2
ឞូនុយ្សតាៈឞើសឞ្រីងាយហាន់យើកមឞាសឞ្រាសយេឆូ
1 ឞ្រាសយេឆូ ទែសតាប៝នបេតលេហឹម ឞ្រីយូដា នោកកាដាច់ហេរោត ម៝ត់អ្វាញ់ឞ្រីទាកអីនៃ។ ជេសពាង់ទែសរី គែសឞូនុយ្សគឹតឞ្លាវគឹតនាល់អ្វាញ់មាញ់មឞីងហាន់តាៈឞើសឞ្រីងាយមពែសមាលោសនារត៝ត់តាប៝នក្វ៝ង់យេរូឆាលឹម រី។
2 ខាន់ពាង់អោបឞូតារី៖ “អាសនតុកទែសកាដាច់មហែផូងអីឆ្រាអែល ហ្យាស? ហេនលែៈគឹតពាង់ទែស យ៝រមាហេនឆៃទូមល៝ម់មាញ់ច្រាតងាន់លោសមពែសឞើសឞ្រីហេនជេងនទើមឞេនមានាវអីនៃ។ នទ្រីទឹងហេនហាន់យើកមឞាសមាពាង់ដ៝ង់”។
3 ត៝ត់កាដាច់ហេរោត តាង់លឺនាវអោបអីនៃ ពាង់រាវៃហោងាន់គុមោដាប់ចាប់មោគ៝ន់រ៝ ក្លាចគែសឞូនុយ្សអេងជានកាដាច់។ លែៈប៝នលានតាយេរូឆាលឹម រី ខាន់ពាង់រាវៃទាទេមើមកាដាច់ហេរោត ជាន។
4 ជេសរីពាង់រាគូមមពោលកោរាញជានឞ្រាស នទ្រែលមាផូងនើមនតីនាវវៃផូងអីឆ្រាអែល គៃមាអោបនតុកប៝នទែសឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់។
5 ជេសរីផូងអីនៃមឞើសមាកាដាច់៖ “នតុកឞ្រាសក្រីស ទែសតាប៝នបេតលេហឹម ឞ្រីយូដា យ៝រលាសឞូនុយ្សនតើយ្សនាវងើយកោរាញឞ្រាសកាល់អែនើសញចីស៖
6 «កោរាញឞ្រាសលាស៖
«ហើយប៝នលានប៝នបេតលេហឹម តាឞ្រីយូដា អើយ!
ប៝នខាន់អៃមៃមោអោសទីជេៈតាន៝ម់ឞូដាសប៝នឞ្រីយូដា អ្យាអីគែសនាវខ្លៃ
យ៝រលាសជឹតនាប់តៃគែសទូហ្វេកោរាញលោសតាៈឞើសប៝នខាន់អៃមៃ
ពាង់អីនៃម៝ត់អ្វាញ់ប៝នលានអីឆ្រាអែល អីប៝នលានគ៝ប់នើម តឹមឞានមាទូហ្វេនើមច្យាប់ឞែឞ្យាប់»»”។
7 ជេសរីកាដាច់ហេរោត ក្វាល់នតុងមពោលគឹតឞ្លាវអីនៃ អោបជែកអេងខាន់ពាង់ទាសហ៝ៈជ៝ៈឆៃមាញ់អីរី គៃមាគឹតក៝នឞេអីរីទាសហ៝ៈអ៝ក់ខៃ។
8 ជេសរីដាៈមពោលអីនៃហាន់ជឹតប៝នបេតលេហឹម រី ពាង់លាសមាខាន់ពាង់៖ “ខាន់មៃហាន់ទោស អោបនហេលមាក៝នឆែជេៈអីនៃ។ ជេសឆៃពាង់តៃ ព្លឹមឞើសមាគ៝ប់យឹ។ គ៝ប់អុចហាន់យើកមឞាសមាក៝នឆែជេៈអីនៃដ៝ង់”។ តីសមាកាដាច់ហេរោត មោអោសងើយងាន់ ពាង់គៃមាអុចងខឹតក៝នឆែអីនៃទើម។
9 ជេសអ្យាត់នាវកាដាច់មឞើសនៃ ខាន់ពាង់លោសឞើសប៝នយេរូឆាលឹម រី។ ល៝ង់មាញ់អីខាន់ពាង់ឆៃមពែសឞើសលោសនាររីនើសលែវត្រ៝ងមាខាន់ពាង់នហ៝មាត៝ត់តឹមឆ៝ង់កាលើនតុកអ៝សឞេគុរីមើញឆ្រុង។
10 ខាន់ពាង់រាម់មអាកលែៈឞើសនូយ្សឞើសនហ៝ម់ងាន់ឆៃមាញ់លែៈគុតានៃ។
11 ជេសរីខាន់ពាង់លាប់តាត្រោមជៃនតុកអ៝សឞេគុរី ឆៃអ៝សឞេនទ្រែលមេៈពាង់។ ខាន់ពាង់ពាន់មឞាសមាអ៝សឞេអីនៃ ជេសរីឆ៝ៈនទើខ្លៃឞើសត្រោមហុបខាន់ពាង់នើមរី៖ មាយ្ស នតាក់ឆីបោកាសមាឆូ នទ្រែលមានតាក់ឆីបោកាសមឹរ ញហើរអ៝ន់មាអ៝សឞេអីនៃ។
12 ជេសរីខាន់ពាង់ឆឹតជឹតឞ្រីទាកខាន់ពាង់នើមរី ឆឹតជឹតត្រ៝ងអេង យ៝រលាសកោរាញឞ្រាសមឞើសមាខាន់ពាង់តឹមនាវមឞើយ មោអោសអ៝ន់ខាន់ពាង់ព្លឹមឞើសមាកាដាច់ហេរោត ។
រានាក់វ៝ល់ឞ្រាសយេឆូ ទូគុតាឞ្រីអេឆីប
13 នទុតឆឹតខាន់ពាង់អារី គែសតោងពារ់តាៈឞើសកោរាញឞ្រាសញហើឆាក់មាយោឆែប តានាវមឞើយ ពាង់លាស៖ “ហើយយោឆែប ទ៝ក់ហ៝ម់លែវក៝នឞេអីនៃ នទ្រែលមាអីមេៈពាង់ញច្វាត់ទូគុតាឞ្រីអេឆីប រី។ មៃគុតាឞ្រីនៃក៝ប់ត៝ត់គ៝ប់ក្វាល់ប៝ត់ទឹងមៃព្លឹឆឹត យ៝រលាសកាដាច់ហេរោត អុចតឹងងខឹតក៝នឞេអីនៃ”។
14 ជេសរីយោឆែប កាសរាងាល់ឞិច លែវអូរលែវក៝នពាង់ញច្វាត់ទូជឹតឞ្រីអេឆីប ទឹងមាង់រ៝។
15 ខាន់ពាង់គុតាឞ្រីអីនៃត៝ត់ខឹតកាដាច់ហេរោត នទ្រីនាវអ្យាជេងទីដាសនាវកោរាញឞ្រាសដាៈឞូនុយ្សនតើយ្សនាវងើយពាង់កាល់អែនើសញចីស៖ «កោរាញឞ្រាសលាស៖ «គ៝ប់ក្វាល់ក៝នគ៝ប់លោសតាៈឞើសឞ្រីអេឆីប នៃ»»។
កាដាច់ហេរោត ដាៈងខឹតទឹងលែៈក៝នឆែឞូក្លោ
16 ត៝ត់មាកាដាច់ហេរោត លែៈគឹតជេសមពោលគឹតឞ្លាវគឹតនាល់អ្វាញ់មាញ់មឞីងអីនៃរាលាម់ពាង់ មោអុចព្លឹមឞើស ពាង់ជីនូយ្សហោងាន់ មឹនលាសក៝នឞេហោមតាប៝នបេតលេហឹម ជេសរីដាៈឞូហាន់ងខឹតលើយក៝នឞូក្លោតាប៝នបេតលេហឹម នទ្រែលមាប៝នអីតឹមទាច់ដាសប៝នបេតលេហឹម រីដ៝ង់ ងខឹតក៝នឆែអីនតើមឞើសឞារនាម់ជុរជឹតទ៝ង់អ៝ន់លែៈ។ កាដាច់ហេរោត កើបនាម់ក៝នឆែពាង់ដាៈងខឹតអីនៃ ពាង់កើបនតើមឞើសមពោលអីគឹតឞ្លាវអីនៃឆៃមាញ់នើសរ៝។
17 ប៝នបេតលេហឹម នទ្រែលមាប៝នរាមា តានតុកគែសរាន៝យទែសរាចែល អីអូរយាកោប គុកាល់អែនើស។ នទ្រីនាវអ្យាជេងទីងាន់មាឞូនុយ្សនតើយ្សនាវងើយកោរាញឞ្រាសកាល់អែនើស រាញាពាង់យេរេមី ពាង់ញចីស៖
18 «គែសនាវលឺងគារ់តាប៝នរាមា នតុកឞូអូរមែអីរាន៝យទែសរាចែល អីនៃ។
ជេងនាវញហ្យាង់ញុមក្រីតរាង៝តហោងាន់
ញុមវើលយោៈនអាចមាក៝នពាង់។
ពាង់មោអុចអោសឞូឞ៝ញ យ៝រលាសក៝នពាង់លែៈខឹតជេស»។
រានាក់វ៝ល់ឞ្រាសយេឆូ ព្លឹឆឹតឞើសឞ្រីអេឆីប
19 ត៝ត់កាដាច់ហេរោត លែៈខឹតជេស តោងពារ់តាៈឞើសកោរាញឞ្រាសញហើឆាក់មាយោឆែប តាឞ្រីអេឆីប រី តានាវមឞើយ ពាង់លាស៖
20 “ហើយយោឆែប ! លែវក៝នឞេអីនៃ នទ្រែលមាអីមេៈពាង់ព្លឹឆឹតតាឞ្រីអីឆ្រាអែល ហ៝ម់ យ៝រលាសឞូនុយ្សអីអុចងខឹតក៝នឞេអីនៃនើសលែៈខឹតលែៈផ្យៅជេស”។
21 ជេសរីយោឆែប លែវក៝នឞេអីនៃ នទ្រែលមាអីមេៈពាង់ព្លឹឆឹតតាឞ្រីអីឆ្រាអែល រ៝។
22 តីសមាយោឆែប មោអោសឞាញ់គុតានតុកឞ្រីយូដា យ៝រមាពាង់លឺកោរាញអារកេលោស អីក៝នកាដាច់ហេរោត ពាង់នត្រ៝ៈអីឞឹម៝ត់អ្វាញ់តាឞ្រីយូដា រី នហ៝មាកោរាញឞ្រាសមឞើសមាពាង់តឹងនាវមឞើយជឹត មោអ្វែសអោសលាសគុតាឞ្រីយូដា ។ នទ្រីទឹងពាង់ហាន់ជឹតឞ្រីកាលីលេ រី។
23 ត៝ត់តាឞ្រីកាលីលេ រីពាង់គុតាទូប៝ន ប៝នអីនៃរាញានាឆារែត ។ នទ្រីតឹមទីដាសនាវឞូនុយ្សនតើយ្សនាវងើយកោរាញឞ្រាសកាល់អែនើសញចីសមាឞ្រាសក្រីស ៖ «ឞូមរាក្វាល់ពាង់ឞូនុយ្សប៝ននាឆារែត »។