8
Romio cu'ache pa'iko cho'osi'ere kʉamʉ
1 Jesuta'ni Olivo aikũtina mʉisi'kʉa'mʉ.
2 Jo'e apeñatatona caje Dios vʉ'ena kakasi'kʉa'mʉ repaʉ. Kakaʉna pãipi repaʉni jainʉko chi'irena pʉʉ ñu'iʉ che'chosi'kʉa'mʉ repaʉ repanare.
3 Ũcuarʉmʉ judíopãi che'chona fariseopãina'me romio'te ʉ̃jʉma'kʉre kãisi'koni chẽa rasinaa'me. Ra repao'te pãi chenevʉna nʉko
4 Jesuni i'kasinaa'me repana.
—Masiʉ, ikore chekʉna'me kãiona ñaasome pãi.
5 Diopi chʉ̃'ʉkʉna Moisés tocha jo'kasiphʉro ija'che kʉamʉ:
Romio'te ʉmʉ pa'ikoji chekʉna'me kãito catapi su'a vẽasõjʉ̃'ʉ,
chiimʉ. Mʉ'ʉjẽ'e, ¿je'se chiikʉ? —chiisinaa'me repana.
6 Repaʉji tĩiñere i'kaʉna chẽañu chini jã'aja'ñe i'kasinaa'me repana repaʉ'te. Repana i'kache sãiñe i'kama'ñe pʉʉ ñu'iʉ mʉoñoji chejana tochakʉ pa'isi'kʉa'mʉ repaʉ Jesús.
7 Repanapi cuharepama'ñe sẽejʉna vʉni nʉkakʉ i'kasi'kʉa'mʉ repaʉ.
—Mʉsanʉkonapi te'eʉ cu'achejẽ'e peokʉ pani catapʉ mini charo su'ajʉ̃'ʉ ikore —chiisi'kʉa'mʉ repaʉ.
8 Chini jo'e pʉʉ ñu'iʉ chejana tochasi'kʉa'mʉ repaʉ.
9 Repaʉji jã'aja'ñe i'kaʉna asa ũcuanʉko te'enachi'a sanisõsinaa'me repana. Ainapi charo saisinaa'me. Sanisõrena repaʉ Jesús repaona'me te'eka'chapana canʉkasinaa'me.
10 Ũcuarʉmʉ Jesús vʉni i'kasi'kʉa'mʉ repao'te.
—Mʉ'ʉre i'kasina, ¿keechejare pa'iche? ¿Te'eʉjẽ'e, “Mʉ'ʉ cu'ache cho'osi'e ro'ijʉ̃'ʉ”, chiimanere repana mʉ'ʉre? —chiisi'kʉa'mʉ repaʉ.
11 Chikʉna repao i'kasi'koa'mo.
—Te'eʉjẽ'e jã'aja'ñe i'kamanesinaa'me chʉ'ʉre —chiisi'koa'mo.
Chikona i'kasi'kʉa'mʉ repaʉ.
—Chʉ'ʉ ũcuaja'che, “Mʉ'ʉ cu'ache cho'osi'e ro'ijʉ̃'ʉ”, chiima'mʉ mʉ'ʉre. Chura sani mʉ'ʉ cu'ache cho'oche ũhasõ jo'e cho'omanejʉ̃'ʉ —chiisi'kʉa'mʉ Jesús repao'te.
Pãire Miañeja'ñe Pa'ikʉ'mʉ Jesús
12 Ũcuarʉmʉ Jesús jo'e i'kasi'kʉa'mʉ repanare Dios vʉ'e pa'inare.
—Pãi chʉ'ʉre cuasajʉ jovosina chʉ'ʉpi pa'iche re'oja'chere ĩsiʉna cu'ache pa'ima'ñe miacheja pa'inaja'ñe repana rekoñoã re'oja'che pa'ijanaa'me —chiisi'kʉa'mʉ repaʉ.
13 Chikʉna fariseopãi i'kasinaa'me repaʉ'te.
—Mʉ'ʉ pa'iche'te meñe kʉakʉ joremʉ mʉ'ʉ —chiisinaa'me repana.
14 Chitena i'kasi'kʉa'mʉ repaʉ.
—Chʉ'ʉ raisichejajẽ'e vesʉjʉ chʉ'ʉ saijachejajẽ'e vesʉme mʉsanʉkona. Chʉ'ʉta'ni masimʉ. Jã'ajekʉna chʉ'ʉ pa'iche'te chʉ'ʉ meñe kʉasi'e ũcuarepaa'me.
15 Mʉsanʉkonata'ni chekʉna i'kacheja'che chʉ'ʉ pa'iche'te vesʉjʉ, “Cu'ache cho'omʉ ikʉ”, chiime. Chʉ'ʉta'ni pãire jã'aja'ñe i'kara chini raisi'kʉma'mʉ.
16 Chekʉrʉmʉ chʉ'ʉpi mʉsanʉkona pa'iche'te ña i'kani ũcuarepa i'kara'amʉ. Chʉ'ʉ te'eʉ cuasache'te i'kama'mʉ chʉ'ʉ. Ja'kʉ chʉ'ʉre Raosi'kʉ kʉachena'me chʉ'ʉ cuasache i'kakʉ'mʉ chʉ'ʉ.
17 Mai aipãi tocha jo'kasi'e ija'che kʉamʉ:
Pãi te'eka'chapanapi chekʉ pa'iche'te ña ũcuate'e kʉato jachamanejʉ̃'ʉ repana kʉache,
chiimʉ.
18 Chʉ'ʉ pa'iche'te meñe kʉamʉ chʉ'ʉ. Chʉ'ʉre Raosi'kʉ Ja'kʉ ũcuaja'che chʉ'ʉ pa'iche kʉamʉ —chiisi'kʉa'mʉ repaʉ.
19 Chikʉna sẽesinaa'me repana repaʉ'te.
—Mʉja'kʉ, ¿keechejare pa'ikʉ? —chiisinaa'me repana.
Chitena i'kasi'kʉa'mʉ repaʉ.
—Chʉ'ʉ pa'iche vesʉme mʉsanʉkona. Chʉ'ʉ Ja'kʉ pa'iche ũcuaja'che vesʉme. Chʉ'ʉ pa'iche masini Ja'kʉ pa'iche ũcuaja'che masira'ame mʉsanʉkona —chiisi'kʉa'mʉ repaʉ repanare.
20 Dios vʉ'ere pa'iʉ che'chokʉ jã'aja'ñe i'kasi'kʉa'mʉ Jesús, Dioni ĩsijʉ kuri mañavʉã cachejare nʉkakʉ. Repaʉ'te chẽare'orʉmʉ Dios chiisirʉmʉpi chuta'a tĩ'amaʉna te'eʉjẽ'e chẽamanesinaa'me repaʉ'te.
“Chʉ'ʉ saicheja saicu'amʉ mʉsanʉkonare”, chiimʉ Jesús
21 Ũcuarʉmʉ Jesús jo'e i'kasi'kʉa'mʉ repanare.
—Sanisõja'mʉ chʉ'ʉ. Chʉ'ʉ saisirʉmʉ ku'ejanaa'me mʉsanʉkona chʉ'ʉre. Jã'ata'ni jñaamapʉ rekoñoã cu'ache tʉnocojñomanapi jũnisõjanaa'me mʉsanʉkona. Chʉ'ʉ saicheja saicu'amʉ mʉsanʉkonare —chiisi'kʉa'mʉ repaʉ.
22 Chikʉna i'kasinaa'me repana judíopãi chʉ̃'ʉna.
—¿Je'se pa'iʉna, “Chʉ'ʉ saicheja saicu'amʉ mʉsanʉkonare”, chiikʉ ikʉ? ¿Repaʉji meñe vanisõja'ʉ? —chiisinaa'me repana.
23 Chitena i'kasi'kʉa'mʉ repaʉ.
—Cheja canaa'me mʉsanʉkona. Chʉ'ʉta'ni cʉnaʉmʉ cakʉa'mʉ. Pãi cuasachechi'a cuasanaa'me mʉsanʉkona. Chʉ'ʉta'ni Dios cuasacheja'che cuasakʉ'mʉ.
24 Jã'ajekʉna pãi cuasachechi'a cuasanajejʉna, “Rekoñoã cu'ache tʉnocojñomanapi jũnisõjanaa'me mʉsanʉkona”, chiisi'kʉa'mʉ. Chʉ'ʉ pa'iche'te mʉsanʉkonare chʉ'ʉ kʉasi'ere asa chẽamaneni cu'ache tʉnocojñomanapi jũnisõjanaa'me mʉsanʉkona —chiisi'kʉa'mʉ repaʉ repanare.
25 Chikʉna repaʉ'te sẽesinaa'me repana.
—¿Jeeja'iʉ'ʉ mʉ'ʉ? —chiisinaa'me repana.
Chitena i'kasi'kʉa'mʉ repaʉ.
—Chʉ'ʉ apeche'chorʉmʉpi vʉa chʉ'ʉ pa'iche kʉakʉ pa'imʉ chʉ'ʉ mʉsanʉkonare.
26 Chuta'a chʉ'o rʉa i'kache paamʉ chʉ'ʉ. Mʉsanʉkona cho'ojʉ pa'iche'te ñakʉ i'kani, “Cu'ache cho'ome ina”, chiira'amʉ chʉ'ʉ. Ñakʉta'ni i'kama'mʉ chʉ'ʉ. Chʉ'ʉre Raosi'kʉpi chʉ'o ũcuarepare si'arʉmʉ i'kakʉna asakʉ ũcuare pãire kʉamʉ chʉ'ʉ —chiisi'kʉa'mʉ repaʉ.
27 Repaʉ Jesús Pʉka'kʉ Dios pa'iche'te kʉasi'kʉa'mʉ. Jã'ata'ni asavesʉsinaa'me repana.
28 Asavesʉjʉna ija'che i'kasi'kʉa'mʉ repaʉ:
—Mʉsanʉkonapi chʉ'ʉni Dios Raosi'kʉni kurususẽ'verona jẽ'jo nʉkoni chʉ'ʉ pa'iche masijʉ ija'che i'kajanaa'me: “Dios Raosi'kʉa'mʉ ikʉ. Repaʉ cuasachechi'a i'kamanesi'kʉa'mʉ. Repaʉ Pʉka'kʉ che'chochechi'a i'kasi'kʉa'mʉ ikʉ”, chiijʉ masijanaa'me mʉsanʉkona.
29 Chʉ'ʉre Raosi'kʉ chʉ'ʉna'me pa'imʉ. Repaʉ chiiche'te chʉ'ʉpi si'arʉmʉ cho'okʉna jmamakarʉjẽ'e jo'kama'kʉa'mʉ Repaʉ chʉ'ʉre —chiisi'kʉa'mʉ Jesús.
30 Repaʉji jã'aja'ñe i'kaʉna reparʉmʉ pãi jainʉko, “Dios Raosi'kʉa'mʉ ikʉ”, chiijʉ cuasajʉ jovosinaa'me repaʉ'te.
Diore cuasana pa'ichena'me cu'ache pa'ina pa'iche'te kʉamʉ
31 Ũcuarʉmʉ Jesús repaʉ'te cuasanare judíopãi ija'che i'kasi'kʉa'mʉ:
—Mʉsanʉkonapi chʉ'ʉ chʉ̃'ʉñe'te jo'kasõma'ñe si'arʉmʉ cho'ojʉ pani chʉ'ʉ neerepana pa'ijanaa'me.
32 Chʉ'ʉ kʉache'te chʉ'o ũcuarepare asa chẽa masijʉna pãi chẽa paacojñonaja'ñe cu'ache pa'isinare etocheja'che re'oja'che cho'okaija'mʉ chʉ'ʉ mʉsanʉkonare —chiisi'kʉa'mʉ repaʉ.
33 Chikʉna i'kasinaa'me repana.
—Aperʉmʉ pa'isi'kʉ Abraham jojosinaa'me chʉkʉna. Jã'ajekʉna jmamakarʉjẽ'e chekʉna chẽa paacojñomanaa'me chʉkʉna. Jã'ata'ni ija'che i'kasi'kʉa'mʉ mʉ'ʉ chʉkʉna'te: “Mʉsanʉkonare pãi chẽa paacojñonaja'ñe pa'isinare etocheja'che re'oja'che cho'okaija'mʉ chʉ'ʉ”, chiisi'kʉa'mʉ mʉ'ʉ. ¿Je'se pa'iʉna jã'aja'ñe i'kaʉ? —chiisinaa'me repana repaʉ'te.
34 Chitena i'kasi'kʉa'mʉ repaʉ.
—Cu'ache cho'ona ũcuanʉko cu'api chẽa paakʉna cho'oche'te rupʉ cho'okaapʉ chini chẽa paacojñonaja'ñe pa'ime. Ũcuarepaa'me jã'a.
35 Pãiʉ repaʉ chẽa paakʉ'te majapãiʉma'kʉjekʉna ai paama'mʉ. Repaʉ mamakʉ'teta'ni majapãiʉjekʉna ai paamʉ.
36 Chʉ'ʉpi Dios Mamakʉji mʉsanʉkonare pãi chẽa paacojñonaja'ñe pa'inani etocheja'che re'oja'che cho'okatu chẽacojño etasina pa'icheja'che ũcuarepa re'oja'che pa'ijanaa'me mʉsanʉkona.
37 Abraham jojocojñosinaa'me mʉsanʉkona. Masimʉ chʉ'ʉ jã'a. Repaʉ jojocojñosinata'ni chʉ'ʉ che'choche'te jachajʉ vanisõñu chiime mʉsanʉkona chʉ'ʉre.
38 Chʉ'ʉ Ja'kʉna'me pa'iʉ ñasi'ere kʉamʉ chʉ'ʉ. Mʉsanʉkonata'ni mʉja'kʉrepaʉ i'kache'te cho'ome —chiisi'kʉa'mʉ repaʉ.
39 Chikʉna i'kasinaa'me repana.
—Abraham jojocojñosinaa'me chʉkʉna —chiisinaa'me repana.
Chitena i'kasi'kʉa'mʉ repaʉ.
—Mʉsanʉkonapi Abraham cho'osi'eja'che re'oja'che cho'oni repaʉ jojorepasina pa'ira'ame.
40 Diopi chʉ'o ũcuarepare kʉakʉna asa kʉakʉ'te vanisõñu chiime mʉsanʉkona chʉ'ʉre. Jmamakarʉjẽ'e mʉsanʉkona cho'ocheja'che cu'ache cho'omanesi'kʉa'mʉ Abraham.
41 Mʉja'kʉrepaʉ cho'ocheja'che cho'ome mʉsanʉkona —chiisi'kʉa'mʉ repaʉ.
Chikʉna i'kasinaa'me repana.
—Chekʉ chĩima'me chʉkʉna. Chʉkʉna Ja'kʉrepaʉ te'eʉ'mʉ Diochi'a —chiisinaa'me repana.
42 Chitena i'kasi'kʉa'mʉ repaʉ.
—Diopi raoʉna ichejare rani pa'imʉ chʉ'ʉ. Dios mʉsanʉkona Ja'kʉrepaʉ pa'ito chʉ'ʉre Repaʉ raosi'kʉre chiira'ame mʉsanʉkona. Chʉ'ʉchi'a te'eʉ cuasa cajesi'kʉma'mʉ chʉ'ʉ. Diopi raosi'kʉa'mʉ chʉ'ʉre.
43 ¿Je'se pa'iʉna chʉ'ʉ i'kache asavesʉche mʉsanʉkona? Chʉ'ʉ i'kache'te asacuhejʉna asoma'mʉ mʉsanʉkonare.
44 Mʉja'kʉa'mʉ jã'ʉ vati ai. Repaʉ neenajejʉ repaʉ chiichechi'a cho'oñu chiime mʉsanʉkona. Mamarʉmʉpi vʉa pãi vaikʉ'mʉ repaʉ. Chʉ'o ũcuarepa cuhekʉjekʉ si'arʉmʉ jorekʉ'mʉ repaʉ. Jore aia'mʉ repaʉ. Jore aijekʉ joreni repaʉ cho'oche'te cho'omʉ. Repaʉ pa'iche'me jã'a. Jã'ajekʉna pãi ũcuanʉko jorena pʉka'kʉa'mʉ repaʉ.
45 Chʉ'ʉreta'ni chʉ'o ũcuarepare i'kakʉna jachame mʉsanʉkona.
46 Mʉsanʉkonapi te'eʉ chʉ'ʉ cu'ache cho'oche ñasi'kʉ pani kʉajʉ̃'ʉ. Chʉ'o ũcuarepare i'kakʉ'mʉ chʉ'ʉ. ¿Je'se pa'iʉna mʉsanʉkona chʉ'ʉ i'kache cuasama'ñe?
47 Dios neena Repaʉ chʉ'o asa chẽame. Mʉsanʉkonata'ni Dios neemanajejʉ Repaʉ chʉ'o asacuheme —chiisi'kʉa'mʉ repaʉ.
Abraham chuta'a peorʉmʉ pa'ikʉ'mʉ Cristo
48 Ũcuarʉmʉ judío aina i'kasinaa'me repaʉ'te Jesure.
—“Samariapãiʉjekʉ vatire paamʉ mʉ'ʉ”, chiijʉ chʉ'o ũcuarepare i'kame chʉkʉna —chiisinaa'me repana.
49 Chitena Jesús i'kasi'kʉa'mʉ.
—Vatijẽ'e peomʉ chʉ'ʉ. Chʉ'ʉ Ja'kʉre cuasakʉjekʉ Repaʉ'te re'oja'che i'kakʉ'mʉ chʉ'ʉ. Mʉsanʉkonata'ni chʉ'ʉni ña kʉkʉmapʉ cu'ache i'kame.
50 “Pãi, ña kʉkʉjʉ̃'ʉ chʉ'ʉre”, chiima'mʉ chʉ'ʉ. Ja'kʉta'ni, “Pãi ña kʉkʉa'jʉ mʉ'ʉre”, chini raosi'kʉa'mʉ chʉ'ʉre. Chʉ'ʉre ña kʉkʉmana Ũcuaʉji ro'iche chʉ̃'ʉʉna cu'ache cho'ocojñojanaa'me repana.
51 Chʉ'ʉ i'kache jachama'ñe cho'ona cho'osõmanejanaa'me. Ũcuarepaa'me jã'a —chiisi'kʉa'mʉ repaʉ.
52 Chikʉna i'kasinaa'me repana.
—Aperʉmʉ pa'isi'kʉ Abraham jũnisõasomʉ, Dios chʉ'o kʉasina ũcuaja'che. Mʉ'ʉta'ni, “Chʉ'ʉ i'kache jachama'ñe cho'ona cho'osõmanejanaa'me”, chiimʉ. Vatire paakʉjekʉ jã'aja'ñe i'kamʉ mʉ'ʉ. Chura masime chʉkʉna.
53 “¿Mai aipãiʉ'te Abrahamre na'a rʉa masimʉ chʉ'ʉ”, chiikʉ mʉ'ʉ? Repaʉ Abraham jũnisõasomʉ, Dios chʉ'o kʉasina ũcuaja'che. “Repanare na'a rʉa masikʉ'mʉ chʉ'ʉ”, chiiʉ cuasacosomʉ mʉ'ʉ —chiisinaa'me repana.
54 Chitena i'kasi'kʉa'mʉ repaʉ.
—Chʉ'ʉpi meñe, “Rʉa masiʉ'mʉ chʉ'ʉ”, chiito jachara'ame pãi chʉ'ʉre. Chʉ'ʉ Ja'kʉta'ni, “Chʉ'ʉ chĩi rʉa masiʉ'mʉ”, chiikʉ'mʉ chʉ'ʉre. Repaʉ i'kache asacuhenata'ni, “Dios chʉkʉna'te paakʉ'mʉ”, chiime mʉsanʉkona.
55 “Dios chʉkʉna'te paakʉ'mʉ”, chiinata'ni Repaʉ pa'iche vesʉnaa'me mʉsanʉkona. Chʉ'ʉta'ni Repaʉ pa'iche masikʉ'mʉ. Chʉ'ʉpi, “Dios pa'iche vesʉkʉ'mʉ chʉ'ʉ”, chini jorera'amʉ mʉsanʉkona jorecheja'che. Repaʉ pa'iche masikʉjekʉ Repaʉ chʉ̃'ʉñe cho'okʉ'mʉ chʉ'ʉ.
56 Mai aipãiʉ Abraham chʉ'ʉ icheja cheja raijachere masikʉ pojosi'kʉa'mʉ —chiisi'kʉa'mʉ repaʉ.
57 Chikʉna i'kasinaa'me repana.
—¿Je'se pa'iʉna chuta'a cincuentarepaʉ̃sʉrʉmʉjẽ'e peokʉta'ni, “Abrahamre ñasi'kʉa'mʉ chʉ'ʉ”, chiikʉ mʉ'ʉ? —chiisinaa'me repana.
58 Chitena i'kasi'kʉa'mʉ repaʉ.
—Repaʉ Abraham chuta'a peorʉmʉ pa'ikʉ'mʉ chʉ'ʉ. Ũcuarepaa'me jã'a —chiisi'kʉa'mʉ.
59 Jã'aja'ñe i'kaʉna asa pe'rujʉ catare siasinaa'me repana, Jesuni su'a vẽasõñu chini. Jã'aja'ñe cho'ojʉna Dios vʉ'e pa'isi'kʉ kati eta pãi kuanupʉ chenevʉji ñoma'ñe sanisõsi'kʉa'mʉ repaʉ Jesús.