11
+Geé pipwohewiiéo, pwohewiin he é pipwohewii Kériso.
a huô tenye heme nye pwoiitihi ibu
(Pwahamii tii: 11―14)
A bwo tawii puninye
É pipii dewé, be geé mwo teko piniimiéo ati ne he ni naado, ke é ko a bwo âcehi ne ni cémun na é ne tewé*. +Kehe nimung me geé temehi pie, pa apihuô te ati ni apulie, ke wo Kériso; ke pa apihuô te ê toomwo, ke wo pa aiu hen; ke pa apihuô te Kériso, ke wo Padué.
É heme geé pwotapitihi, ke wo pana e pwoiitihi, me pana e cihe ne he nii Padué heme pwo a boon, ke time e uce pipaunu Kériso, pa apihuô ten.
Ke tai ni toomwo na lé pwoiitihi heme geé pwotapitihi, ai nina lé cihe ne he nii Padué, heme tice boolé, ke time lé uce pipaunu pa apihuô telé; ke piwien ne ko ê toomwo na e tali me tice iwo a punin. É hemepie ê toomwo, ke me te tice boon, ke me e tali me tice iwo a punin! Ke mepie tanim ne ko ê toomwo, me e tali me tice iwo a punin, ke wâé heme e ne ace bétawii na a punin.
+Be pa aiu, ke me time e uce tawii a punin§. Be weeng, ke a déme *a wâé te Padué*; kehe ê toomwo, ke ê wâé te pa aiu. +Be time e uce tabuhi pa aiu wo Padué mu ko a éé ê toomwo, kehe e tabuhi ê toomwo mu ko a éé pa aiu. Ke time e uce tabuhi pa aiu me de ê toomwo, kehe e tabuhi ê toomwo me de pa aiu.
10 É mu ko anaa, na ê toomwo, ke me tawii a punin: a ine a pihuô na e mu haahin, mu ko ni *âcélo.
11 Kehe é ne he Padaame, ke te tie ê toomwo heme te tie pa aiu; ke te tie pa aiu heme te tie ê toomwo. 12 Be pwohewii ne ko ê toomwo, e tabuhieng mu ko pa aiu, ke wonaa ne ko pa aiu, e âbeele ne pwo bwohemwo mu ko ê toomwo. Ke tai ni naado, ke tai âbé mu ko Padué.
13 Geé pitauti pie, he te wâé me ê toomwo, ke me e pwoiitihi te Padué heme time e uce tawii a punin. 14 He time e uce picaa na a bwomu pie, tanim heme pa aiu, ke e pwo me bwali ni apunin? 15 Ke hemepie ê toomwo, ke me bwali ni apunin, ke a pipwowâé, be ni apun, ke e ne beme a bétawii na a punin. 16 Ke hemepie pwo paceli muhi ten ko a bwomunen naa, kehe wogeme, ke te cemang ne kome§, me ni acéihi ne ko Padué.
A wiinaado te Padaame
17 Hemepie é ko cihe tewé jenaa, ke time é uce piwâékewé. Be ni pitihi tewé, na me wâé ne kowé, ke geé pipwotahi ne kowé.
18 +Be a bécéiuhen, ke é téne pie, é heme geé pwotapitihi, ke pwo celi piehadeniiwé, ke é mwomwohi pie a juuju. 19 Be wâé mwo hemepie pwo celi piehadeniiwé, be me wonaa, ke me nye alihi mu hadeniiwé, lépwona lé te pieabwé te Padué.
20 É heme geé pwotapitihi, ke time uce a wiinaado te Padaame* ana geé pé. 21 Be é heme geé pwowiinaado, ke geé wele, ke wo pa céiu, ke menen, ke wo pa céiu, ke e te junihe ûdu. 22 Te tice pomwa tewé me geé pwowiinaado me ûdu? Ai geé tééti a puapulie te Padué, ke geé pwo me tanim lépwona te tice delé? He me é pii tewé pie woté? Me é piwâékewé? Ûhu! É ne ha a bwomunen naa, ke time é uce piwâékewé.
Âne a wiinaado te Padaame
23 Be woéo, ke é hegi mu ko Padaame, ke é pacémunikewé kon pie: É ha a bwén na icueng hen, ke e pé a pwoloa wo Padaame Iésu.
24 +Ke e pipwo-olé te Padué, ke e ebii, ke e pii pie: «Ani, ke a ééng na me a dewé. Geé pwo ani beme geé pipaniimiéo.»
25 +Ke é alecehe a wiinaado, ke e pé a mwoûdu ko tabe megele, ke e pii pie: «A mwoûdu ce, ke a inenaado ko a *piapwo na mwo coho, na e pwo wo Padué, ko a cewéhung. [Be o wonaa a bwo ne na a péém ne ha awiemewé me weeng.] É téteda heme geé ûdu, ke geé pwo beme geé pipaniimiéo.»
26 Be é téteda heme geé eni a pwoloa ce, ke me geé ûdu ha a mwoûdu, ke geé patemehi a bwo mele te Padaame die ko a bwo mwojuia ten.
Pininim
27 +É mu ko anaa, ke wo pana e eni a pwoloa te Padaame, ai e ûdu ha a mwoûdu ten, heme time e uce pipwoiipieng, ke e pwotahi ne ko a éé Padaame ke a cewéhen. 28 Geé muko pétaapwo pininim ânebuhe a bwo wiinaado me ûdu. 29 Be wo pana e eni a pwoloa ke e ûdu ha a mwoûdu, heme time e uce temehi a éé Padaame, ke wo panaa, ke e te pébé a tautinaado ne kon.
30 É mu ko anaa, ke hiwon nina tice niihelé, ke cunu jélé mu hadeniiwé, ke hiwon nina lé mele. 31 Ke mepie genye te pitauti ni bwomu tenye, ke time e o uce tautikenye wo Padué. 32 +Ke heme e tautikenye ke e pwo me genye mwomwon wo Padaame, beme time nye uce pwocuhinaado me ni apulie pwo a bwohemwo.
33 Ke anaa, wogewé lépwo bééng, é heme geé pitapitikewé beme geé pwowiinaado, ke geé piucéikewé. 34 Ke mepie mene pace céiu, ke e pwowiinaado ne pelen, be heme geé pitapitikewé, ke me time e uce tautikewé wo Padué.
 
É ne ko ni béé naado, ke é bo pii hemepie é âdé pelewé.
+ 11:1 11.1 1 Korénit 4.16 * 11:2 11.2 Te pétaapwo pi-ité ni bwomu, he ni amu he ni pétaapwo benaamwon. É ha a benaamwon de Paulo, ke time uce wâé, heme bwali ni apuni pa aiu, ke time uce wâé me tali me tice iwo a puni ê toomwo. Be wâé heme pwoiipihi a bwomu tenye, âcehi ni bwomu telé me denye, ke me time uce tanahi lépwo béénye. + 11:3 11.3 Genèse 3.16; Éféso 5.23 11:3 11.3―11.10 Pa apihuô; A pihuô—Grek: A punin. A bwopiine mwo a pihuô, pwohewiin heme a puninye, ke pa apihuô te a éé apulie. 11:6 11.5,6 Mepie tanim ne ko ê toomwo—Wo lépwo Juif ânebun, ke lé tali a puni ê toomwo, heme e pwo ni huô na ta. Tali mwo ni apuni ni toomwo pwopwaaden. + 11:7 11.7 Genèse 1.26−27 § 11:7 11.7 Me time uce tawii a punin—ai Time uce cuwokon me e tawii a punin. * 11:7 11.7 A déme a wâé te Padué—E caa ne pa apulie wo Padué, beme e pwohewiieng, weeng Padué. + 11:8 11.8−9 Genèse 2.18−23 11:10 11.10 A ine a pihuô na e mu haahin mu ko ni âcélo—Time uce pwéélang ko a bwopiinen. Weengi ni béé bwo niimihi nen de lépwo béé dotéén ko a Tii Iitihi: • Ê toomwo, ke e habwii te ni âcélo pie, pwo mwomwon den, beme e pwoiitihi me pipépwooti ne he nii Padué. Ke a mwomwon naa, ke e âbé mu ko Padué. Ai, • E habwii te ni âcélo pie, e paciiti pa aiu hen. Ai, • E pipwopain koja lépwo âcélo te Caatana (ni duéé), he e mwo ko pwoiitihi. Ai, • O pwojunuun koja ni duéé, beme e piwéden kojalé. 11:14 11.14 Bwomu—Grek: La nature. Wieli a bwopiine ani pie a bwomu te ni apulie. § 11:16 11.16 Cemang ne kome—ai Cemang ne kong. + 11:18 11.18 1 Korénit 1.10−12 * 11:20 11.20 Wiinaado te Padaame—Ne pele ni bécéiuhe acéihi ne ko Iésu, ke te tice Caanilo (Sainte-Cène, Eucharistie) pwohewiikenye. Lé te wiinaado pwohewii a bwo wiinaado tenye ati he ni tan. + 11:24 11.24−25 Mataio 26.26−28; Maréko 14.22−24; Luka 22.19−20 + 11:25 11.25 Exode 24.6−8; Ébéru 8.8−13 + 11:27 11.27 Ébéru 10.29 11:29 11.29 Time e uce temehi a éé Padaame—Alo ni bwopiinen: Ai, Time e uce temehi pie, céiu jélé me ni acéihi béén na lé wiinaado me ûdu, be céiu a éé apulie, a éé Kériso. Ai wieli, Time e uce temehi pie ana e ûdu me wii, ke {a ine} a éé Kériso me a cewéhen, he e mele me denye; ke a naado na te junihe iitihi. + 11:32 11.32 Ébéru 12.5−6