9
Na'ava'ʉ aineesi'kʉre Jesús vasosi'ere kʉamʉ
1 Ũcuarʉmʉ repaʉ Jesús ku'iʉ pãiʉ'te na'ava'ʉ aineesi'kʉni ñasi'kʉa'mʉ.
2 Ñaʉna chʉkʉna repaʉ neena i'kasinaa'me repaʉ'te.
—Masiʉ, ¿je'se pa'iʉna iva'ʉ na'ava'ʉ jñaacojñoʉ? ¿Repaʉ rekocho cu'ache paache ro'ire na'ava'ʉ jñaacojñoʉ? Jã'apãani, ¿pʉka'kʉpãi cu'ache pa'iche ro'ire na'ava'ʉ jñaacojñoʉ? —chiisinaa'me chʉkʉna.
3 Chitena Jesús i'kasi'kʉa'mʉ.
—Repaʉ cu'ache paache ro'ima'mʉ jã'a. Ũcuachi'a pʉka'kʉpãi cu'ache cho'oche ro'ima'mʉ. Rupʉ Diopi vasoʉna pãipi ña, “Dios peore masikʉ'mʉ”, chiijʉ masia'jʉ chini na'ava'ʉ aineesi'kʉa'mʉ ikʉ.
4 Pãi repana cho'oche umucusena cho'ore'omʉ. Ñamita'ni cho'ocu'amʉ. Ũcuaja'che chʉ'ʉre Raosi'kʉ Dios chʉ̃'ʉ jo'kasi'ere maipi churana cho'oma'to cu'amʉ. Na'a pa'isirʉmʉ cho'ocu'aja'mʉ.
5 Chejare chuta'a pa'iʉ pãire Miañeja'ñe Pa'ikʉ'mʉ chʉ'ʉ —chiisi'kʉa'mʉ repaʉ.
6 Jã'aja'ñe i'ka pi'ni chejana coo tutu cha'o chacho mini na'ava'ʉ ñakocaãna suirisi'kʉa'mʉ repaʉ.
7 Cho'o pi'ni repaʉ'te i'kasi'kʉa'mʉ repaʉ.
—Okoruruvʉ Siloé chiicojñoruruvʉna sani mʉ'ʉ chia choasõjʉ̃'ʉ cha'o —chiisi'kʉa'mʉ repaʉ. (“Siloé” chini “Saosi'e” chiimʉ.)
I'kaʉna sani choasõ rakʉna ñakocaã ñosi'kʉa'mʉ repaʉ'te.
8 Ñakocaãre ñakʉna repaʉ'te kueñe pa'inana'me repaʉji kuri si'arʉmʉ sẽeʉ ñu'iʉna ñasina i'kasinaa'me.
—¿Na'ava'ʉjekʉ aperʉmʉ ichejare ñu'iʉ kuri sẽesi'kʉma'kʉ repa ikʉ? —chiisinaa'me repana.
9 Chitena chekʉna i'kasinaa'me.
—Ũcuaʉ'mʉ ikʉ —chiisinaa'me.
Chekʉna ija'che i'kasinaa'me:
—Tĩiʉta'ni rupʉ ũcuaʉja'iʉ'mʉ ikʉ —chiisinaa'me.
Ũcuarʉmʉ ũcuaʉji i'kasi'kʉa'mʉ.
—Ũcuaʉ'mʉ chʉ'ʉ —chiisi'kʉa'mʉ repaʉ.
10 Chikʉna sẽesinaa'me repana.
—¿Je'se pa'iʉna na'ava'ʉ pa'isi'kʉta'ni chura ñakʉ mʉ'ʉ? —chiisinaa'me repana.
11 Chitena i'kasi'kʉa'mʉ repaʉ.
—Pãiʉ Jesús ve'ekʉji coo tutu cha'o chacho mini chʉ'ʉ ñakocaãna suiri ija'che i'kasi'kʉa'mʉ chʉ'ʉre: “Okoruruvʉ Siloé chiiruruvʉna sani mʉ'ʉ chia cha'ore choasõjʉ̃'ʉ”, chiisi'kʉa'mʉ. Chikʉna sani choa pi'niʉna ñakocaã ñosi'kʉa'mʉ chʉ'ʉre —chiisi'kʉa'mʉ repaʉ.
12 Chikʉna sẽesinaa'me repana.
—¿Jeechejare pa'ikʉ repaʉ, mʉ'ʉ i'kakʉ? —chiisinaa'me.
Chitena i'kasi'kʉa'mʉ repaʉ.
—Vesʉmʉ chʉ'ʉ —chiisi'kʉa'mʉ repaʉ na'ava'ʉ pa'isi'kʉ.
Fariseopãi na'ava'ʉ pa'isi'kʉre repaʉ'te vasosi'ere sẽesi'ere kʉamʉ
13-14 Jesús cha'opi chacho mini na'ava'ʉre vasoumucuse pʉaumucuse pa'isi'kʉa'mʉ. Jã'ajekʉna pãi na'ava'ʉ pa'isi'kʉre fariseopãi pa'ivʉ'ena mʉvaasome.
15 Mʉvarena repana fariseopãi na'ava'ʉ pa'isi'kʉre chekʉna sẽesi'eja'che sẽniasome.
—¿Je'se cho'o ñakocaã ñakʉ mʉ'ʉ? —chiniasome.
Chitena i'kaasomʉ repaʉ.
—Chʉ'ʉ ñakocaãna cha'opi chacho suiriʉna okopi choasõjani ñamʉ chʉ'ʉ chura —chiniasomʉ repaʉ.
16 Chikʉna fariseopãi te'ena ija'che i'kaasome:
—Mʉ'ʉre pʉaumucusena vasosi'kʉ Dios raomanesi'kʉcosomʉ. Dios Raosi'kʉ pani pʉaumucuse jã'aja'ñe cho'omanera'amʉ repaʉ —chiniasome.
Chekʉnata'ni ija'che i'kaasome:
—Ikʉre vasosi'kʉ cu'ache pa'ikʉ pani Diochi'a te'eʉ cho'omasiche cho'omanera'amʉ —chiniasome. Ũcuate'e cuasamaneasome repana.
17 Jã'ajekʉna na'ava'ʉ pa'isi'kʉre jo'e sẽniasome repana.
—Mʉ'ʉre vasosi'kʉ pa'iche, ¿je'se chiikʉ mʉ'ʉ? —chiniasome repana.
Chitena i'kaasomʉ repaʉ.
—“Dios chʉ'o kʉakʉ'mʉ”, chiimʉ chʉ'ʉ —chiniasomʉ repaʉ.
18 Ũcuarʉmʉ judío aina repaʉ'te vasosi'ere jachajʉ, “Na'ava'ʉ pa'isi'kʉma'mʉ ikʉ”, chiijʉ jachaasome. Jachajʉ repaʉ pʉka'kʉpãi soni rao
19 sẽniasome repana.
—¿Ikʉ mʉsanʉkona chĩia'ʉ? Iva'ʉ mʉsanʉkona, “¿Chĩirʉmʉna teana na'ava'ʉ aineesi'kʉ”, chiicojñova'ʉa'ʉ? Jã'a pa'ito, ¿je'se cho'o chura ñakocaã ñakʉ ikʉ? —chiniasome repana.
20 Chitena pʉka'kʉpãi i'kaasome repanare.
—Chʉkʉna chĩia'mʉ ikʉ. Teana na'ava'ʉ aineesi'kʉa'mʉ ikʉ.
21 Jã'ata'ni repaʉ ñakocaã cho'o ñañe vesʉme chʉkʉna. Repaʉ'te vasosi'kʉre ũcuaja'che vesʉme chʉkʉna. Sẽniasajʉ̃'ʉ repaʉni kʉaa'kʉ. Aia'mʉ repaʉ —chiniasome repana.
22 Fariseopãire vajʉchʉjʉ jã'aja'ñe i'kaasome repana pʉka'kʉpãi. Aperʉmʉ judíopãi chʉ̃'ʉna, “ ‘Jesús Dios Raocojñosi'kʉa'mʉ’, chiinare mai judíopãi chi'ivʉ'e kakache ʉ̃señu”, chiniasome.
23 Jã'aja'ñe chiisi'ejekʉna, “Aia'mʉ repaʉ. Repaʉni sẽniasajʉ̃'ʉ”, chiniasome repana.
24 Ũcuarʉmʉ repana judío aina na'ava'ʉ pa'isi'kʉre jo'e soni i'kaasome.
—Dios ñakʉ'te chʉ'o ũcuarepare i'kajʉ̃'ʉ. “Mʉ'ʉre vasomʉ chʉ'ʉ”, chiisi'kʉ cu'akʉ'mʉ —chiniasome repana.
25 Chitena i'kaasomʉ repaʉ.
—Chekʉrʉmʉ cu'ache cho'okʉ'mʉ repaʉ. Chekʉrʉmʉ pãakʉ'mʉ. Vesʉmʉ chʉ'ʉ. Ieta'ni masimʉ: Aperʉmʉ na'ava'ʉ pa'isi'kʉ chura ñamʉ chʉ'ʉ —chiniasomʉ repaʉ.
26 Chikʉna jo'e sẽniasome repana repaʉ'te.
—¿Je'se cho'oʉ repaʉ? ¿Je'se cho'oʉna ñakocaã ñoʉ mʉ'ʉre? —chiniasome repana.
27 Chitena i'kaasomʉ repaʉ.
—Repaʉ cho'osi'e kʉacuhasi'kʉa'mʉ chʉ'ʉ. Jã'ata'ni jachame mʉsanʉkona. ¿Je'se pa'iʉna jo'e, “Kʉajʉ̃'ʉ”, chiiche mʉsanʉkona chʉ'ʉre? ¿Mʉsanʉkona ũcuachi'a repaʉni jovoñu chiiche? —chiniasomʉ repaʉ repanare.
28 Chikʉna asa pe'rujʉ repaʉ'te ija'che i'kaasome repana:
—Mʉ'ʉ repaʉ chʉ̃'ʉñe cho'okʉ'mʉ. Chʉkʉnata'ni Moisés chʉ̃'ʉ jo'kasi'e cho'onaa'me.
29 Dios Moisere i'kasi'e masinaa'me chʉkʉna. Mʉ'ʉre vasosi'kʉre raosi'kʉreta'ni vesʉme chʉkʉna —chiniasome repana.
30 Chitena i'kaasomʉ repaʉ.
—¿Repaʉ'te raosi'kʉre vesʉche mʉsanʉkona? ¡Jeerʉa tĩiñea'ñe jã'a! Chʉ'ʉre vasosi'kʉa'mʉ repaʉ.
31 Cu'ache pa'ina sẽeñe cho'okaima'mʉ Dios. Jã'are masime mai. Repaʉ'te Diore pojojʉ Repaʉ chʉ̃'ʉñe cho'ona sẽeñeta'ni cho'okaikʉ'mʉ Repaʉ.
32 Te'eʉ'terejẽ'e na'ava'ʉ aineesi'kʉre vasoasomʉ chiicojñokʉ'te asamanaa'me mai.
33 Repaʉji Dios raomanesi'kʉ pani Diochi'a te'eʉ cho'omasiche cho'omanera'amʉ —chiniasomʉ repaʉ.
34 Chikʉna i'kaasome repana.
—¿Chĩirʉmʉna teana cu'ache aineesiva'ʉpi che'chora chiikʉ mʉ'ʉ chʉkʉna'te? Rʉa tĩiñea'me jã'a —chiniasome repana. Chini repaʉ'te ve'sena etoasome repana.
Diore cuasamana na'ava'na pa'icheja'che pa'iche'te kʉamʉ
35 Ũcuarʉmʉ Jesús na'ava'ʉ pa'isi'kʉre etosi'e asasi'kʉa'mʉ. Asasi'kʉjekʉ repaʉ'te ku'e jñaa ija'che i'kasi'kʉa'mʉ repaʉ:
—¿Dios Raosi'kʉre cuasakʉ mʉ'ʉ? —chiisi'kʉa'mʉ repaʉ ũcuaʉji.
36 Chikʉna i'kasi'kʉa'mʉ repaʉ.
—¿Kaʉa'ʉ repaʉ? Kʉajʉ̃'ʉ chʉ'ʉre; repaʉni cuasara —chiisi'kʉa'mʉ repaʉ.
37 Chikʉna Jesús i'kasi'kʉa'mʉ repaʉ'te.
—Ñacuhamʉ mʉ'ʉ repaʉ'te. Ũcuaʉ'mʉ chʉ'ʉ, mʉ'ʉre i'kakʉ —chiisi'kʉa'mʉ repaʉ.
38 Chikʉna asa Jesure ti'jñeñe ro're pʉʉ ñu'iʉ i'kasi'kʉa'mʉ repaʉ.
—Pãi Ũcuanʉkore Paakʉ, cuasamʉ chʉ'ʉ mʉ'ʉre —chiiʉ repaʉ'te pojosi'kʉa'mʉ repaʉ.
39 Ũcuarʉmʉ Jesús i'kasi'kʉa'mʉ.
—Ichejare chejare caje pa'iʉ che'chomʉ chʉ'ʉ, cu'ache pa'inajejʉ, “Na'ava'na pa'icheja'che pa'inaa'me chʉkʉna”, chiinapi asa chẽa chʉ'ʉni cuasajʉ ñakocaã ñana pa'icheja'che re'oja'che paapʉ chini. Jã'ata'ni chekʉnare, “Dios chʉ'o masinajejʉ re'oja'che pa'inaa'me chʉkʉna”, chiinani, “Dios chʉ'o masinata'ni chʉ'ʉni cuhejʉ na'ava'na pa'icheja'che pa'ime mʉsanʉkona”, chisa chini cajesi'kʉa'mʉ chʉ'ʉ —chiisi'kʉa'mʉ.
40 Repaʉ i'kasi'ere asa fariseopãi te'ena repaʉ'te ja'me pa'ina sẽesinaa'me.
—¿Mʉ'ʉ cuasato chʉkʉna na'ava'na pa'icheja'che pa'inaa'ñe? —chiisinaa'me repana.
41 Chitena i'kasi'kʉa'mʉ repaʉ.
—Mʉsanʉkonapi Dios chʉ'ore vesʉjʉ na'ava'na pa'icheja'che pani chʉ'ʉre cuheche ro'iche peora'amʉ mʉsanʉkonare. Jã'ata'ni, “Dios chʉ'o masime chʉkʉna”, chiinapi chʉ'ʉni cuhejʉna ro'iche pa'imʉ mʉsanʉkonare —chiisi'kʉa'mʉ repaʉ Jesús.