3
Iésu me Nikodème
+Pwo pa apulie na a niin pie Nikodème, pace béé ni *Farasaio, ke pa apihuô te ni *Juif. Ke e âbé too Iésu he bwén, ke e pii ten pie: «Pa apipune, geme caa temehi pie wogo, ke pa apipune na e neko bé wo Padué. Te tice pace apulie celi e pwo ce inenaado celi pwojunuun pwohewiiko, heme time e uce mu pelen wo Padué.»
Wâé heme geé âbeele mwo
+Ke e hegi ne ten wo Iésu pie: «É pii tem a juuju pie: Te tice pace apulie celi e alihi a *Mwametau te Padué, heme time e uce âbeele mwo*
Ke e pii ten wo Nikodème pie: «He e o woté ko ace bwomunen me e âbeele mwo, heme caa ukéiu nang? Te jan me e mwojuia ne mwo tina nyaa ten, ke me e bo âbeele mwo?»
+Ke e hegi ne ten wo Iésu pie: «É pii tem a juuju pie: Te tice pace apulie celi e taa ha a Mwametau te Padué, heme time e uce âbeele mu ko a tabe me a *Jenen Iitihi. +Nina lé âbeele mu ko pa apulie, ke e te mu kolé a mulie pwo bwohemwo; ke nina lé âbeele mu ko a Jenen Iitihi, ke e te mu kolé a Jenen Iitihi. Go nemwo téetihi ana é pii tem: Wâé heme geé âbeele mwo.
«A dan, ke e cuu nge he na te nimen me e cuu ngelang, ke go téne a tihin. Kehe time go uce temehi he celi e âbé mulang, ke é he celi me e â lang. Wonaa ni apulie na lé âbeele mu ko a Jenen Iitihi.»
O pieti da pa Nahi Apulie
Ke e tahimwoeng wo Nikodème pie: «Woté ace bwopwonen?»
10 Ke e hegi ne ten wo Iésu pie: «Wogo pa apipune na lé nihe pipaunuko ne ha amu *Isaraéla, ke time go uce temehi ninaa? 11 É pii tem a juuju pie: Geme pii ni naado na geme te temehi. Geme uti ni naado na geme alihi. Ke time geé uce hegi nina geme uti. 12 Me é pii tewé ni naado na e pwo bwohemwo, ke time geé uce céihi ne ko nina é pii. Kona hemepie é bo cihe tewé ko ni naado na e he *miiden, ke geé bo woté ko ace bwo céihi ne kon? 13 Te tice pace apulie celi e taa he miiden, kehe te icehi pa Nahi Apulie na e opé mu he miiden.
14 +«Wo *Moosé, ke e eti da a bwien toki§ ko a ba-acuwo, ne ha a da. Ke wâé heme wonaa a bwo eti da pa Nahi Apulie*, 15 +be me wonaa, ke ni apulie na lé céihi ne kon, ke me etelé a mulie na tice anebwén kon.»
Te junihe eânime Padué tenye
16 +«Te nihe eânime Padué ko a bwohemwo, ke e ne pa Naîn na te ju céiu nang, be mepie lé céihi ne kon, ke me time lé uce mele, kehe o etelé a *mulie dieli mwo. 17 +Be time e uce neopé pa Naîn beme e tauti a bwohemwo, kehe me e *celuimi a bwohemwo. 18 +Pana e céihi ne kon, ke time uce tautieng, kehe pana time e uce céihi ne kon, ke caa tautieng, be time e céihi ne ko a nii pa *Naî Padué na te céiu nang.
19 +«A tautinaado naa, ke weengi: Caa tuie a pwéélang ne pwo bwohemwo, kehe nime ni apulie ko a melepiing koja a pwéélang. Be ni penem delé, ke ta. 20 Wo pa apulie na e pwo nina ta, ke muhi ten ko a pwéélang. Ke time e uce âbé ne ha a pwéélang, be koli genye bo alihi nina e pwo na ta. 21 Kehe wo pana e penem ha a juuju, ke e âbé ha a pwéélang, beme nye alihi ni penem den na e pwo mu ko Padué.»
E pii beeti Iésu wo Ioane
22 +É alecehe ni pwooti naa, ke lé tai â ha amu *Judé wo Iésu me ni acémun den. Ke e mu pelelé, ke e *puu apulie. 23 Wo Ioane mwo, ke e puu ni apulie ne Aïnon, cebwo Salim, be nihe ubwo a tabe lang. Ke lé âbé me puulé nelang. 24 É ha a benaamwon naa, ke mwo time uce ne Ioane he karépu.
25 Ke lé pipééle wo lépwo acémun de Ioane me pa Juif, mu ko a bwo puu ne ni éélé pwohewii a patén de ni Juif. 26 Ke lé â too Ioane, ke lé pii ten pie: «Pa apipune, e ko puu apulie wo pali e mu pipabéém ne ko a céiu goo a éémwa Ioridano, wo pali go mu pipajuujueng, ke caa hiwon nina lé âcéin.»
27 Ke e pii telé wo Ioane pie: «Pwocoon me e pwo ace céiu naado wo pa apulie, heme time uce ne ten mu he miiden. 28 +Geé caa te téne he é pii pie, time uce woéo pa *Mesia, kehe woéo pana neéo bé ânebuhen.
29 «Wo pana eten ê apiaten, ke pa apiaten. Ke wo pa béé pa apiaten, ke e mu pelen, ke e tabemieng, ke piwâénimen heme e téne a patin. Pwohewii ne kong, be piwâénimung. Ke é jenaa, ke hején a bwo piwâénimung. 30 Wâé heme piubwo nang da, ke me piwahin jo ole.»
Wo Pana e opé mu he miiden
31 +Wo pa apulie na e âbé mu he miiden, ke te nihe e daaité koja ni apulie ati. Ke pana e âbé mu pwo bwohemwo, ke te pa apulie pwo bwohemwo. Ke e te pwo a bwo cihe pwo bwohemwo. Kehe wo pana e âbé mu he miiden, ke te nihe e daaité koja ni apulie ati. 32 +Ke e te uti nina e alihi ke téne. Ke te tice paceli e hegi nina e uti. 33 Be wo pa apulie na e hegi nina e uti, ke e *pajuujuhi pie wo Padué, ke e pii a juuju. 34 Be wo pa apulie na e pahedeeng wo Padué, ke e pii ni pwooti te Padué. Be time e uce ne jahi a Jenen Iitihi wo Padué.
35 +Ke eânime Padué Caa te pa Naîn, ke e ne ten ni pihuô ne ko ni naado ati. 36 +Pana e céihi ne ko pa Naîn, ke eten a mulie na tice anebwén kon. Paceli time uce nimen me e céihi ne ko pa Naîn, ke time o uce eten a mulie na tice anebwén kon. Kehe o mu huîin a okéé te Padué.
+ 3:1 3.1 Ioane 7.50, 19.39 + 3:3 3.3 Mataio 18.3; 1 Pétéru 1.23 * 3:3 3.3 Âbeele mwo—ai Pituie mu ko Padué na e jeda. + 3:5 3.5 Ézékiel 36.25−27 + 3:6 3.6 Ioane 1.13 3:11 3.11 Geme—Wieli wo Ioane, na e pé a pwooti te Iésu, beme a pwooti te ati ni acéihi. 3:13 3.13 Pa Nahi Apulie—Pa Nahi Apulie na e jeda he miiden ne he ni béé tii iitihi he pwo grek. + 3:14 3.14 Nombres 21.9; Ioane 8.28, 12.32 § 3:14 3.14 E eti da a bwien toki—E pwo anaa wo Moosé beme celuimi a mulihe ni apulie na lé wiilé ne ni bwien. Omehi Nombres 21.9. * 3:14 3.14―3.21 Wieli a pwooti te Iésu, ai wieli a pwooti te Ioane. + 3:15 3.15 Ioane 20.31 + 3:16 3.16 Ioane 3.36, 10.28; Roma 5.8, 8.32; 1 Ioane 4.9−10 + 3:17 3.17 Luka 19.10 + 3:18 3.18 Ioane 5.24 + 3:19 3.19 Ioane 1.5,9, 8.12 + 3:22 3.22 Ioane 4.1−2 + 3:28 3.28 Mataio 11.10; Ioane 1.20 + 3:31 3.31 Ioane 8.23 3:31 3.31―3.36 Wieli a pwooti te Ioane pa apipuu apulip, ai wieli wo Iésu, ai wo Ioane, pana e tii a tii ce. + 3:32 3.32 Ioane 3.11 + 3:35 3.35 Mataio 11.27; Ioane 5.20 + 3:36 3.36 Ioane 3.16−18; 1 Ioane 5.12