13
Burɛdi Sɛ́sɛ'ɛ̃zɛ̃sai zĩbaa kↄ̃n daudunↄ kpana Ludaao
1 Dii yã ò Musanɛ à bè:
2 Àgae Isaraili daudunↄ kↄ̃n pↄ́kãde nɛ́kya káakunↄ kpáma, zaakɛ ma pↄ́nↄmɛ ń píngi.
3 Musa bè gbɛ̃nↄnɛ: A bↄna Igipiti zↄ̀blenan gurↄↄ kɛ̀ki yã gↄ̃ dↄagu, zaakɛ Dii bé à a bↄɛ Igipiti kↄ̃n a ↄ gbãaao. Àton pↄ́sɛsɛna só gurↄↄ pìaro.
4 Ée bↄɛɛ Igipiti gbã̀amɛ mↄ káaku kɛ̀ wè sísi Abibu guu.
5 Dii lɛ́ gbɛ̃̀ a dezinↄnɛ à bè é bùsu kɛ̀ zwi kↄ̃n zↄ́'io din, kɛ̀ Kanaanↄ kↄ̃n Itinↄ kↄ̃n Amↄrinↄ kↄ̃n Ivinↄ kↄ̃n Yebusinↄↄ kún kpáawa. Tó à tò a ka, à zĩbaa pì kɛ mↄↄ kɛ̀kiin.
6 Àgae burɛdi sɛ́sɛ'ɛ̃zɛ̃sai só ai gurↄ swɛɛplaa. À gurↄ swɛɛplaadee pì zĩ égↄ̃ dɛare Dii zĩbaa gurↄↄ ũ.
7 Àgae burɛdi sɛ́sɛ'ɛ̃zɛ̃sai só ai gurↄ swɛɛplaaa pì papa. Pↄ́sɛsɛna ke burɛdi ɛ̃zɛ̃ ke tóngↄ̃ kú ua ke guu a bùsunlo.
8 Zĩ pìa àgae o a nɛ́gↄ̃gbɛ̃nↄnɛ ée kɛɛ lɛ yã kɛ̀ Dii kɛ̀are kɛ̀ à a bↄɛ Igipiti yãnzimɛ.
9 Zĩbaa pì égↄ̃ dɛare sèeda ũ lán pↄ́ dana ↄↄa bà, ke lán dↄngu pↄ́ yina mì'aɛa bà, lɛ Dii doka gↄ̃ kú a lɛ́n, zaakɛ àmbe à a bↄɛ Igipiti kↄ̃n a ↄ gbãaao.
10 Àgae dokayã pì kɛ a gurↄↄa wɛ̃̀ kↄ̃n wɛ̃̀o.
11 Tó Dii tò a ka Kanaa bùsun, ben à kpàawa lán à à lɛ́ gbɛ̃̀are nà kↄ̃n a dezinↄ,
12 àgae a daudunↄ kpáa ń píngi. A pↄ́kãde nɛ́kya káakunↄ ègↄ̃ dɛ à pↄ́ ũ ń píngi.
13 Àgae a zaaki nɛ́kya káaku tↄↄba bo kↄ̃n sãnɛo. Tó ée boro, à à waa fĩ. Àgae a daudunↄ tↄↄba bo ń píngi.
14 Tó a nɛ́gↄ̃gbɛ̃nↄ a la à mìzi zia wà bè, bↄ́ yãn gwee, à beńnɛ kɛ̀ Dii a bↄɛ zↄ̀bleen Igipiti yã kↄ̃n a ↄ gbãaao yãnzimɛ.
15 Kɛ̀ Fili'auna kùgbãaa kɛ̀ à gì wa gbarɛzi, ben Dii Igipiti daudunↄ dɛ̀dɛ ń píngi kↄ̃n pↄ́kãde nɛ́kya káakunↄ ń píngi. Beee yãnzin weè saa oa kↄ̃n pↄ́kãde nɛ́kya káakunↄzi píngi, weè wa daudunↄ tↄↄba bo.
16 Kɛ̀kii égↄ̃ dɛ sèeda ũ lán pↄ́ dana wa ↄↄa bà ke pↄ́ yina wa mì'aɛa bà, zaakɛ Dii bé à wa bↄɛ Igipiti kↄ̃n a ↄ gbãaao.
Isarailinↄ bↄna Igipiti
17 Kɛ̀ Fili'auna Isarailinↄ gbàrɛ, Luda e bↄńyo Filisitininↄ bùsu zɛ́ kparo, baa kↄ̃n à kĩkɛɛo, zaakɛ à bè: Tó wà fɛ̀ɛńzi kↄ̃n zĩ̀o, aↄ̃é ń nↄ̀sɛ liɛ wà liara Igipiti.
18 Luda pã̀ zɛ́ pìnɛ, ben à gbáa zɛ́ sɛ̀ńyo Isia Tɛ̃aa kpa. Isarailinↄ bↄ̀ɛ Igipiti aↄ̃ ń gↄ̃kɛbↄnↄ kũna.
19 Musa Yusufu wánↄ sɛ̀ èe taao, zaakɛ Yusufu tò Isarailinↄ lɛ́ gbɛ̃̀are yã à bè, tó Luda mↄ̀ ń bↄ, aↄ̃é a wánↄ sɛ́ɛ wà bↄo gwe.
20 Kɛ̀ aↄ̃ bↄ̀ Suko, aↄ̃ gàa wà bùra kàɛ gbáa lɛ́a zaa Etamu.
21 Dii ègↄ̃ dↄↄńnɛ aɛ tɛ́luguu guu fãantɛ̃ lɛ àgↄ̃ zɛ́ ↄdↄↄańnɛ. Gwãavĩ sↄ̃ ègↄ̃ dↄↄńnɛ aɛ tɛ́nɛnɛ guu, lɛ àgↄ̃ guu puuńnɛ aↄ̃gↄ̃ táa oo fãantɛ̃ kↄ̃n gwãavĩo.
22 Tɛ́luguu pì è gu ń aɛ fãantɛ̃ro, tɛ́nɛnɛ pì è gu ń aɛ gwãavĩro.