26
Yesu Aba Wunuina Edana sa Yoꞌo
Matiu 26:1-5
(Maleko 14:1-2; Luka 22:1,2)
1 Ginauli mahudoꞌidi Yesu ya libaedi mulina, ana hewahewali ya falibadi iyen,
2 Ami sibai mate, asubena haba Bayawa Anꞌangogona, aimuli haba Doga Natuna sa fele afulen be sa tutu fapatu ai kolosi.
3 Habahim tau antalasam baꞌibaꞌisadi yo babada lalaꞌi sa faꞌoigogo esega Tau Antalasam Baꞌisana hesana Kaiyafasi ena luma yai.
4 Edaꞌeda sa yoꞌo na sa oiꞌoiliba bena sidohana, bwalabwala yai, Yesu sa tohai, be sa lau funuhi. Inmoho sa liba, tiyen,
5 Tabu ai mataꞌasi fuyana, paꞌana doꞌata, dodoga ena sa lau be lulu sa fatubu.
Betani Nuꞌuna yai Waihin Hudoꞌi Yesu ya Famaꞌi
Matiu 26:6-13
(Maleko 4:3-9; Luka 7:37,38; Diyon 12:1-8)
6 Yesu hola Betani yai, lepela dogana hesana Saimon ena luma yai,
7 waihin hesa maꞌi panepanena maisana laꞌilaꞌina alabasita botolona yai ya abi, na ya laoma Yesu lisina, be aba kalahe, baꞌuna yai, boluboluna yai ya fagoi.
8 Yesu tau famuli watanina sa ita, be manadi sa bala. Yofede sa fatiꞌo tiyen,
Paꞌana somo be maꞌi ya aiheyaꞌen?
9 Maꞌi ni maisana ya laꞌi wananaha. Egoba te uneꞌuneꞌen be monina tau gogo gesagesa te feledi.
10 Somo sa libaen mate, Yesu haꞌa ya sibai, yofede iyen,
Paꞌana somo waihin te ami fatalapiliyen? Ginauli loholohona ya ginauli lisigu yai.
11 Tau gogo gesagesa fuya ouꞌouli maꞌemiu, na Yau ibege fuya ouꞌouli maꞌemiu.
12 Taugu yai maꞌi ya hin, mate, egu toletoletau abi nonohana ya ginauli.
13 E faliba dudulaimiu mate, somo yai Wasa Loholohona te sa lauguguyaꞌen tefa hesa-hesa yai, haba waihin te somo ya ginauli lisigu yai fafaꞌilalana sa dedei.
Diudasi, Yesu ana ya Wewe
Matiu 26:14-16
(Maleko 14:10-11; Luka 22:3-6)
14 Habahim safuhudohudoꞌi luwaga hesauna hesana Diudasi Isakaliyoti ya lau Antalasam Baꞌisana lisina,
15 be ya fatiꞌoi, iyen,
Ibe doga ni, ana E wewe ai lisimiu, haba maisagu somo ami felegu?
Yofede siluba piꞌadi 30 sa fatilidi be sa felen.
16 Amainiya na ya lawen mate Diudasi edaꞌeda ya yoꞌo haba sidohana ena felefele afulenna nimadi yai.
Bayawa Anꞌangogona
Matiu 26:17-25
(Maleko 14:12-21; Luka 22:7-13; Luka 22:21-23; Diyon 13:21-30)
17 Fwalawa Sesese Gesana Anꞌangogona lahaina bwaꞌibwaꞌina yai, tau famuli watanina sa laoma be Yesu sa fatiꞌoi tiyen,
Ai somo haba em ꞌe abi nonoha, be Bayawa Anꞌangogona wa ginauli?
18 Alinadi ya bui, iyen,
Au lau duhu laꞌi, be yena taumoho hesa ami lobahi mate au faliba, auwen,
<<Tanuwaga alinana doha ite, iyen, <Ena fuya haꞌa ya hanahanauma, be bena maꞌena ana hewahewali Bayawa Anꞌangogona sa abi nonohai em ai luma.>>>
19 Yofede, ana hewahewali alinana sa lau watan, be Bayawa Anꞌangogona sa abi nonohai.
20 Maimailafina, Yesu maꞌena hewahewali sa taꞌai aba kalahe baꞌuna yai be sa kalahe gogo.
21 Sa kalakalahe na ya falibadi, iyen,
E faliba dudulaimiu, ganahewamiu yai sai esega haba agu wa wewe.
22 Nuwadi sa heyaya be esega-esega ya libalau lisina iyen,
Guyau bena Yau, ye?
23 Alinadi ya bui iyen,
Sai maꞌegu nimamai ꞌe dauꞌwaidi otogole yai te, mate agu tau wewe.
24 Doga Natuna doha wasana sa uli mate, haba ya peꞌi. Inmoho Doga Natuna ana tau wewe ni, haba heyaheyaya laꞌilaꞌi ya fahoina! Loholohona moho ibe dogana ni tabu ti yosi.
25 Habahim, ana tau wewe, Diudasi, iyen,
Baꞌisa, nuwada yau?
Yesu iyen,
Na, ii–.
26 Anꞌangogo ganahewana yai, Yesu fwalawa ya abi na Yaubada ya lautoꞌiyen ya ifi be tau famuli watanina ya feledi, na iyen,
Au abi be au an. Itete yau taugu.
27 Habahim, kaputi ya abi. Yaubada ya lautoꞌiyen, na habahim ya feledi. Na iyen,
Au nom, mahudoꞌimiu. Itete yau ꞌwasinagu. (Diyon 6:56)
28 ꞌWasinagu te yali fwaufwauna, ya tabuliwa dodoga mahudoꞌidi debadi yai, be edi heyaya haba Yaubada ya nuwa afuledi.
29 E falibamiu, waen masina te, ibege ya nom fuyoi, ahoꞌite na ya lau ee–, Yau yo umi te nom fuyoi Tamagu ena Aba Baꞌisa Nuꞌuna yai.
30 Yofede, wana hesa sa wanai, mulina, sa lau Oliwe Uduhulina.
Pita ena Falele Yesu ya Libaen
Matiu 26:31-35
(Maleko 14:27-31; Luka 22:31-34; Diyon 13:36-38)
31 Habahim Yesu ya falibadi, iyen,
Maihona te haba emi kawawananaha lisigu yai sa welo, paꞌana Uliꞌuli Tabuna iyen:
<<Tau ita wata haba sa wunui, na sipi baiwadi haba sa dabalala.>> (Sekalaiya 13:7)
32 Inmoho haba E mwahuli fuyo, na mulina yai, haba E bwaꞌi, be E lau Galili.
33 Pita iyen,
Bwagana! Mahudoꞌidi haba sa dabalala um debam yai, na yau hige gonowana ya lau afulem.
34 Alinana Yesu ya bui iyebom,
E faliba dudulaim, maihona te kamkam ibege hola i gwane mate, haba wa faleleꞌegu ma faihona.
35 Pita iyen,
Bwagana, haba te peꞌi, hige gonowana ya faleleꞌem.
Mahudoꞌidi edi libana gonogonowana.
Yesu Getesemeni yai ya Lauꞌuꞌula
Matiu 26:36-46
(Maleko 14:32-42; Luka 22:39-46)
36 Habahim Yesu maꞌana hewahewali sa lau nuꞌu hesa hesana Getesemeni, na habahim ya falibadi iyen,
Aiteꞌi, au taꞌataꞌai, na yau haba E lau ai kwalau neꞌi, E lauꞌuꞌula.
37 Pita yo Sebedi nanatuna luwaga ya foyahidi be maidana sa lau. Nuwa heyaya yo kamkamna nuwana sa famohafu, na ya libalau lisidi iyen,
38 Nuwa heyaya ganahewagu yai mate, ya laꞌi wananaha. Begana haba ya faheyayagu. Aiteꞌi au miya, na au tuhutuhuli watanigu.
39 Begana ya sigilau, habahim, ya hoba lidi tanohi yai, na ya lauꞌuꞌula iyen,
Tamagu, yena um em nuwatuhu yai mate, kamkamna lisigu yai te u abifahi! Inmoho, hige yau egu fanuha, um em fanuha yai.
40 Na habahim ya fuyo ana hewahewali faihona lisidi, be ya itadi, sa laulau eno. Yofede, ya libalau Pita lisina,
Tataumiu faihona! Sidohana hige umi be yau ta tuhutuhuli maihala tupotupo ganahewana yai?
41 Au tuhutuhuli yo au lauꞌuꞌula! Haba ibege lauꞌita au lobahi. Yaluwamiu sa nonoha. Inmoho, ꞌwapimiu sa belubelu.
42 Fafaluwagana ya fuyo, be ya lauꞌuꞌula iyen,
Tamagu, yena kaputi te, hige gonowana u lawe hudoꞌiyen ana sigana E nom mate, um em nuwatuhu haba E lau watan.
43 Ya fuyoma mate, ya ita bodaidi sa laulau eno, paꞌana matadi sa maigibo.
44 Yofede ya lau afuledi na fafaihonana ya fuyo ya lauꞌuꞌula mate, libadi gonogonowadi ya libaedi.
45 Habahim ya fuyoma ana hewali lisidi, be ya falibadi, iyen,
Hola ma enoꞌenomiu yo ma anyawasimiu? Ana maihala ya talai, yo Doga Natuna mate ana sa wewe dodoga heyaheyayadi nimadi yai.
46 Au mwaito, te auꞌaulaha! Agu tau wewe ya laoma!
Yesu sa Tohai
Matiu 26:47-56
(Maleko 14:43-50; Luka 22:47-53; Diyon 18:3-12)
47 Yesu hola ma libalibana na yofede, Diudasi, Yesu ana hewali hesa ya mahano. Dodoga boludi maidana sa laoma, ma nigonigodi yo ma kepakepatadi. Tau antalasam yo baꞌibaꞌisa haisa sa fatamalidi.
48 Tau nuwa afulenna mate, dodoga wa haꞌa ya fanigugudi, iyen.
Taumohona E falafu mate, in dogana ami fanuha. Au tohai!
49 Diudasi ya dudulai Yesu lisina na iyen,
Tanuwaga, Yauwedo.
Na habahim, ya falafu.
50 Yesu alinana ya bui, iyen,
Hidagu, au abi watawatan feulai.
Habahim, sa laoma, be Yesu sa tohai, na sa toha didin.
51 Yesu ana hewali hesa ena baineti ya solu fahi be Tau Antalasam edi Baꞌisa ena fayofayo tau abina beyana ya tala sapi.
52 Yesu iyen,
Em baineti u husai fafuyo, paꞌana sai baineti ya abi haba bainetina yai ya pe'i.
53 Emi nuwatuhu bena hige gonowagu haba Tamagu ya anꞌetai be anelu pele laꞌilai oulina safuhudohudoꞌi luwaga i fatamalidima be agu ti fofo?
54 Inmoho yena somo bena ya tubu na hige'e, mate Buka Tabuna haba sidohana fafawananahana?
55 Maihalana yai Yesu ya libalau baiwa lisidi, iyen,
Emi nuwatuhu mate, yau pilipili tau laulau fatubu? Be logena ma baibainetimiu yo ma kepakepatamiu ami laoma be ami augu?
56 Ginauli mahudoꞌidi sa tubu te mate peloweta edi uliꞌuli bena ya fawananahadi.
Yofede tau famuli watanina mahudoꞌidi sa dabalala, na ibona sa lau afulen.
Yesu Sa Falau Fatala
Matiu 26:57-68
(Maleko 14:53-65; Luka 22:54-55; Luka 22:63-71; Diyon 18:13-14; 18:19-24)
57 Saluma Yesu sa tohai mate, sa lawen Kaiyafasi ena luma. In Tau Antalasam Dodogadi edi Baꞌisa. Amainiya mate laugagayo tau lau faꞌataenna yo babada sa bagibagiyen.
58 Pita mate, muli yai ibona ena atiꞌatipu, Tau Antalasam Baꞌisana ena luma ganana ganamulina yai. Muli yai, habahim, ya luhulau, be maidana Kaiyafasi ena tau gati sa taꞌataꞌai gogo, dobidobi yai, be somo haba Yesu ai lisina sa ginauli ya ita.
59 Tau antalasam babaꞌisadi, yo Sanhedeli peledi mate, mata bwalabwala sa yoꞌo, be bena ainiya haba Yesu sa wunui.
60 Tau wikinisi boludi sa laoma, inmoho hige ana mata hesa ti lobahi. Ofiꞌofina mate wikinisi bwalabwala luwaga sa obiyoma,
61 na tiyen,
Doga te iyen, <<Yau gonowagu Yaubada ena Dubu Tabuna E lubi lopalopa, na lahai faihona ai ganahewana haba E faꞌobiyo fuyoi.>>
62 Yofede Antalasam Baꞌisana ya obiyo be Yesu ya faliba iyen,
Dodoga edi lau fagilu hewam yai te, haga u bui?
63 Inmoho Yesu ya doꞌo. Yofede, Antalasam Baꞌisana wa ya liba boda, iyen,
Yaubada Mwahumwahulina hesana yai E falibam mate, u falibamai yena um mate Fasinabo Dogana, Keliso, Yaubada Natuna, e higeꞌe?
64 Alinana Yesu ya bui iyen,
Ii–, somo wa libaen mate, logena. Inmoho mahudoꞌimiu E falibamiu mate: Fuya matada yai haba Doga Natuna ya taꞌai Yaubada Hewa Wananaha yai, ai sibana, yo ai Galewa yadadi haba ya laoma ami ita.
65 Yofede Antalasam Baꞌisana ena leli ya pulitidi na iyen,
Yaubada matana yai ya liba heyaya! Hige gonowana wikinisi haisa haba ta yoꞌoi! Yaubada ya liba faheyaya haꞌa ami atahi.
66 Emi nuwatuhu doha somo?
Alinana sa bui, tiyen,
Ii–, peꞌi moho.
67 Yofede sa lau kanisofi, yo sa talai, na haisa sa lau papaliꞌi.
68 Na tiyen,
<<Keliso,>> yena um peloweta dogana, salumadi sa talaim, u falibamai!
Pita Yesu ya Falelen
Matiu 26:69-75
(Maleko 14:66-72; Luka 22:56-62; Diyon 18:15-18; 18:25-27)
69 Pita hola ya taꞌataꞌai luma laꞌilaꞌina dobidobina yai, na Tau Antalasam Baꞌisana ena paula tau abina ya laoma be iyen,
Um hinaga mate Yesu Galili maꞌem.
70 Inmoho, mahudoꞌidi matadi yai ya falele. Alinana ya bui, iyen,
Somo um wa libalibaen mate yau hige ya siba.
71 Habahim Pita ya aulaha ya lau edaꞌeda hafohafona yai na, waihin hesa hasahasalana ya ita, be dodoga ya falibadi iyen,
Doga te, maꞌena Yesu Nasaleta.
72 Na ya falele boda, yo ya angwala, iyen,
Dogana mate yau hige ya sibai!
73 Hige walolona na, saluma aho amainiya sa obiꞌobiyo, sa lau Pita lebena yai na tiyen,
Na fede, um hidadi hesa. Alinam dagudaguguna ya famahatam, mate um Galili dogana.
74 Habahim ya angwala hasa matadi yai,
Dogana hige ya sibai!
Hige walolona, kamkam ya gwane. Yofede, somo Yesu ya libaedi wa, ya nuwatuhuidi,
75 Kamkam ibege hola i gwane, mate haba wa faleleꞌegu ma faihona.
Yofede ya lau ganamuli yai, be nuꞌu ya lau tantansinidi.