Luda yã takada kↄ̃n Bokobaru yão BƆNA 3

Luda Musa sisina

1 Musa e a anzure Midiã bùsu sa'ori pↄ́kãdeenↄ dãa à vĩ̀ gbáala ai à kà kpiii kɛ̀ wè sísi Orɛbu kiia. 2 Ben Dii Malaika bↄ̀ à mↄ̀zi tɛ́vura guu gyanton. Musa gyanto pì gwà à è tɛ́ kúa, mↄde èe tɛ́ kũro. 3 Ben à bè: Mɛ́ gá mà dabuyã pì gwa mà dↄ̃ pↄ́ kɛ̀ tò gyanto pì e tɛ́ kũuro. 4 Kɛ̀ Dii è à mↄ̀ gwa, ben à lɛ́ zùzi zaa gyanto pì guu à bè: Musa! Musa! Ben à wèàla à bè: Maɛ kɛ̀! 5 Luda bènɛ: Ǹton sↄ̃ziro. Ǹ n kyatee bↄbↄ, zaakɛ guu kɛ̀ ń zɛn kú adonamɛ. 6 Ben à bè: Mámbe n dezinↄ Ibraĩ kↄ̃n Isaakuo kↄ̃n Yakubuo Luda ũ. Ben Musa pↄ́ kù a wɛ́ɛa, kɛ̀ à Luda gwana vĩa vĩ yãnzi. 7 Ben Dii bè: Ma yã'ↄ̃amma kɛ̀ ma gbɛ̃nↄↄ kúo Igipiti è, ma wiii kɛ̀ aↄ̃ wɛ́ɛtãmmarinↄↄ tò aↄ̃ↄe lɛɛ mà. Má wahaa kɛ̀ aↄ̃ↄ kúo dↄ̃. 8 Ma pita mà ń sí Igipitinↄa mà ń bↄɛ bùsu pìn mà gáńyo bùsu maa yàasan, guu kɛ̀ zwi kↄ̃n zↄ́'io din, bùsu kɛ̀ Kanaanↄↄ kún kↄ̃n Itinↄ kↄ̃n Amↄrinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo. 9 Isarailinↄ wiilɛna kà ma kiia tia sa, ma ĩaa kɛ̀ Igipitinↄↄ e daaḿma è. 10 Ǹ gá tia sa, ma n zĩ Fili'aunaamɛ lɛ ǹ ma gbɛ̃ Isarailinↄ bↄɛ Igipiti. 11 Ben Musa bè Ludanɛ: Dén ma ũ kɛ̀ mɛ́ gá Fili'auna kiia mà Isarailinↄ bↄɛ Igipiti? 12 Luda bènɛ: Mɛ́gↄ̃ kúnyo. Zĩna kɛ̀ ma n zĩi sèedan yɛ̀. Tó n ń bↄ́ɛ Igipiti, é dↄnzi kɛmɛ kpiii kɛ̀ kiia.

13 Ben Musa bè Ludanɛ: Tó ma gaa má ò Isarailinↄnɛ ma bè, aↄ̃ dezinↄ Luda bé à ma zĩḿma, tó aↄ̃ ma la n tↄ́zi sↄ̃ nɛ́? Mɛ́ beńnɛ diamɛ? 14 Luda wèàla à bè: Mámbe gbɛ̃ kɛ̀ má dɛ à ũu ũ. Ǹ ońnɛ kɛ̀ mámbe ma n zĩḿma. 15 Luda bènɛ dↄ: Ǹ o Isarailinↄnɛ kɛ̀ mamↄma Dii aↄ̃ dezinↄ Ibraĩ kↄ̃n Isaakuo kↄ̃n Yakubuo Luda bé à n zĩḿma. Ma tↄ́n gwe gurↄ píngi. Àgↄ̃ ma sisii lɛ ai a boriia. 16 Ǹ gá ǹ Isaraili gbɛ̃nsinↄ kakↄ̃a ǹ ońnɛ kɛ̀ mamↄma Dii aↄ̃ dezinↄ Ibraĩ kↄ̃n Isaakuo kↄ̃n Yakubuo Luda bé à bↄ̀ à mↄ̀nzi. Ǹ ońnɛ kɛ̀ mɛ́ɛ ń ee ma yã kɛ̀ wèe kɛɛńnɛ Igipiti è. 17 Mɛ́ ń bↄɛ Igipiti guu kɛ̀ wèe wɛ́ɛ tãaḿma pìn, mɛ́ gáńyo bùsu kɛ̀ Kanaanↄↄ kún kↄ̃n Itinↄ kↄ̃n Amↄrinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo, guu kɛ̀ zwi kↄ̃n zↄ́'io din. 18 Aↄ̃é n yã ma. Mpi kↄ̃n Isaraili gbɛ̃nsinↄ à gá à Igipiti kína le à onɛ kɛ̀ mamↄma Dii Eberunↄ Luda ma bↄ ma mↄazi, ma bè à a gba zɛ́ à gá gurↄ aagↄ̃ↄ kɛ gbáan lɛ à saa o mamↄma Dii a Ludaa. 19 Má dↄ̃ kɛ̀ Igipiti kína é we à gáro, séto ma gã nàa. 20 Mɛ́ ↄ tↄ̃ Igipitinↄa, mɛ́ dabuyãnↄ kɛ mà kpáońzi, eé gbasa à a gbarɛ. 21 Mɛ́ tó Igipitinↄ a wɛ́ɛ gwa, lɛ tó ée taa, é tá ↄkoriro. 22 A nↄgbɛ̃ píngi kondogi ke vura nↄmaablebↄnↄ kↄ̃n pↄ́kãsãanↄ gbeka a Igipiti nↄgbɛ̃ daa kↄ̃n ń nↄgbɛ̃ kɛ̀ aↄ̃ↄ kú a bɛɛnↄ, à da a nɛ́gↄ̃gbɛ̃nↄnɛ kↄ̃n a nɛ́nↄgbɛ̃nↄ. Lɛn é Igipitinↄ pↄ́nↄ síḿma lɛ maamaa.