23
Ashiri na kamanchintspa yuwaa Apanll Móysisee shaniyshisheem kamachtarangu anootsi
1 Apanll Taarashipani Móysisee tárangiya;
2 Na siyaa kamachtachintspa yuw zar wanasirimish shaniyshisheem ipuschis anootsi. Siysa washunand ungirtamaam nuwaam shaniykus, anoo zar ísamangtsa; Apanlleem shaniyshini átus. Shiysha, Móysisee, nuwaa kuki Israelchichee tputsi ichinguru kamaningcha, Apanll tárangiya.
3 Anumunsha, Apanll tárangiya; Siy minam matayaru zari tarawaztangtsa. Itaru, tsimbun mataykachu zar sabadush siy pakchiyam maacheetsi tarawaztarintspa. Sabadush zari kizpur wanasirimish kanussish taachiya. Anush zar shaniykus, nuwaa Apanlleetsi ungirtangtsa. Yapamasaja taarus zar tatsamkachiya, anush kanusangtsa. Nuwaa ungirtangtsa, tárangiya Apanlli.
4 Mishat, Apanll Móysisee tárangiya. Zari siyaam kizpur wanasiri taarcha. Anush zar siy ichingurus nuwaa Apanlleetsi Taarashipaneetsi ungirtamaam washunand shaniyangtsa.
5 Masach kaneesich yakachu, tsupsha minumtarini yakchu, zarsha 14 tapitaranllu, anush shaniyangtsa. Nuw siyaa sirútama Ijiptosh watsapun tashitungarangi anoo chinamaam shingtsa.
6 Putamsha zar kinsish pangaa nda tputtaru anoo katungamaam chtangtsa. Zar sietimari katungkus kchingantsa. Nuw siyaa Ijiptosh tsap tashitungarangi anoo nda mbizamaama, átana.
7 Zar minumtarini washunand shaniyrus, nuwaatsimari ungirtangandama. Anush zar tarawaztarintspa.
8 Anumunsha, 7 zar maaramchus, siysa wakaraa, opeejaa, karupanaatstam pachayarus, nuwaam muchingtsa. Zar sietirini, yuwash kachingkachu anushsha shaniyeerus, nuwaa ungirtangtsa. Anush zar tputsirish pakchiyam tarawaztarusinapa. Ashiri shiysha tputsireetsish kamaningcha, Apanll Móysisee tárangiya.
Ashiri na kamaneena yuwaa Apanll Israelchichee tapachindayanlli, anoom mbizarintspa átu, urutamari nee 7 zar shambatshisheem wayangtsa, tárangu anootsi.
Ashiri na kamanchintspa yuwaa Apanll; Tatsumareetsis tiriku chtaru kayanakchu, anoo nuwaam shambatamaam yushindangtsa, tárangu anootsi
9 Apanll Taarashipan tárangiya Móysiseetsi;
10 Shiy Israelchichee kamaningcha; Nuw Kanaanaa tsap siyaam panachintspa, tárangina. Ashiriya, anush tsap taakchus, tatsumareetsis pusayarus, yuw ichtakachuri pusakchis anoo kamuriyarus nuwap pangi yushindangtsa. Sheerus, apanllpaneem urkari panangcha.
11 Kanussish zar tushiyramchu, putam apanllpansha urkar kamurimaa uwish yáyaru, íwar itsireeru, nuwaa Apanlleetsi, Wapparee, táchiya, Anoo pakchuri, nuwsha mangi kis siyaa napchintsa, átana; tárangiya Apanlli.
12 Ashiri anshurtatam zar minamtam opeeja karupan yuw minumari masach taaru, wánguyar ndunari anoo yushindangtsa. Sheerus, pachayarus, muchingtsa. Ashkachus, nuwsha siyaa kis napchima.
13 Mishat, wasipur tirik ipunpunar kilo anumun chawpi kizpur wanasiri wayungunpa ísima yushindangtamtsa, Ashiri apanllpansha urkar nuwash sumi anoo muchchiya. Anoo muchkachu, nuwaam kizpur kzama. Anumunsha vinu minam litoru yushindachtampa. Aship an apanllpan urkar vinoo yáyaru, nuwanung sumi tuchumuchpa, tárangiya Apanlli.
14 Ndatuma tirikoo wanus kaneeschee pusamaa nuwash pangi yushindachus, anoo ktungintspa. Pangaam tiriku wanus kaneesichpa tinamaa anoo ktungintspa. K'pichimaatstam ktungintspa. An watacha nuw kamachtamari urutamari payumaama. Ipareetstamtis tayaspatangtsa. Ipareetsis yap taakachis amb piy shingints, tángcha, Apanlli Móysisee tárangiya. Ashiri Móysissha anoo Apanllee kuk ichinguru Israelchichee tputsi kamanirangiya.
Ashiri na kamaneena yuwaa Apanll; Tatsumaris tirik kayanakchu, ichtaru pusayarus, nuwaam wayangtsa shambatshisheema, tárangu anootsi.
Ashiri na kamanchintspa yuwaa 50 maatsi tushiyramchu, shambatshishee wayarangana anootsi
15 Apanll yusur minootssha kamachtaku tárangitamta; Zar yuwash tirikoo wayakis anoo zaree táchingtsa. Napa: kanussish zaree nuwaam tirikoo wayachus, an zar tushiyaru, putaam 7 simanaa táchingtsa.
16 Anumand zar putaamsha 50 zar izuuru tushiychiya. Anshurisha zar nuwaam tirikureetsis yuw kaneesich pusarangis anoo wayangandama.
17 Ashiri siysa tirikoo wasipur uchu kilo kizpur wanasiri yáyarus, tsimbun pangaa tputamamshipat wanasiriri ptatangtsa. Sheerus, pangaa museerus, nuwash pangi yushindangtsa. An pang nuwaama tuchtamaama.
18 Pangaa 2, misha opeejaa upapchir 7 wip washunand aship yushindangtsa. Opeej yuw minam masach taaru anu wanasiri nda wanguyaa yushindangtsa. Minam wakar wip upapchiri, anumunsha tsimbun upapchir wachin opeej, muchimaam tatsamooru nuwash pangi yushindangtamtsa. Anoo tirikpa, vinuptatam washunand nuwaam yushindayarus wayangtsa. Anoo nuwaam muchingtsa. Ashkachus, nuwaam kizpur wanasir kzam pchazachiya. Nuwsha mangi ksachina, tárangiya Apanlli.
19 Mishat, minam chipoo nuwaam muchingtamtsa. Anumun nuw siyaa mangis yarchima. Mishat, tsimbun wip upapchir opeejaris, yuw minam masach taaru anu, muchingtamtsa. Anumun nuw siyaa mangeetsis yarkachuri, tatsuyachshaparina.
20 Ashiri apanllpansha pangapa yuw ichtari kayanayaru tirikoo pusarangis anpatari yáyaru, íwar itsireeru, nuwaam ungirtachiya. Anumunsha tsimbunuri opeejaa putayaru, pangapa, tirikpa washunand nuwaam muchchiya. Ashkachu, nuwsha siyaa mapiychtina. Anoo iwatspayaru, apanllpansha wipapat ichingurusin anoo katungchinllinaya.
21 Ashiri anuritam zar siy washunand shaniyeerus, nuwaa ungirtangandama. Mishat, anush zar minamtiyam tputs tarawaztarusinapa. An watacha Apanll uru payumaam kamachtarangu anu, tputsee tángcha. Ashiri siysa ipareetsis anoo tayaspatangtsa. Siy yapamasaja taakamchus anshutam, uru ipareetsis tayaspatakus taangtsa, átcha Apanlli, tángcha.
22 Mishat, Apanllsha siyaa atiya; Ashiri siy tirikureetsis, nduntaati ashiru sebaadaa, pusamaam iwapayarus, yusur mzarpish kanapeerush, yuwaa chapunguw kasarangish anoo yarintspa. Pukireem tputsi izuuru ksangcha, misha yuw arapich tputs mazar nduneew taakana anooma. Nuw Apanlli siyaa atina, átcha Apanlli, tángcha, Apanll Móysisee tárangiya.
Ashiriya, na kamaneena yuwaa sincuentash zari shambatshishirini taakchu anootsi.
Ashiriya, na kamanchintspa yuwaa wakaraa wits tiruchimaam shambatshisheem wayarangana anootsi
23 Mishat, Apanll Taarashipani Móysisee tárangiya.
24 Ashchiri shiysha Israelchichee kamaningcha; Tsup kaneesich yakchu, sietish tsupi anush zar kanusangints. Wakarash wits puu puu táyarus, washunand shaniyrus, nuwaa ungirtangtsa.
25 Nuwaa chinamaam minam wakaraa muchingtsa. Nuwaa wapparee tángandama. Anush zar tarawztarintspa, átcha Apanll siyaatsi, tángcha, Apanll tárangiya Móysiseetsi.
Ashiri na kamaneena yuwaa shambatshishee wakaraa wits puu puu támaam wayarangana anootsi.
Ashiri na kamanchima yuwash zar Apanll tputsee yutaritshishirini tachingchima, tárangu anootsi
26 Apanll Móysisee tárangiya,
27 Zar chung maaramchu, anshurtatam tsup, ningach tsimbun matayaru tsup, nuw siyaa yutaritshishireetsis tachingchima. Siysa anush zar minamtiyam katungintspa. Ichingurus, washunand shaniyrus, chineetsis muchingtsa nuwaama.
28 Minamtiyam tputs tarawaztarusinapa. Nuw siyaa yutaritshishirineetsis tachingpi tina. Apanllpansha urkar nuwaa tasaseeru, siyamand yutaritshishiris mashchiya.
29 Anush zar tputs katungtapa. Tputs katungachu, siysa anoo tputsee izuuru tashitungangtsa. Yuwash taakis anush yaktarshis zapshitaati an tputs kanapuru taatpa. Izuuru mapiyngtsa, átana.
30 Mishat, tputs anush zar pakchitaa tarawaztakchu, nuwsha waneeyaruri, arap kapeetchima. Ndunshaparee anoo tputs patssa.
31 Ashirucha, nuw siyaa atashina, Minamtiyam tputs tarawaztarusinapa. An watacha nuw kamachtamari yuw uwamari kasiyru anu. An tsiyatsis urutamari taachiya. Siysa ipareewaatstamtis tayaspatangtsa yapamasaja taakamchis anshutamta.
32 An watacha siyaam minam zar kanusissheem, misha anshutam mangungtamtsa; katungintspa. Katungamaam kasayarus, zar tapitaramchu, psaan mangumaam chtayarus, tarasiyarus, wazuran zar tapiyarus, yusur misha tapitaramchu, anush zar ksangtsa. Sheerus, katungamaam waritariya, Apanlli Móysisee tárangiya.
Ashiri na kamaneena yuwaa Apanll tputsee yutaritshishirini yarchima tárangu anootsi.
Ashiri na kamanchintspa yuwaa Israelchich masharpa tambtayarusin shambatshisheem wayarangana anootsi
33 Apanll Móysisee tárangiya;
34 Israelchichee kamaningcha, Zar yutaritshishee yaramaam tushiyaru, anshurtatam tsup, zar kinsish yusur shaniyangints. Masharpa tambtayarus, tsimbun matayaru zar shaniyeerus, nuwaa Apanlleetsi chinamaam ungirtangtsa.
35 Yuwash zar shaniymaam tatsamkachu, shaniyeerus, nuwaatsimari ungirtangtsa. Anush zar tputs maacheetsi pakchiyam tarawaztarusinapa.
36 Tsimbun matayaru zari nuwaam Apanlleemi wakaraa, misha opeeja karupana ichinguru zar muchta, muchta, shingtsa. Tuchip arangtach matayaru zar iwatspakchus, ichingurus washunand shaniyeerus, mangis kis shambatangtsa. Chinuzee muchkachus, nuwaam Apanlleemi muchingtsa. Anush zar tputs tarawaztarusinapa, tárangiya Apanlli.
37 Na shaniyshi 7 kachingamaam Apanll wayarangu anoo kamanchintspa. An zar watacha zurampatari nuw Apanlli siyaa tárangi anu. Zar tatsamkachu, siysa uru shaniyangtsa nuwapa ipunamaama. Yuwari nuw siyaa kamachtarangi anuri nuwaam chinuzee pachamaam uru yushindangtsa. Mishat, apanllpan katungamaam tirikoo, sebaadaa, wanusee, vinoo nuwash pangi yushindangtsa, tárangiya Apanlli.
38 Mishat, zar tatsamkachu anush zaree kanusamaam wayangtsa. Kanussish zar tatsamkachu, nuwash pangi maachi yushindangtsa yuw nuw siyaa yushindangtsa tárangi anuritamta. Mishat, tputs aranginasha yushindamaam zandku, waani wanusee yushindachiya, Apanll tárangiya Móysiseetsi.
39 Mishat, Apanll Móysiseetsi tárangitamta. Tirikureetsis kaneesich kayan pusaramchus, tsup nuevish, zar kinsish, anush zar tatsamkachu, tambtayarus, 7 zar nuwaam shambatangtsa. Anushsha mangis kis nuwaa ungirtatssa. Zar shambatshisheem chtakchus, pakchiyam tarawaztarintspa. Zar shambatshishi itupshingaramchus, anshutam tarawaztarintstampa.
40 Zar ichtaru yakchu anush ichinguru tputs wanusee kizpur wanasiri yachinllinpa. Yarinpat tambtangtsa. Mashar tuwapimashpat wanasiritam tambtamaama. Tambtayarus, tsimbun zar matayaru tamburishis tángtsa. Mishat, kis shaniykus, nuwaa Apanlleetsi ungirtangtsa, tárangiya Apanlli.
41 Ichinguru masach tsup sietish ichingurus siy nuwaa Apanlleetsi wanasirimshiri shambatangtsa tsimbun matayaru zari. Yuwaa nuw zaree wayarangi anoo siysa ipareetsis kamaningtsa urutamari payumaama.
42 Ashiri siy Israelchichis nllurtarangis anis, siyaa nuw atashina; Masharpa tambtayarus, zar 7 ichingurus anshuri taangtsa.
43 Siyachich nlluranur zapshitaa anoo chinachinllinpa yuwaa nuw Ijiptosh tsap siyaa tashitungarangi anoo nda mbizamaama. Anpur siy tambtayarus, taar ashirangis anootsi. Ashirucha, anoo mbiztapa aturi, na nuw Apanlli masharpa taamaam kamachtarangina, tárangiya Apanlli Móysiseetsi.
44 Ashiri Móysissha anoo ichinguru Israelchichee tputs kamanirangiya Apanllee kuku. Yuwaa waana Apanll Taarashipan zaree kanusissheem wayarangu anootsi, yuwash tsimbun matayaru shambatshish tatsamkachu anshu.
Ashiriya, na kamaneena yuwaa Apanll shambatshisheem ichinguru wayangtsa tárangu anootsi.
[Ashiriya, nuw Móysisi: wapparee, atina siyaatsi. Na kamaneena yuwaa Apanll kamachtarangu anootsi.]