ,
Ludakibɛbã kpɛ́ bò gwe à a nɛ́nↄ kàn.
Arubarikadenↄmɛ gbɛ̃ kũ ò kú n ↄnnnↄ ũ,
òdigↄ̃ n táaki lɛ́ gↄrↄ sĩnda pínki.
Arubarikadenↄmɛ gbɛ̃ kũ ń gbãnan n ũnↄ ũ,
n ↄn gɛna yã kú ń swɛ̃̀ɛ gũn.
Tó òtɛn gɛ̃tɛ Baka guvutɛa,
àdi gↄ̃ lán gu kũ à ísɛ̃bokinↄ vĩ bà,
pↄ́tↄ̃gↄrↄ legũ dì tó arubarika dagula.
Ń gɛnaa gũn ń gbãna dìgↄ̃ karamɛ
ari ò gɛ́ káo n kĩnaa Zaiↄ̃.
 
Dikiri Luda Zĩ̀karide, ǹ ma aduakɛna sí,
ǹ sã kpá ma yãi, Yakubu Luda.
Luda, ǹ kína kũ à de ó sɛ̃gbako ũ gwa,
ǹ wɛ́ pɛ́ kína kũ n kàai.
 
10 Kunna n ↄn gↄrↄ do manamɛnɛ
de kunna gu pãndea gↄrↄ wàa sↄↄrola.
Ma Luda ↄn zɛ́dãkpãrikɛ sì
de kunna ↄn dokↄ̃nↄ kũ yãvãnikɛrinↄola.
11 Dikiri Luda deńnɛ ifãntɛ̃ kũ sɛ̃gbako ũ,
Dikiri dì gbɛ̃kɛ kɛńnɛ kũ bɛ̀ɛrɛɛo,
àdi gí pↄ́ mana kpá taarisaridenↄairo.
 
12 Dikiri Zĩ̀karide,
arubarikademɛ gbɛ̃ kũ àtɛni n náani kɛ ũ.