86
Dↄnlɛ wɛ́ɛkɛna Ludaa
Dauda lɛ̀.
Dii, ǹ swã kpá ma yãzi ǹ wemala,
zaakɛ takaaside wɛ̃ndadeen ma ũ.
Ǹ ma wɛ̃̀ndi dãkpa,
zaakɛ má a zĩnda kpàmma.
Ǹ mamↄma n zↄ̀bleri mì sí,
zaakɛ mɛ́ɛ n náanɛ kɛɛ.
Ḿbe ma Luda ũ.
Ǹ sùu kɛmao, Dii,
zaakɛ mɛɛ̀gↄ̃ n sisii kↄngↄ kↄ̃n uusiɛo.
Ǹ mamↄma n zↄ̀bleri pↄↄ kɛ nna,
zaakɛ ma làakari tà n kiia, Dii.
Ń maa bensↄ̃ ń sùu vĩ, Dii,
n gbɛ̃kɛ bíta n sìsirinↄnɛ.
Dii, ǹ swã kpá ma wɛ́ɛkɛnazi,
ǹ làakari dↄ ma wɛ̃nda wiiia.
Mɛ́ n sísi ma nawɛ̃akɛgurↄↄ zĩ,
zaakɛ nɛɛ̀ wemala.
 
Tãa ke é sí lɛ́kↄ̃zinyoro, Dii,
gbɛ̃kee è fↄ̃ à n kɛna kɛro.
Borii kɛ̀ ń kɛ̀nↄ é mↄ́ wà kúɛnnɛ,
aↄ̃ n tↄ́ bↄ ń píngi.
10 Zaakɛ ń bíta bensↄ̃ nɛɛ̀ dabuyãnↄ kɛ,
ḿbe Luda ũ ndo.
 
11 Ǹ n zɛ́ ↄdↄamɛ, Dii, mɛ́gↄ̃ táa oo n yãpuraa guu,
ǹ ma laasuu kɛmɛ do, lɛ màgↄ̃ n vĩa vĩ.
12 Mɛ́ n sáabu kpá kↄ̃n nↄ̀sɛo do,
Dii ma Luda, mɛ́gↄ̃ n tↄ́ bↄↄ gurↄ píngi.
13 Zaakɛ gbɛ̃kɛɛ kɛ̀ ń kɛ̀mɛɛ bíta,
n ma wɛ̃̀ndi bↄ̀ gɛ̀wãa lↄ̀n.
 
14 Luda, karambaanideenↄↄ e fɛɛɛmazi,
gbɛ̃ pãsĩnↄↄ e ma wɛɛ, aↄ̃è n yã daro.
15 N Dii, Luda sósobideen n ũ,
ń sùu vĩ bensↄ̃ n pↄↄ è fɛ̃ kpaaro,
n gbɛ̃kɛ kↄ̃n n náanɛo bíta.
16 Ǹ aɛ dↄma ǹ ma wɛ̃nda gwa,
ǹ n zↄ̀bleri gba gbãaa,
ǹ mapi n zↄ̀nↄkpare nɛ́ mì sí.
17 Ǹ yãmaakɛna gbɛ̀ ↄdↄamɛ
lɛ ma zangurinↄ e, wí ń kũ,
zaakɛ Dii, n dↄmalɛ,
n ma làakari kpàɛmɛ.