2
Musa ina
1 Levi bori gↄ̃gbɛ̃ Levi bori nↄgbɛ̃ sɛ̀.
2 Nↄↄ pì nↄ̀ sì à nɛ́ ì gↄ̃gbɛ̃ ũ. Kɛ̀ à è nɛ́ pì maa, ben à à ùtɛ mↄ aagↄ̃.
3 Kɛ̀ èe fↄ̃ à à ùtɛ dↄro, à kɛbu gbíi sɛ̀ à kↄntaa lɛ̀a lɛ í tón gɛ̃ à guuro. Ben à nɛ́ pì dàn à gàa à dìɛ Nili í lɛ́a waa guu.
4 Nɛ́ pì dãree zɛ kãaa èe gwaa yã kɛ̀ eé à le.
5 Ben Fili'auna nɛ́nↄgbɛ̃ gàa zú o swaa pìzi, à gbɛ̃nↄↄ e lili oo swaa pì lɛ́a. À gbíi è diɛna waan, ben à a zↄ̀nↄkpare zĩ̀ à gàa à à sɛ̀.
6 Kɛ̀ à wɛ̃̀, à nɛ́ è dan, èe ↄ́ↄ dↄↄ. À kɛ̀nɛ wɛ̃nda à bè: Eberu nɛ́gↄ̃gbɛ̃mɛ.
7 Ben nɛ́ pì dãre mↄ̀ à bè Fili'auna nɛ́ pìnɛ: Ń yezi mà gá mà Eberu nↄgbɛ̃ sísinnɛ àgↄ̃ yↄ̃ kpaannɛ nɛ́ pìan yↄ́?
8 À wèàla à bè: Ee, ǹ gá! Ben nɛ́nↄgbɛ̃ pì gàa à nɛ́ pì da sìsi.
9 Fili'auna nɛ́nↄgbɛ̃ pì bènɛ: Ǹ nɛ́ pì sɛ́ ǹ táo ǹgↄ̃ à gwaamɛ, mɛ́gↄ̃ fĩa boonnɛ. Ben à nɛ́ pì sɛ̀ à tào, èe à gwaa.
10 Kɛ̀ nɛ́ pì bíta kũ̀, à à sɛ̀ à gàao Fili'auna nɛ́nↄgbɛ̃ pìnɛ, ben à à sì a nɛ́ ũ. À tↄ́ kpànɛ Musa, zaakɛ à bè, a à bↄ̀ í guumɛ.
Musa bàa lɛ́ à tana Midiã bùsun
11 Zĩkea kɛ̀ Musa kɛ̀ bíta, à gàa a bori Eberunↄ gwa, ben à zĩ gbãaa kɛ̀ aↄ̃ↄe kɛɛ è. À è Igipiti gbɛ̃ e a bori daa gbɛ̃ɛ.
12 Kɛ̀ à guu gwàgwa, èe gbɛ̃ke ero, ben à Igipiti gbɛ̃ pì dɛ̀ à à ùtɛ bùsu'ãatɛ̃n.
13 Kɛ̀ guu dↄ̀, à bↄ̀ à Eberunↄ è gↄ̃ↄn plaa, aↄ̃ↄe swèe kɛɛ. Ben à gbɛ̃ kɛ̀ à yã nnaroo là à bè: Bↄ́yãnzi nɛ́ɛ n gbɛ̃ndoo gbɛ̃ɛzi?
14 À wèàla à bè: Dé bé à n diɛ kí yãgↄ̃gↄ̃ri ũwee? Ń yezi ǹ ma dɛ lán n Igipiti gbɛ̃ dɛ̀ nàn yↄ́? Ben vĩa Musa kũ̀ à bè: Wà yã kɛ̀ má kɛ̀ dↄ̃̀ fá!
15 Kɛ̀ Fili'auna yã pì mà, èe wɛtɛɛ à Musa dɛ, ben à bàa lɛ̀nɛ à tà Midiã bùsun, ben à vɛ̃̀ɛ lↄ̀gↄ saɛ gwe.
16 Midiã sa'ori nɛ́nↄgbɛ̃nↄ vĩ gↄ̃ↄn swɛɛplaa, ben aↄ̃ mↄ̀ wà í tↄ̀, aↄ̃ↄ kà pↄ́kãdeenↄ gbãngo ímikiin ń de pↄ́kãdeenↄnɛ.
17 Kɛ̀ sãdãri kenↄ mↄ̀ aↄ̃ↄe pɛɛḿma, ben Musa fɛ̀ɛ à yã sìńyo, ben à í kpàńnɛ ń pↄ́kãdeenↄa.
18 Kɛ̀ aↄ̃ tà ń de Ruɛli kiia, à ń lá à bè: À kɛ̀ dia a su idɛ lɛ gbã̀a?
19 Aↄ̃ wèàla wà bè: Igipiti gↄ̃gbɛ̃ ke bé à wa si sãdãrinↄa. Àmbe se à í tↄ̀ à kpàwe wa pↄ́kãdeenↄa.
20 Ben à ń lá à bè: Adee pì kú mámɛ? Bↄ́yãnzi a gↄ̃gbɛ̃ pì tò gwezi? À à sísi à mↄ́ à pↄ́ blewao.
21 Musa mↄ̀, ben à wè à vɛ̃̀ɛ kↄ̃n gↄ̃gbɛ̃ pìo, ben gↄ̃gbɛ̃ pì a nɛ́nↄgbɛ̃ Zipora kpàa nↄↄ ũ.
22 Ben Zipora nɛ́ ì gↄ̃gbɛ̃ ũ, ben Musa tↄ́ kpànɛ Gɛsↄmu, à bè: Gbɛ̃ zĩ̀tↄn ma ũ gbɛ̃ pãndenↄ bùsun kɛ̀.
23 Kɛ̀ à gì kɛ̀, ben Igipiti kína gà. Isarailinↄↄ e mboo zↄ̀zĩi kɛ̀ aↄ̃ↄe kɛɛ yãnzi, aↄ̃ↄe wii lɛɛ, ben aↄ̃ wii pì Luda lè.
24 À ń mbona mà, à bà kɛ̀ kú kↄ̃n Ibraĩo kↄ̃n Isaakuo kↄ̃n Yakubuo e sãnlo.
25 Luda Isarailinↄ gwà, ben aↄ̃ kɛ̀nɛ wɛ̃nda.