12
Banla zĩbaa
Dii yã ò Musanɛ kↄ̃n Arunao Igipiti à bè: Mↄↄ kɛ̀kii égↄ̃ dɛare mↄ káaku ũ wɛ̃̀ kↄ̃n wɛ̃̀o. À o Isarailinↄnɛ ń píngi, mↄↄ kɛ̀ki gurↄ kuridee zĩ aↄ̃é sãa bↄbↄ mɛ̀n doodo ualɛ kↄ̃n ualɛo píngi. Tó ua gbɛ̃nↄ parii e ká aↄ̃ sã mɛ̀n doo só sↄ̃ro, aↄ̃ kpaatɛ kↄ̃n ua kɛ̀ aↄ̃ↄ kú kↄ̃ saɛo à gbɛ̃nↄ lɛ́n, lɛ a kpaaa tón gↄ̃ro yãnzi. À sãkaro ke blèkofĩi nɛ́ bↄ̀rↄ kɛ̀ see vĩroo bↄ. Isarailinↄ píngi, baade a pↄ́ gwa ai mↄↄ kɛ̀ki gurↄ gɛ̃ro dosaidee zĩ. Uusiɛn weé dɛ, weé à aru ma kpɛ́ kɛ̀ weé à nↄ̀bↄ són kpɛɛlɛ gũ̀nↄa ↄplazi kↄ̃n ↄzɛzio kↄ̃n musuo. Gwãavĩ dↄ̃nkↄ̃ pìa weé nↄ̀bↄ pì kpá tɛ́a, weé só kↄ̃n burɛdi sɛ́sɛ'ɛ̃zɛ̃saio kↄ̃n lá kyã̀kyão. Àton só búsu ke fùfukɛnaro. À kpá tɛ́a kↄ̃n a mìo kↄ̃n a gbánↄ kↄ̃n a pↄ́guunↄ. 10 Àton tó guu dↄ à kpaaaaro. Tó à kpaaa gↄ̃̀, à kpáta à tɛ́ kũ. 11 Tó ée soo, à asaa dↄawa à kyatee kpá, a gò gↄ̃ nana a ↄzĩ. À só kpakpaa, zaakɛ Dii Banla sa'opↄmɛ.
12 Gwãavĩ pìa mɛ́ ba Igipitila mà daudunↄ dɛdɛ bùsu pì gu píngia kↄ̃n pↄ́kãde nɛ́kya káakunↄ ń píngi, mɛ́ wí da Igipiti tãanↄa. Mámbe Dii ũ. 13 Aru pì égↄ̃ dɛ sèeda ũ kpɛ́ kɛ̀ á kú à guunↄa. Tó mɛ́ɛ ↄ tↄ̃ↄ Igipitinↄa, tó ma aru pì è, mɛ́ gɛ̃ala, gagana pì é a lero. 14 À gurↄↄ pì diɛ ma zĩbaa gurↄↄ ũ dↄngu yãnzi, àgↄ̃ zĩbaa pì kɛɛ kɛ̀atokↄ̃nɛpↄ ũ ai a boriia.
Burɛdi Sɛ́sɛ'ɛ̃zɛ̃sai zĩbaa
15 Gurↄ swɛɛplaaa guu à burɛdi sɛ́sɛ'ɛ̃zɛ̃sai só. À gurↄ káakudee zĩ à burɛdisɛsɛ'ɛ̃zɛ̃ kɛ̀ kú a kpɛ́ guunↄ kwɛ́ɛ, zaakɛ gbɛ̃ kɛ̀ pↄ́sɛsɛna sò gurↄ swɛɛplaaa pì guu, weé a bↄ Isarailinↄ tɛ́ wà à dɛmɛ. 16 À gurↄ káakudee zĩ kↄ̃n à gurↄ swɛɛplaadeeo à kↄ̃ kakↄ̃a à dↄnzi kɛmɛ. Àton zĩi ke kɛ gurↄↄ mↄ̀nↄaro, sé pↄ́blekɛna baade pínginɛ baasiro, à lɛ́n gwe. 17 À Burɛdi Sɛ́sɛ'ɛ̃zɛ̃sai zĩbaa kɛ, zaakɛ zĩ beeean ma a bↄɛ Igipiti lán zĩ̀kpɛɛnↄ bà. A boriinↄ gↄ̃ zĩbaa pì kɛɛ kɛ̀atokↄ̃nɛpↄ ũ. 18 Mↄ káaku gurↄ gɛ̃ro dosaidee zĩ uusiɛ, àgↄ̃ burɛdi sɛ́sɛ'ɛ̃zɛ̃sai soo ai à gurↄ baro awɛɛdodee zĩ uusiɛ. 19 Gurↄ swɛɛplaaa guu burɛdisɛsɛ'ɛ̃zɛ̃ tón gↄ̃ kú a bɛro, zaakɛ gbɛ̃ kɛ̀ pↄ́sɛsɛna sò, gbɛ̃ zĩ̀tↄn yoo, bɛdeen yoo, weé à bↄ Isarailinↄ tɛ́ wà à dɛmɛ. 20 Àton pↄ́sɛsɛna só gurↄ pìaro. Guu kɛ̀ á kún píngi, àgae burɛdi sɛ́sɛ'ɛ̃zɛ̃sai só.
Banla zĩbaa káaku
21 Musa Isaraili gbɛ̃nsinↄ sìsi ń píngi à bèńnɛ: À gá à a ua sã kũ à dɛ Banla zĩbaakɛpↄ ũ. 22 À sɛ̃̀sↄ̃vlãa sɛ́ à zↄ̃ aru kɛ̀ kú taa guua à máma a kpɛɛlɛ gũ̀a, ↄplazi kↄ̃n ↄzɛzio kↄ̃n à musuo. A gbɛ̃ke tón bↄ bàaziro ai guu dↄ. 23 Tó Dii e baa bùsula èe Igipitinↄ dɛdɛɛ, tó à aru è kpɛɛlɛ gũ̀nↄa, eé gɛ̃àlamɛ. Eé tó gbɛ̃dɛdɛri gɛ̃azi à a dɛdɛro. 24 Apinↄ kↄ̃n a boriinↄ àgↄ̃ yã pì kũna kɛatokↄ̃nɛpↄ ũ ai a boriia. 25 Tó a gɛ̃ bùsu kɛ̀ Dii é a gbaan lán à à lɛ́ gbɛ̃̀are nà, àgↄ̃ dↄnziyã pì kũna. 26 Tó a nɛ́nↄ dↄnziyã pì mì gbèkaawa, 27 à ońnɛ kɛ̀ Banla saa kɛ̀ wè o Diiamɛ, zaakɛ kɛ̀ à Igipitinↄ dɛ̀dɛ, à gɛ̃̀ wa Isarailinↄ kpɛ́la, èe wa dɛdɛro. Ben gbɛ̃nↄ kùɛ aↄ̃ dↄnzi kɛ̀ Diinɛ. 28 Kɛ̀ aↄ̃ tà, aↄ̃ↄ kɛ̀ lán Dii ò Musa kↄ̃n Arunaonɛ nà.
Igipiti daudunↄ gagana
29 Gwãavĩ lezãndo Dii Igipiti daudunↄ dɛ̀dɛ ń píngi, naana zaa Fili'auna kɛ̀ vɛ̃ɛna kpatan nɛ́a ai à gàa pɛ́ pisinanↄ nɛ́nↄa kↄ̃n pↄ́kãde nɛ́kya káakunↄ ń píngi. 30 Fili'auna fɛ̀ɛ gwãavĩ kↄ̃n a ìbanↄ kↄ̃n Igipitinↄ ń píngi, ben sósobi ↄ́ dà Igipitila, zaakɛ ua kee kuu gɛ̀ sairo. 31 Gwãavĩn Fili'auna Musa kↄ̃n Arunao sìsi à bèńnɛ: À fɛɛ kↄ̃n Isarailinↄ à bↄɛ ma gbɛ̃nↄ tɛ́. À gá dↄnzi kɛ Diinɛ lán á ò nà. 32 À a blènↄ kↄ̃n a sãanↄ kↄ̃n a zùnↄ sɛ́ɛ lán á ò nà. À gá à sa maaa omɛ se.
33 Igipitinↄ nàkↄ̃rɛ gbɛ̃ pìnↄa aↄ̃ bↄɛńnɛ ń bùsun kpakpaa, zaakɛ aↄ̃ bè: Wé gaga wa píngimɛ. 34 Isarailinↄ ń flawadɛnanↄ kà taanↄ guu a sɛ́sɛ'ɛ̃zɛ̃ sai, aↄ̃ ń utanↄ fĩ̀fĩa aↄ̃ↄ dàda ń gã̀n. 35 Aↄ̃ↄ kɛ̀ lán Musa òńnɛ nà, aↄ̃ kondogi pↄ́nↄ kↄ̃n vura pↄ́nↄ kↄ̃n pↄ́kãsãanↄ gbèka Igipitinↄa. 36 Dii tò aↄ̃ↄ kɛ̀ kↄ̃o nna, ben aↄ̃ↄ kpàḿma. Lɛmɛ aↄ̃ Igipitinↄ pↄ́nↄ sìḿma lɛ.
Isarailinↄ dana zɛ́n
37 Isarailinↄↄ dà zɛ́n kɛ̀sɛ, aↄ̃ bↄ̀ɛ kↄ̃n Ramɛsɛo aↄ̃ tà Suko. Gↄ̃gbɛ̃nↄ gↄ̃ↄn bↄrↄ wàa aagↄ̃mɛ, nɛ́nↄ kↄ̃n nↄgbɛ̃nↄ baasi. 38 Bori zĩ̀tↄnↄ tàńyo pari dↄ. Blènↄ kↄ̃n sãanↄ kↄ̃n zùnↄ parii kɛ̀ bíta. 39 Aↄ̃ burɛdi sɛ́sɛ'ɛ̃zɛ̃sai kɛ̀ kↄ̃n flawadɛna kɛ̀ aↄ̃ bↄ̀o Igipitio. Aↄ̃ↄ kɛ̀ sɛ́sɛ'ɛ̃zɛ̃ sai, zaakɛ wà pɛ̀ḿma Igipiti kãndomɛ. Aↄ̃ↄe e wà pↄ́blee kɛ̀ wà sɛ̀ kũsãɛ ũro.
40 Isarailinↄ kuuna Igipiti kɛ̀ wɛ̃̀ wàa plaa kↄ̃n baaakurio. 41 Wɛ̃̀ wàa plaa kↄ̃n baaakurio pì papana gbɛra, zĩbaa pì zĩn Dii zĩ̀kpɛɛ pìnↄ bↄ̀ɛ Igipiti ń píngi. 42 Gwãavĩ pì nɛ́ Dii pↄ́mɛ. Isarailinↄ égↄ̃ a itɛ̃ kɛɛ ai ń boriia, zaakɛ gwãavĩ pìn Dii Isarailinↄ bↄna Igipiti itɛ̃ kɛ̀.
Banla zĩbaa
43 Dii bè Musanɛ kↄ̃n Arunao: Banla yã kɛ̀ má dìɛn yɛ̀. Bori zĩ̀tↄ ke toga à à nↄ̀bↄ sóro, 44 mↄde zↄ̀ kɛ̀ á lù, tó à bã̀ngu kɛ̀, eé só. 45 Nibↄ ke asaiazĩkɛri toga à sóro. 46 À só kpɛ́n, àton bↄ kↄ̃n à nↄ̀bↄ pìo bàaziro. Àton sãa pì wá ke ɛ́ro. 47 Isarailinↄ píngi gae zĩbaa pì kɛ. 48 Tó gbɛ̃ zĩ̀tↄ kú a tɛ́, tó à yezi à Banla zĩbaa kɛ Diinɛ, à a bɛ gↄ̃gbɛ̃nↄ bã̀ngu kɛ ń píngi à gↄ̃ bɛdee ũ, eé gbasa à kɛ. Gɛfↄↄdee toga à sóro. 49 Bɛde kↄ̃n gbɛ̃ zĩ̀tↄ kɛ̀ kúao, doka dↄ̃nkↄ̃ pìmɛ. 50 Ben Isarailinↄↄ kɛ̀ lán Dii ò Musa kↄ̃n Arunaonɛ nà ń píngi. 51 Zĩ beeean Dii Isarailinↄ bↄ̀ɛ Igipiti gãli kↄ̃n gãlio.