25
Wawahin Safuhudohudoꞌi Heyaheyasonidi
Matiu 25:1-13
1 Galewa Aba Baꞌisa Nuꞌuna itaꞌitana doha wawahin nuwanuwasupudi safuhudohudoꞌi, edi lampa sa abidi, na sa lau taumoho sa fanahi, sa bagibagiyen.
2 Faligigi sibasibadi, na faligigi yauyauledi.
3 Yauyauledi edi lampa sa abidi, inmoho edi kelesin hige fahafudi ti abidi.
4 Sibasiba edi lampa ma kelesinidi yo fahafudi sa abidi.
5 Tau nahi wa begana ya boneyawa be mahudoꞌidi matadi sa enoꞌeno yofede sa eno.
6 Maihona atipuna yai sa fatala neꞌeneꞌeꞌen, tiyen,
<<Haidamai! Tau nahi ya mahano. Au lau au failobahin.>>
7 Nuwanuwasupudi sa obiyo fahi, edi lampa sa abi nonohaidi.
8 Yauyauledi faligigi wa sa anꞌeta lau, wawahin sibasibadi lebedi, tiyen,
<<Aee–, kelesin ema au hinidi. Ema lampa sa peꞌi.>>
9 Sibasibadi tiyen,
<<Ai haꞌa gonogonowamai. Au lau tau uneꞌune lisidi yai, emi au unedi.>>
10 Sa aulaha sa lau, na mulidi yai, tau nahi ya mahano. Tau nonoha faligigi wa sa lau fafanahi baꞌuna yai, na edaꞌeda sa gudu.
11 Mulidi yai, kelesin tau yoꞌo sa mahanoma, be sa oiꞌoi, tiyen,
<<Baꞌisa, Baꞌisa, ema edaꞌeda u soꞌe!>>
12 Alinadi ya bui, iyen,
<<E faliba dudulaimiu mate, E fakaumiu.>>
13 Lisina yai, Yesu ena liba ya falafusofa, iyebom,
Au nonoha, paꞌana ana lahai yo ana maihala hige au sibai.
Moni Tau Ita Watanidi Heyaheyasonidi
Matiu 25:14-30
(Luka 19:11-27)
14 Lahaidi yai ni Galewa Basileiyana haba doha ite. Fuya hudoꞌi taumoho hesa bena haba ya lau ya lauwasi; ena tau paisowa ya yoga gogondima, be hesa-hesa ya tole, haba ena ginauli sa ita watanidi.
15 Esega-esega ena sibasiba laꞌina yai ya soi watan: hesa 5 tausan kina ya felen, hesa 2 tausan kina na hesa 1 tausan kina ya felen. Habahim ya lau ya lauwasi.
16 5 tausan tau abina hige i bagibagi ya lau ya fapaisowa be 5 tausan hesa ya lobahi.
17 Abiꞌabina eseꞌesegana mate tausan luwaga tau abina ya laulauwen be hagahaga tausan luwaga hinaga ya lobahi.
18 Inmoho, tausan esega tau abina wa ya aulaha ya lau be ena baꞌisa ena moni ya pului tanohi ganahewana yai.
19 Fuya lofalofa ya ofi, mulidi yai, tau paisowa edi baꞌisa ya mahano fuyoma, be ena moni maidana sa pei gogonidi.
20 5 Tausan tau abina ya fapaisowa be 5 tausan hesa ya ginauli iyen,
<<Baꞌisa, wa ita! Kina tausan faligigi wa felegu, na E fapaisowa be tausan faligigi hesa E ginauli.>>
21 Alinana ena baꞌisa ya bui, iyen,
<<Ya loholoho wananaha, Um egu tau paisowa loholoho yo dudulai dogana! Ginauli kikiꞌina itaꞌita watanidi yai mate wa loholoho, debana yai haba E tole hitim be ginauli boludi wa ita watanidi. U laoma, be egu kwade tefana u kwadeꞌen!>>
22 Habahim tausan luwaga tau fapaisowana ya laoma hinaga, be ena baꞌisa ya faliba, iyebom,
<<Baꞌisa, wa ita! Tausan luwaga wa felegu be E falaꞌi mate em hagahaga hinaga tausan luwaga, ma!>>
Ena baꞌisa iyen,
<<Ya loholoho wananaha, um egu tau paisowa loholoho yo dudulaina!
23 Um mate moni kikiꞌina itaꞌita watanidi yai wa loholoho. Lisina yai, um haba E tole hitinim be ginauli boludi wa ita watanidi. U laoma, be egu kwade tefana u kwadeꞌen!>>
24 Ofiꞌofina mate, 1 tausan tau abina ya luhuma, be iyen,
<<Baꞌisa, E sibaim mate um tau nuwa kipi hesa; wa lau gabu mate hige u umahidi na wa tanogogo mate tumadi hige u falili.
25 Logena E ꞌwasabuwem, be E lau em moni E pulu tanohi ganahewana yai. Be wa ita! Somo wa felegu ma gonogonowana E fele fuyoim.>>
26 Ena baꞌisa iyen,
<<Um mate tau paisowa heyaheyayana yo matamata peꞌipeꞌina! Haꞌa doha wa sibai mate, mahula E lau gabuidi mate, hige yau ya umahidi, yo umaꞌuma E tano gogoꞌidi mate hige tumadi ya falili?
27 Wa somo? be egu moni hige u lau banika yai u tole, haba E fuyoma mate egu moni hudohudoꞌina ma hantapuna E abi fafuyo?>>
28 <<Debana yai, ena 1,000 kina lisina yai haba ami kamfahi, be 10,000 kina tau abina ami felen.
29 Paꞌana sai somo haꞌa lebena yai mate haba hesa E felen, be ena boludi. Na sai somo begana lisina yai haba E kamfahi.
30 Na tau paisowa heyayana haba ami weꞌai ya lau ai kamukamumu. Ainiya haba ya tan yo gadigadina ya nalididin.>>
Sipi yo Gouti
Matiu 25:31-46
31 Yena Doga Natuna ma namanamalina ya laoma, maꞌena ena anelu haba ena aba taꞌai namanamalina yai ya taꞌai.
32 Nuꞌu mahudoꞌidi dodogadi haba sa faꞌoigogoma ai lisina, na haba ya hinelidi doha sipi yo gouti sa hinelidi.
33 Haba sipi ai sibana ya toledi, na gouti ai seulina ya toledi.
34 Na habahim, Kin ya libalau tefa siba yai lisidi, iyen,
<<Au laoma, safaluma umi Tamagu ya faloholohomiu, fuyana tanoꞌubu ena fuya falasana yai na Aba Baꞌisa emi loholoho ya abi nonohaidi au abi.
35 Paꞌana E guliyam na agu kalahe ami felegu. Gadogu ya magu na hoꞌowa ami felegu be E nom. Yau taꞌowawa na ami yoga hitinigu.
36 Hige egu ginauli na umi egu ami soi. Sa falau deligu na ami laoma ami kepaigu. E lepa na ami ita watanigu.>>
37 Tau dudulai dodogadi haba alinana sa fafuyo, tiyen,
<<Guyau, sofuyana ꞌe itam wa guliyam na ꞌe fakalahem, o gadom ya magu na hoꞌowa ꞌe felem?
38 Fuya som ꞌe itam um mate taꞌowawa, na ꞌe yoga hitinim, yo hige em leli na ginauli em ꞌe soi?
39 Wa asiyebo yo um deli yai, na ma fisa ꞌe laowa ꞌe kepaim?>>
40 Kin haba iyen,
<<E faliba dudulaimiu, somo kiukiu ami ginaulidi haidagu te lisidi yai mate ami ginauli lebegu.>>
41 Habahim ya libalau seulina yai lisidi iyen,
<<Umi safaluma Yaubada ya kaumananaꞌedi! Au lau hudoꞌi! Satani yo ena anelu adi oyagi alaꞌalana ibege i peꞌi, nonohana yai au alagolu.
42 Paꞌana E guliyam na hige au ita galewaigu, gadogu ya magu na hige somo au felegu be ya nom.
43 Yau taꞌowawa, na hige au yoga hitinigu. Hige egu leli ginaulidi na egu hige au soi. E asiyebo yo E lau deli. Inmoho nuwamiu sa anꞌanloya hudoꞌi.>>
44 Alinana hinaga haba sa bui, tiyen,
<<Guyau, fuya somo ꞌe itam wa guliyam, e gadom ya magu o um taꞌowawa, o hige em leli ginauli o wa asiyebo o um deli yai - na hige ai saguhim?>>
45 Alinadi haba ya bui iyen,
<<E faliba dudulaimiu, somo hige au ginaulidi haidagu te lisidi yai, mate hige au ginauli yau lisigu yai.>>
46 Yofede, iti haba sa lau kamkamna otaꞌota fahina, na tau dudulai haba sa lau mwahuli hige ofina yai. (Diyon 5:29; 6:40)