Israelchich tputs masatarangana
Yuwaa Israelchich apusash masaru taarangana anoo pakich kamanchintspa
¿Chakaja anoo yandarang?
Móysisarini anoo kiraka yandarangiya. Apanll wirkar Israelchich apusash masaru taarangana anoo kamankiya, Israelchich tputs sirútama táranganaya. Itaru, natsha ashpatam tputs, ¿Nitaati Móysisarineeja yandarang? atanaya. Tputs zapancha washunand yandarangana, átssincha. Atitaateesinaya, in zuramari Apanlliritcha kuku.
¿Chakaama yandarang?
Móysisarini Israelchicheem yandarangiya. Apanll Israelchichee tputs, Nuw kizpur ksutkina átu anoo yasamaam, misha Apanll: Nuw Móysisaa kurakaam ínarangina átu anootstam yasamaam, misha Israelchich tputs nuwaa ngatkusin, nuwsha kizpur wanichima, átu anootstam yasamaam Móysisarinee kamachtayaru yandarangiya.
¿Mayaamaja yandarang?
Israelchich tputs machee Sinaya kasayarusin, Kanaanap tsap naamani atitaatssin, itaru Apanlleetsi kuk kapung ngatarangsin, Apanllsha apusap masaru taamaam zanganirangiya.
Anush apusap masaru taarangsin, mang' kapung mantsarangusin, Ijiptongaz tsap zandaranganaya. Apanll, Kanaanap tsap machintspa; anush kis taatssa, tárangitaa, tputssha, Watsta, anush pshtumaam zandkeezini, táranganaya. Ashirucha, Apanllsha, Siy pshtucheezis, ndambari. Nishuri 40 masach masarus taatssa, tárangiya. Yutarit taarangitaatssin, ashiritaa Apanll uru ksutarangiya. Apanll, Nuw siyaa kizpur chinakina; nuw siyaa wanasir istapi atina, tárangiya. Tputsee yutaritshishirineetsini tachingarangitaa, ashiritaa tputssha Apanllimun mang' nda taturanganaya.
Apanll Israelchichpata tasaseeru tsiyatamaam xapoorangu, Móysiseetsimsha wamkur tamapari ashiru tasaseeru tsiyatarangiya. Móysis nda sambaytarangiya. Uru Israelchichee tputsi naparangiya. Mishat, uru Apanllee masharangiya Israelchicheema. Mishat, wanasir taamaam yámandarangiya.
¿Mayaatseeja kamanik?
Masaru taarangana 1.1—10.10: Israelchich tputs machish Sinayash taarangusin, Móysisarini tputsee suroo ichinguru tuyandarangiya. Anshutam shambatshisheem itupshirangana. Anumunsha, maachee yareersin, yusur arangeem naataranganaya.
Masaru taarangana 10.11—21.20: Sheersin, yusur Kanaanap tsap naataranganaya. Apanllsha, Pshtungtsa, atitaa, tputs kapunguri ngataranganaya. Anumand Apanll tputsee waneerangu, apusash masaru 40 masach taaranganaya.
Masaru taarangana 21.21—36.13: Apusari taarusin, wachinanand yuw ngatarangana an ichingarusin tsiparangana. Tsipayarusin, nlluranurshitisin Ortagamun wing zar yaku amb tsap wamari kasirsin, taaranganaya. Itaru, Mowabshuch tputs urkar kapung punirangu, Balamaa tputs suru Israelchichee tputs tayutaritamaam kamachtarangiya. Balamsha, Tayutariteeyi atitaa, kapung yacharangitaa, ashiritaa Apanll tuxararangiya. Anumunsha, Móysisarin Josueyaa ipusarangu, kurakaam ínarangiya.
Israelchich apusash masaru taarangana anoo kamankiya
6
Ashiriya, na kamanchintspa yuwaa apanllpanee urkar Apanll kapung chinarangu anootsi
22 Ashiriya, Apanll Móysisaa kamachtarangiya.
23 Kamachtaku: Shiyshat Móysisaa, Aaronaa wipaptar ashpari kamaningcha; Israelchicheem tputsee nuwaam mashkus, wanasiriri tsiyatangtsa.
24 Apanll siyaa kapung chinaku, wizpurireemani panaku, ksutkiya.
25 Apanll siyaa ksapa napkiya.
Mishat, waanaatsi wanasirimshirini siyaam tuyamandaktamta.
26 Apanll siyaa chinampatari napku, tapachindakiya.
Siyaam mapiymash panachiya.
tángtsa, tárangiya.
27 Amb nuwamun suri Israelchicheem tsiyatkusin, ántangat ashchinllinpa. Amb tákchusin, nuwsha anshucheem tputs kapung istachima, tárangiya.
Ashiriya, na kamaneena yuwaa Apanll Móysisash tsiyatssee kamachtarangu anootsi.