5
Kↄngↄ aduakɛna
Dauda lɛ̀. Wè sí kↄ̃n kurepɛnaomɛ.
1 Ǹ swã kpá ma yãzi, Dii,
ǹ làakari dↄ ma m̀bonaa.
2 Ma Kína, ǹ ma wiilɛna ma,
ma Luda, mɛ́ɛ wɛ́ɛ kɛɛmma.
3 Dii, nɛɛ̀ ma yã'ona ma gudↄnao,
mɛɛ̀ ma yãnↄ dↄdↄnnɛ kↄngↄ,
ma wɛ́ɛ ègↄ̃ dↄnzi.
4 N Luda n tɛ̃̀n à zaaa ũ,
nɛɛ̀gↄ̃ gbɛ̃ zaaao lɛdoro.
5 Ĩadãri è e à zɛ n aɛzĩro,
n za yãzaakɛrinↄn ń píngi.
6 Dii, nɛɛ̀ ɛgɛdeenↄ mì dɛ,
ń ye gbɛ̃dɛrinↄ kↄ̃n gbɛ̃blerinↄ kãziro.
7 Mapi sↄ̃, mɛ́ gɛ̃ n ua n gbɛ̃kɛ bíta yãnzi,
mɛ́ kúɛ mà aɛ dↄ n kpɛ́a mà mì siɛnnɛ.
8 Dii, ǹ ma da zɛ́a n náanɛkɛna yãnzi,
ǹ zɛ́ poromɛ ma wɛdɛrinↄ yãnzi.
9 Zaakɛ aↄ̃ yãke náanɛ vĩro,
aↄ̃ nↄ̀sɛ dɛ lán kãkã bɛɛ bàmɛ,
aↄ̃ kòto dɛ lán mira wɛ̃na bàmɛ,
aↄ̃è lɛ́nnaa kásańnɛ.
10 Ǹ tó yã vɛ̃ɛḿma Luda,
ǹ tó yã zaaa kɛ̀ aↄ̃ↄe kpákpaanↄ wí ń musu.
Ǹ pɛ́ḿma n aɛzĩ aↄ̃ taari pariinↄ yãnzi,
zaakɛ aↄ̃ gì n yã mazi.
11 Ǹ tó gbɛ̃ kɛ̀ aↄ̃ↄ utɛna n kiianↄ yáa dↄ,
aↄ̃gↄ̃ lɛ̀ sii kↄ̃n pↄnnaao gurↄ píngi.
Ǹ ↄ kú gbɛ̃ kɛ̀ aↄ̃ↄ yenziinↄla,
lɛ aↄ̃ pↄnnaa kɛ n yã musu.
12 Dii, nɛɛ̀ aubarika da gbɛ̃ maaanↄn,
nɛɛ̀ ligańzi yenzio lán sɛngbango bà.