☰ Romanos 13
13
1 Nic'atzin chi conojel niquinimaj xa achique na chi autoridad ri yo'on pa quivi'.* Roma ronojel autoridad ja ri Dios yayon, y ri ec'o, ja rija' yayon uchuk'a' pa quik'a'.* 2 Roma c'a ri', ri nupaba-ri' chuvech ri autoridad, xa chuvech ri ruyo'on can ri Dios nupaba-vi-ri'. Y ri quiri' yebano, quiyon nicoyoj-ka castigo pa quivi'. 3 Roma ri yebano gobernar man eyo'on ta richin niqui'en chique ri ebanoy ri utz* chi niquixi'ij-qui', xa richin tiquixi'ij-qui' ri ebanoy ri man utz ta. Romari', richin chi rat manak roma naxi'ij-avi', tabana' ri utz, y utz xcatz'etetaj coma. 4 Roma ri nibano gobernar, jun rusamajinel ri Dios richin favor chave. Pero si man utz ta ri yatajin, taxi'ij-avi', roma c'o ruk'a' richin yaru'on castigar; rija' rusamajinel ri Dios richin nuya' ruq'uexel chique ri yebano ri man utz ta.* 5 Romari' nic'atzin chi rix ninimaj rutzij,* man xe ta richin man tika castigo pan ivi', xa roma chi ri ivánima nuna' chi nic'atzin yixniman tzij. 6 Ja roma ri' nitoj impuestos, roma ri yebano gobernar, erusamajela' ri Dios chuc'uaxic ri tinamit ronojel k'ij. 7 Ronojel ri nic'atzin chi nikaya' chique ri yebano gobernar, tikaya' c'a. Xa achique na ruvech impuesto yo'on pa kavi', tikaya'.* Ri nic'atzin chi yekanimaj, quekanimaj c'a, y ri can c'o quik'ij, tikaya' quik'ij.
8 Man utz ta chi c'o ic'as, xa titojo'. Pero c'o jun c'as ri can utz vi chi nivakalej, y ri' ja chi nijo-ivi' chivech.* Roma ri yerojo' conojel, najin riq'uin ronojel ri nuc'utuj ru-ley ri Dios. 9 Ri ley ri' nu'ij: Man tac'amala-ka-avi' riq'uin jun ri mana-ta achok riq'uin rat c'ulan-vi. Man cacamisan. Man catelak'. Man tatz'uc tzij chirij jun chic. Man tarayij ri achique c'o riq'uin jun chic. Y c'o chic ch'aka' ri nu'ij ri ley. Pero ronojel re' numaj ri mandamiento ri nu'ij: Achel najo-ka-avi' rat, quiri' mismo que'ajo' conojel.* 10 Ri najo' jun chic, man jun itzel na'an che. Romari', si yatojo'on pan avánima, yatajin riq'uin ronojel ri nuc'utuj ru-ley* ri Dios.
11 Ronojel re' nin-ij, richin tikajaka' utz ri runak' tak kavech,* roma keteman chi nuka yan ri k'ij tok xkucolotaj-e. C'o chic chi k'ij kayo'on kánima riq'uin ri Jesucristo, y romari' nkutiquer nika'ij chi vacami más nakaj chic c'o-vi ri k'ij chi nkucolotaj-e. 12 Ri k'eku'n richin ri ak'a' nik'ax yan, y xa ntel yan pe ri k'ij. Romari', man chic quekabanala' ri xa richin ri k'eku'n, xa tikavika-ki' riq'uin ri samajbel richin ri sakil.* 13 Tikac'uaj jun c'aslen ri can richin vi ri sakil.* Man tikaju-ki' chupan tak nimak'ij richin k'abaric,* ni man tikacusaj ri ka-cuerpo chupan tak mac ri niquiyec q'uix. Man utz ta chi c'o oyoval chikacojol y man utz ta chi itzel nikatz'et jun chic xaxe roma utz c'o.* 14 Nic'atzin chi nivik-ivi' riq'uin ri runo'oj ri Ajaf Jesucristo,* y man tiya-ivi' pa ruk'a' ri mac ri ye'alex-pe pan ivánima.*
* 13:1 Tit. 3:1; 1 P. 2:13. * 13:1 Pr. 8:15; Dn. 2:21; 4:32; Jn. 19:11. * 13:3 1 P. 2:14. * 13:4 1 Ts. 4:6. * 13:5 Ec. 8:2; 1 P. 2:19. * 13:7 Mt. 22:21; Mr. 12:17; Lc. 20:22-25. * 13:8 Gá. 5:14; Col. 3:14; Stg. 2:8. * 13:9 Lv. 19:18; Mt. 22:39; Lc. 10:27. * 13:10 Mt. 22:37-40. * 13:11 Ef. 5:14; 1 Ts. 5:6. * 13:12 2 Co. 10:4; Ef. 5:11; 6:13. * 13:13 1 Ts. 4:12. * 13:13 Lc. 21:34; Gá. 5:15; Ef. 5:18. * 13:13 Stg. 3:14. * 13:14 Gá. 3:27; Col. 3:12. * 13:14 Gá. 5:16; 1 P. 2:11.
☰