7
Tuwa givevuvu.
1 Ada Yaubada givonena Nowa, givona, “Oyeni ke ya gabu matatabuna nodi wanayage aki wagaine, faina gaitani oye toyegayegana tova taidei anakaliva wagaidiya.
2 E ada kevakeva seyana seyana yegayegadi adiseveni wavavinediyavo una dododi, ada kevakeva seyana seyana keke yegayegadi luwei luwei kaliva wavavinena una dododi.
3 Ada kaduwe manuga seyana seyana wagaidiya adiseveni wavavinediyavo una dododi. E ada aimo badi ina vetubulalaga babi matatabuna wagaine tuwa muline.
4 Taidei anafaiweya unagugai faina yadayada anaveseveni muline wei gana imilina babi wagaine ada gina lugalugaga yadayada foti ke bogi foti. Ada gaitoma seyana seyana gabubudi wayawaidi gana luveyawaliyedi babi taidei wagaine.” Taidei anafaiweya Yaubada givona Nowa wagaine.
5 Ada gaitoma matatabuna Nowa gigugaiyedi Yaubada giveimeyena mamauwe.
6 E ada Nowa anamalamala 600 wagaine tuwa giyegemona babi wagaine.
7 Ada Nowa ke vavinena ada natunavo vavinediyavo nodi iyage aki wagaine, tuwa inaosena.
8 Kevakeva yegayegadi ada keke yegayegadi wavavinediyavo, anafaiweya manuga ke kaduwe anafaiweya gaitoma matatabuna yagayaganidiyavo babi wagaine,
9 kaliva ke vevine ielai Nowa wagaine ada iluku aki wagaine, anafaiweya Yaubada bademowa Nowa giveimeyena mamauwe.
10 Ada yadayada seveni giavaidi muline, tuwa giyegemona babi wagaine.
11 Nowa anamalamala 600 anatoveya, tainei yadayada 17 vaikoi anavelu wagaine, tuwa givevuvu. Ada folufolu matatabuna dibune iibwaketa ke ilumoimoi ada wei toyogi-moena gabameya giobu.
12 Ada wei gilugalugaga yadayada foti ke bogi foti.
13 Tayuwe yadayada-nai wagaine Nowa wavavinena ke natunavo kaliva aditoto, Semi, Ami ke Iyafeta ada vavinediyavo nodi iyage aki wagaine.
14 Kaduwe bademowa idododi kevakeva walawala seyana seyana adiita anafaiweya, ada kevakeva melamelala matatabuna adiita anafaiweya, kaduwe kevakeva seyana seyana babi wagaine, yagayaganidiyavo adiita anafaiweya ke manuga seyana seyana adiita anafaiweya ke gaitoma matatabuna waofadi.
15 Ada gaitoma seyana seyana iveyawaitunatunau ani wafafalidi ielai wagaine ada luwei luwei iluku aki wagaine.
16 Ada kevakeva ilukuluku kaliva ke vavine anafaiweya gaitoma matatabuna wayawaidi iveyawaitunatunau, Yaubada Nowa giveimeyena mamauwe. E ada Yaubada gifalibodedi negenine.
17 Yadayada foti wagaidiya gufa gituwa lakaina ada givegawana ke aki-nai gialualugena ada gilaka lakaina babi getane.
18 Tuwa giveinala-mowa ada au aki gialugelugena gufa tabone.
19 Gufa gilaka lakai-vagaina babi wagaine ada oya auwe tulatuladi aku gituwatavutavudi.
20 Gufa gituwa gilaka lakaina ada au oya ikavivila ani anagawana giobu oya debaidiya tainei seveni mita anafaiweya.
21 E ada gaitoma seyana seyana wayawaidi babiya inunudadana ikwaa-yabu, anafaiweya manuga, kevakeva melamelala, kevakeva walawalaa, gaitoma matatabuna yagayaganidi, ada kaliva, matatabudi ikwayabu.
22 Gaitoma seyana seyana kabu awadiya iveyawaitunatunau babi wagaine ani ialika.
23 Gaitoma seyana seyana wayawaidi babi wagaine inunudadana, anafaiweya kaliva ada kevakeva ke gaitoma matatabuna babi wagaine yagayaganidiyavo ada mwatugu manugidi ani Yaubada giluveyawaliyedi. Aku Nowa gaga gitufo, ada badi gavega nodi aki wagaine.
24 Ada gufa gituwa babi gikiwafina yadayada 150 wagaine.