9
E pwopain wo Paulo
+Time uce jan me é pwo aceli nimung kon? He time uce woéo pa apostolo? Time é uce ali Iésu Padaame henye? Time uce wogewé ni acehi a penem dong ne he Padaame? +Hemepie time é uce *apostolo ne te ni béén, kehe é apostolo ne tewé. Be wogewé ni bépajuujuhi na a penem dong ne he Padaame.
Pwo mwomwon dong be pa apenem
É hegi ne te lépwona lé pipé ne kong pie: +He te tice mwomwon demu, me gemu* wiinaado, ke ûdu? He te tice mwomwon demu, beme gemu pé lu mwodemu acéihi, pwohewii ana lé pwo wo lépwo béé apostolo, ke wo lépwo ciéé Padaame, ke wo Pétéru? Kona te wogemu cehi me Barnabas, na me gemu penem ne ko mwani, beme gemu mulie?
É heme e â he coda wo pace céiu, ke time e uce pwocuhin me e pwocoda. Ke wo paceli e cemi ace éé tabe megele, ke kona time e uce wii ni acehin? Ai wo paceli e cile ace bwehi wota, ke kona time e uce ûdu lait mu ko a bwehi wota?
He é pii ni naado naa, ne ha a bwomunen ne ko pa apulie? Ai ni patén mwo, ke he time e uce pii ni naado naa? +Be caa te tii ne he ni *patén de Moosé pie: Go nemwo pacuwohi a paaci me e wii ni ace blé heme e ko penem me dem.Deutéronome 25.4
He e te ju omehi cehi ni paaci wo Padué? 10 +Ai e cihe beme denye? Be tii ani be me denye pie, me e penem wo pana e penem he pule, heme e céihi pie e o tii celi e cemi. Ke wo pana e tati blé, ke e céihi pie o pwo ace den mu kon.
11 +Gemu§ cemi he ni pwonimewé ni wâé te a *Jenen Iitihi*. Kona o te junihe ubwo hemepie gemu hegi aceli jan ne he ni mulihemu mu ko ni dewé ne éni pwo bwohemwo? 12 +Hemepie lé hegi wo lépwoce béén ne he ni bwomunen naa ne pelewé, kona he time uce wogemu na me gemu o hegi?
Gemu caa cuwokowé
Kehe time gemu uce hane, kehe gemu tai pé ne komu, beme time uce cubwoni a Pwooti Wâé te Kériso.
13 +Geé temehi ehi pie lépwona lé penem ha a *mwaiitihi, ke lé wii nina e âbé mu ha a mwaiitihi. Ke wo lépwo *apwoâpwailo, ke te pwo ni delé mu ko a bwo pwoâpwailo. 14 +Te piwien mwo, be wo Padaame, ke e pii pie me lé mulie mu ko a Pwooti Wâé wo lépwona lé patemehi a Pwooti Wâé.
15 Kehe woéo, ke time é uce hane ni bwomunen naa, ke time é uce tii ani, beme é hane ce dong. Be me o wâé ne kong heme é mele, kojan heme é patieden a watihe a pipwodéén dong. 16 +Be é hemepie é patemehi a Pwooti Wâé, ke te tice aceli me é pipii dong ne hen, be te tice ace céiu bwopwonen, be ana ne tong. O te junihe ta ne kong hemepie time é uce patemehi a Pwooti Wâé.
17 Be hemepie woéo pana é pipégali a penem naa, éa, ke me o pwo ace cuhin. Kehe te tice ace céiu bwopwonen celi me é pwo, ke é te ju pwo ana me é te pwo. 18 He ace cuhiéo, ke he ade? É he é patemehi a Pwooti Wâé he te tice cuhin, é patemehi a Pwooti Wâé, kehe time é uce pé mu kon ana jan me é pé.
É pipwoeabwé te ni apulie ati
19 Te tice pace pibééwé celi jan me e cuwokong me é pwo ace céiu naado. Kehe nimung me é tai pipwoeabwé tewé, beme é pébé ce apulie celi hiwon. 20 +Ke é ne pele lépwo Juif, ke é mulie pwohewii pa Juif, beme é pébé lépwo Juif. É ne ko lépwona lé mu he ni patén de Moosé, ke é ténedehi ni patén, beme é pébé lépwona lé mu he ni patén. Kehe time uce pwonaado ne kon me é ténedehi ni patén.
21 Ke é ne ko lépwona time lé uce temehi ni patén, ke é mulie pwohewiin heme te tice patén, beme é pébé lépwona time lé uce temehi ni patén. Kehe te etong a patén de Padué, be é ténedehi a patén de Kériso.
22 +Ke é ne ko lépwona mwo wahin jélé ne ha a céihi, ke é mulie pwohewiin heme mwo wahin jo, ne ha a céihi. É pineéo ati telé, beme é pébé lépwoce béén. 23 Ke é tai pwo ati ni naado naa, wonaa mu ko a Pwooti Wâé, beme é mu he ni wâé ten.
É te téte beme é piwéden
24 He time geé uce temehi pie wo lépwo apitéte ha a pitai, ke lé te tai téte, kehe te wo pa bécéiuhen pana e pé a cuhin? Geé téte, ne ha a bwomunen na me geé pé ace cuhin. 25 +Tai lépwo ajele, ke lé picaa, ke lé pwo he necu ni béé naado. Woélé, ke lé pwo beme lé pé a cuhin na o tieden.
Kehe wogenye, ke genye pwo beme nye pé a cuhin na e o tee mu. 26 É mu ko anaa, na é téte, kehe time é uce pitéte hauli. É pwohewii pa atahi mwoi, kehe time é uce tahi nge ha a puwo. 27 +É tacebwénihi a ééng, ke é â pihuô ne kon. Be mepie time uce wonaa, ke woéo pana é patemehi a Pwooti Wâé ne te lépwo béén, ke o jan me tieéo§.
+ 9:1 9.1 Apostolo 22.17−18, 26.16; 1 Korénit 15.8−9 + 9:2 9.2 2 Korénit 3.2−3 + 9:4 9.4 Luka 10.8 * 9:4 9.4,5 Gemu—Paulo me Barnabas. Omehi a niide a tii 6. 9:5 9.5 Pétéru—Grek: Céfas. + 9:9 9.9 Deutéronome 25.4; 1 Timoté 5.18 9:9 9.9 Penem me dem—Grek: Caaite ni pidenaado. + 9:10 9.10 2 Timoté 2.6 + 9:11 9.11 Roma 15.27 § 9:11 9.11 Gemu—ai Geme. * 9:11 9.11 Te a Jenen Iitihi—Spirituel. + 9:12 9.12 Apostolo 20.34; 2 Korénit 11.9 + 9:13 9.13 Deutéronome 18.1−3 + 9:14 9.14 Mataio 10.10; Luka 10.7; Galat 6.6 9:15 9.15 Dernière phrase—Grek: O te tice pace apulie celi e pétaabwon kojaéo a pipwodéén dong naa. + 9:16 9.16 Jérémie 20.9 + 9:20 9.20 Apostolo 21.20−26 + 9:22 9.22 2 Korénit 11.29 9:22 9.22 Pébé—Grek: Celuimi. + 9:25 9.25 Filipi 3.14; 2 Timoté 2.4−5, 4.7−8 + 9:27 9.27 Roma 8.13, 13.14 § 9:27 9.27 Tieéo—Grek: Neéo ko jijen (disqualifié). Paciitihi kon me e nemwo téte ha a pitéte.