13
Lamaribi nechi, to tenpe nechi laminla
1 Junni lamari pi fiquile tsalanbi wirurato, tiyato lamaribi nechi lanaminca quirayoe. Sieteca misu chun, chunca cachi chun animali joe. Chunca cachibi mantaminlachi corona pun joe. Jun misu cura mumunca pila chuteca joe. Diosica seitonque panun mumun joe.
2 Junni la quiraca animali quelanan quiran joe. Nederi paya nedenan quiran joe. Fiqui forori luquela fiqui foronan quiran joe. Junni dracón jun animalichi mantá cuwae. Jun animalichi yachi mantaca cuwae yape sonba mantasa.
3 Junni ya animalichi misu mancari fudaicanan quiran joe. Puyaca jominnan quiran joe. Juntonan manseica joe. Junni jerale tote chuminla yaca wepanato quirato, ya animalibe jera cayailaie.
4 Dracón ya animalichi mantá cuwaca joe. Jun tenchi jeralela draconchi cale telenhilaie. Ya animalichi calenan telenhilaie. Yaca se tito, in animali tsannan monantiya itoe latie. Yaca monantiya quicaato fe lotuchunae latie.
5 Junni animalichi mantá cuwae yape duque fe joyoe tito, Diosica seitonque pasa. Yachi mantá cuwae yape junpalu chunca palu pe fecári mantá tan nenasa.
6 Diosica seitonque pae. Junsi yachi mumunca, yachi yaca, yachi tobi chuminlaca seitonque pae.
7 Dracón ya animalica poden suwae yape Diosichi tsachilaca quera quicaato fe losa. Jerale tobi chuminlacanan, jerale tsachi bolonca, jerale fiqui paminlaca, mantasa poden suwae.
8 Junni jun tenchi piyanle tote chuminla yachi cale telenhilaie. Junnasanan toteca jomin Opisa Nari pila tae. Junni Opisa Nachi pilabi chuteca junlari ya animalichi cale telenhilaitue. Jun pilabi chuteca junlari Diosibe numatotiya sonnato polelaichunae. To caitosanan yalachi mumunca junbi chuteca joe.
9 Punqui chunla in fiquica seque meránola joe:
10 Dosa cariminla doinola jochunae.
Tsachilaca espadachi toteminla, yalanan jun tsanquenan totailaichunae.
Diosichi tsachilari ya fiquica tennato peleituto nenanola joe.
11 Junsi manca animalicaman quirayoe. Yaca tobi nechi lanaminca quirayoe. Yari paluca cachí chun joe. Opisa nachi cachinan quiran jotonan, dracón cuwenta pamin joe.
12 Caque animalichi mantate jera mantaquiniquimin joe caque animalichi cale. ¿Ya caque animali fudaito puyano inato, manseica joco? Junni yachi benele animali jerale tote chuminlaca caque animalichi cale jera telenhisa carimin joe.
13 Duque wepanato quirantsancari quimin joe yape tsachila wepanato quiralaquisa. Ninca jamochi nechi toca pataricamin joe tsachila quiralaquinasa.
14 Yaca wepanato quirantsancari quino poden suwaca joe caque animalichi cate. Junto tsanque wepanato quirantsancari quinato, jerale tote chuminlaca encanamin joe. Yalacari encanato, molde quilaquisa carie. Caque animalica se tino joe tito yaca molde quilaquisa carie. Ya caque animaliri, ya espadachi fudaito puyano inato manseica jun animali joe.
15 Junni jun moldeca sonhisa carino podeie yape cuenta quisa. Junni molde sonhito, ya moldenan yaca se tituminlaca jera totesa carino podeie.
16 Junni jeralelaca marcaquisa carie. Tsa tedebi o lesubi marcaquisa carie. Mantá tanla, epe tsachila, ocola, poperela, peyunla, peyun itonla, jeralela marcailaie.
17 Junni uyanlari, marcaica itonlari nin osin, nin can, quino podeilaitue. Junni ya animalichi marca yachi mumun joe. O mumun itotori, yachi mumunchi numero joe.
18 Inca duque tenca cantsan joe. Tenca tanlari ya animalichi numeroca cuenta larito, jera entendeintsan joe. Tsachichi numero joe. Yachi numero sota patsa sota chunca sotaca joe.